ശ്രീലങ്കയ്ക്കെതിരായ ടി20 പരമ്പര; തിരുവനന്തപുരത്ത് മൂന്ന് മത്സരങ്ങൾ, ഡിസംബർ 26, 28, 30 തീയതികളിൽ

തിരുവനന്തപുരം: അടുത്തമാസം നടക്കുന്ന ഇന്ത്യ-ശ്രീലങ്ക വനിതാ ടി20 പരമ്പരയിലെ മൂന്ന് മത്സരങ്ങള്‍ തിരുവനന്തപുരം കാര്യവട്ടം സ്‌പോര്‍ട്‌സ് ഹബ്ബിൽ നടക്കും. ഡിസംബര്‍ 26, 28, 30 തീയതികളിലാണ് തിരുവനന്തപുരത്തെ മത്സരങ്ങള്‍.

അഞ്ച് മത്സരങ്ങളടങ്ങിയ ടി20 പരമ്പരയ്ക്കാണ് ശ്രീലങ്കന്‍ വനിതകള്‍ ഇന്ത്യയിലെത്തുക. ഇതില്‍ അവസാനത്തെ മൂന്നു മത്സരങ്ങള്‍ക്കും തിരുവനന്തപുരം വേദിയാവും. ആദ്യ രണ്ട് മത്സരങ്ങള്‍ ആന്ധ്രപ്രദേശിലെ വിശാഖപട്ടണത്തെ എസിഎ-വിഡിഎ ക്രിക്കറ്റ് സ്റ്റേഡിയത്തിലും നടക്കും. ഡിസംബര്‍ 21, 23 തീയതികളിലായിരിക്കും ഈ മത്സരങ്ങള്‍.

താരങ്ങളോട് ഡിസംബര്‍ 17-നകം വിശാഖപട്ടണത്ത് എത്താന്‍ നിര്‍ദേശം നല്‍കിയിട്ടുണ്ടെന്നാണ് വിവരം. ഒക്ടോബര്‍-നവംബര്‍ മാസങ്ങളില്‍ നടന്ന വനിതാ ഏകദിന ലോകകപ്പിലെ ഇന്ത്യയുടെ രണ്ട് മത്സരങ്ങള്‍ വിശാഖപട്ടണത്താണ് നടന്നത്. ഏകദിന ലോകകപ്പ് കിരീടനേട്ടത്തിനു ശേഷമുള്ള ഇന്ത്യയുടെ ആദ്യ ടൂര്‍ണമെന്റാണിത്.

Content Highlights: Trivandrum to Host Final Three India vs. Sri Lanka Women's T20 Matches