വെല്ലിങ്ടണിൽ സെഞ്ചുറിയുമായി ചരിത്രമെഴുതി ഗ്ലെൻ ഫിലിപ്സ്; രോഹിത് ശർമയുടെ പേരിലുള്ള അപൂർവ റെക്കോർഡിനൊപ്പമെത്തി

വെല്ലിങ്ടൺ: ഇന്ത്യയ്ക്കെതിരായ ഒന്നാം ടെസ്റ്റിലെ സെഞ്ചുറി നേട്ടത്തിലൂടെ ചരിത്രമെഴുതി ന്യൂസീലൻഡ് ബാറ്റർ ഗ്ലെൻ ഫിലിപ്സ്. ഒരു കലണ്ടർ വർഷത്തിൽ ക്രിക്കറ്റിന്റെ മൂന്ന് ഫോർമാറ്റിലും ഇന്ത്യക്കെതിരെ സെഞ്ചുറി നേടുന്ന ആദ്യ താരമെന്ന റെക്കോർഡാണ് ഫിലിപ്സ് സ്വന്തമാക്കിയത്. ഇതോടൊപ്പം ഇന്ത്യൻ താരം രോഹിത് ശർമയ്ക്കൊപ്പം മറ്റൊരു റെക്കോഡ് കൂടി കിവീസ് ബാറ്റർ പങ്കിട്ടു. ഒരു കലണ്ടർ വർഷത്തിൽ ഒരേ എതിരാളികൾക്കെതിരെ മൂന്ന് ഫോർമാറ്റിലും സെഞ്ചുറി നേടുക എന്ന റെക്കോർഡിലാണ് ഫിലിപ്സ് രോഹിത്തിനൊപ്പം എത്തിയത്. 2017-ൽ ശ്രീലങ്കയ്ക്കെതിരെയാണ് രോഹിത് ഈ നേട്ടം കൈവരിച്ചത്.
ഈ വർഷം ആദ്യം ഇന്ത്യയ്ക്കെതിരെ ഏകദിനത്തിലും ട്വന്റി 20യിലും ഫിലിപ്സ് സെഞ്ചുറി നേടിയിരുന്നു. ഇതിന് പിന്നാലെയാണ് ഒന്നാം ടെസ്റ്റിന്റെ ആദ്യ ഇന്നിങ്സിലും മൂന്നക്കം പിന്നിട്ടത്. 2026 ജനുവരിയിൽ ഇൻഡോറിൽ നടന്ന ഏകദിന മത്സരത്തിൽ ഫിലിപ്സ് 106 റൺസാണ് അടിച്ചെടുത്തത്. ഒക്ടോബറിൽ ഓക്ക്ലൻഡിൽ നടന്ന ട്വന്റി 20യിൽ 49 പന്തിൽ 107 റൺസും നേടി. കൂടാതെ ഒരേ എതിരാളികൾക്കെതിരെ മൂന്ന് ഫോർമാറ്റിലും സെഞ്ചുറി നേടുന്ന ആദ്യ ന്യൂസീലൻഡ് ബാറ്റർ എന്ന ബഹുമതിയും ഫിലിപ്സ് സ്വന്തമാക്കി.
ഇന്ത്യയ്ക്കെതിരെ മൂന്ന് ഫോർമാറ്റിലും സെഞ്ചുറി നേടുന്ന മൂന്നാമത്തെ താരം കൂടിയാണ് ഗ്ലെൻ ഫിലിപ്സ്. ഇതിന് മുമ്പ് ഓസ്ട്രേലിയയുടെ ഷെയ്ൻ വാട്സൺ, വെസ്റ്റിൻഡീസ് ബാറ്റർ ഷായ് ഹോപ്പ് എന്നിവരാണ് ഈ നേട്ടത്തിലെത്തിയത്. 2010-നും 2016-നും ഇടയിലായിരുന്നു ഷെയ്ൻ വാട്സൺന്റെ സെഞ്ചുറികൾ. ഇന്ത്യക്കെതിരെ 2025-ൽ ടെസ്റ്റ് സെഞ്ചുറി നേടിയ ഷായ് ഹോപ്പ് അഞ്ച് ഏകദിന സെഞ്ചുറിയും രണ്ട് ട്വന്റി 20 സെഞ്ചുറിയും അക്കൗണ്ടിലെത്തിച്ചിട്ടുണ്ട്.
Content Highlights: Glenn Phillips scored a century in the Wellington Test against India., First player to score centuries across all three formats against India in a single calendar year., Equalled Rohit Sharma's record of scoring centuries in all three formats against the same opponent in a calendar year., First New Zealand batter to achieve centuries across all three formats against a single opponent.