പരമ്പര നേടിയിട്ടും തിരിച്ചടി, WTC പോയന്റ് പട്ടികയിൽ ബംഗ്ലാദേശിനെ മറികടക്കാനാവാതെ ഇന്ത്യ

കൊളംബോ: അവസാനദിനം അസാമാന്യ പോരാട്ടം കാഴ്ചവെച്ചാണ് രണ്ടാം ടെസ്റ്റിൽ ഇന്ത്യക്കെതിരേ തോൽക്കാതെ ലങ്ക കരകയറിയത്. ഫോളോ-ഓൺ ചെയ്യാൻ ബാറ്റിങ്ങിനിറങ്ങിയ ലങ്കയെ അവസാനദിനം പുറത്താക്കാൻ ഇന്ത്യക്കായില്ല. ഒടുക്കം ഒൻപത് വിക്കറ്റ് നഷ്ടത്തിൽ 429 റൺസെന്ന നിലയിലാണ് ലങ്ക രണ്ടാം ഇന്നിങ്‌സ് അവസാനിപ്പിച്ചത്. മത്സരം സമനിലയിലായതോടെ ആദ്യ ടെസ്റ്റ് ജയത്തോടെ ഇന്ത്യക്ക് പരമ്പര ജയവും നേടാനായി. അതേസമയം ലോക ടെസ്റ്റ് ചാമ്പ്യൻഷിപ്പ് ഫൈനൽ ബെർത്ത് മോഹിക്കുന്ന ഇന്ത്യക്ക് തിരിച്ചടിയാണ് ഫലം.

പരമ്പര തൂത്തുവാരി ലോക ടെസ്റ്റ് ചാമ്പ്യൻഷിപ്പ് പട്ടികയിൽ മുന്നേറാമെന്നായിരുന്നു ഗില്ലിന്റെയും സംഘത്തിന്റെയും പദ്ധതി. എന്നാൽ രണ്ടാം ടെസ്റ്റ് സമനിലയിൽ കലാശിച്ചതോടെ ഇന്ത്യക്ക് തിരിച്ചടിയേറ്റു. പോയന്റ് ശതമാനത്തിൽ ഇടിവും സംഭവിച്ചു. ടെസ്റ്റ് ചാമ്പ്യൻഷിപ്പ് പോയന്റ് പട്ടികയിൽ ഇപ്പോഴും അഞ്ചാം സ്ഥാനത്താണ് ഇന്ത്യ. ബംഗ്ലാദേശിനെ മറികടക്കാൻ ഇന്ത്യക്കായിട്ടില്ല. ലങ്ക ആറാം സ്ഥാനത്തും തുടരുന്നു.

11 മത്സരങ്ങളിൽ നിന്ന് ജയവും നാല് തോൽവിയും രണ്ട് സമനിലയുമടക്കം 68 പോയന്റുമായി അഞ്ചാം സ്ഥാനത്താണ് ഇന്ത്യ. നിലവിൽ 51.52 ആണ് പോയന്റ് ശതമാനം. നേരത്തേയുണ്ടായിരുന്ന പോയന്റ് ശതമാനം 53.33 ആയിരുന്നു. ലങ്കൻ ടെസ്റ്റ് സമനിലയായതോടെ പോയന്റ് ശതമാനത്തിൽ ഇടിവുണ്ടായി. ബംഗ്ലാദേശാണ് പട്ടികയിൽ നാലാമത്. ഓസീസിനെതിരായ ടെസ്റ്റ് തോൽവിയോടെ പോയന്റ് ശതമാനം 55.56 ലേക്ക് കൂപ്പുകുത്തി.

ന്യൂസിലൻഡ് മൂന്നാമതും ദക്ഷിണാഫ്രിക്ക രണ്ടാമതുമാണ്. കിവീസിന് 72.22 പോയന്റ് ശതമാനവും ദക്ഷിണാഫ്രിക്കയ്ക്ക് 75 പോയന്റ് ശതമാനവുമുണ്ട്. പട്ടികയിൽ തലപ്പത്ത് ഓസ്‌ട്രേലിയ തന്നെയാണ്. പത്ത് മത്സരങ്ങളിൽ നിന്ന് എട്ട് ജയവും രണ്ട് തോൽവിയുമായി 80 പോയന്റ് ശതമാനമുണ്ട്.

Content Highlights: India won the Test series against Sri Lanka despite the second Test ending in a draw., Sri Lanka fought back brilliantly on the final day, finishing at 429/9 in their second innings., The draw resulted in a drop in India's points percentage in the World Test Championship standings