പ്രവാസരേഖയായി മാറിയ ഷെര്‍ലക്കിന്റെ നഖങ്ങള്‍; അത്യുത്തരാധുനികനായ എം.ടി. | മുസഫര്‍ അഹമ്മദ്
'ഷെര്‍ലക്കി'ന്റെ നഖം പുറത്തേക്കു നീളുന്ന എം.ടി. കഥയിലെ സന്ദര്‍ഭം 'ബ്ലാക്ക് ലൈവ് മാറ്റേഴ്‌സ്' പ്രക്ഷോഭകാലത്ത് ഒരിക്കല്‍ കൂടി വായിച്ചു. ആ നഖങ്ങള്‍ അപ്പോള്‍ വംശവെറിയുടെ കൊടിയടയാളമായിത്തന്നെ തോന്നി. വെട്ടിക്കളഞ്ഞുവെന്ന് ബാലുവിന്റെ ചേച്ചി പറഞ്ഞ പൂച്ചയുടെ നഖങ്ങള്‍ കഥയുടെ ഒടുവില്‍ പുറത്തേക്കു നീളുകയാണല്ലോ. അമേരിക്കന്‍ അധിനിവേശത്തിന്റെ ചിഹ്നം എന്ന നിലയില്‍ ആ നഖങ്ങളെ ചില നിരൂപകര്‍ അടയാളപ്പെടുത്തി. ഷെര്‍ലക്ക് എന്ന അമേരിക്കന്‍ പൂച്ചയുടെ കഥ ഇന്ന് ലോകമെങ്ങും പരന്നു കിടക്കുന്ന മലയാളി പുറംവാസി (പ്രവാസി) സമൂഹങ്ങള്‍ നേരിടുന്ന പലതരം അപമാനങ്ങളുടേയും ഹിംസയുടേയും പശ്ചാത്തലത്തില്‍ തിരിച്ചറിയാന്‍ ശ്രമിക്കുകയാണ് വേണ്ടതെന്ന് തോന്നുന്നു.
നഖങ്ങളും നഖക്ഷതങ്ങളും എം.ടി ആഖ്യാനങ്ങളില്‍ അത്ര അപരിചതമായ ഒന്നല്ല. എന്നാല്‍ ഷെര്‍ലക്കിലെ പൂച്ചയുടെ നഖങ്ങള്‍ പുറംവാസ ജീവിതത്തിനു ശ്രമിക്കുന്ന ബാലുവിനു നേരെയാണ് നീളുന്നത്. അമേരിക്കന്‍ പൂച്ച എന്ന പൗരത്വം തന്നെ ജീവിക്കാനും അതിജീവിക്കാനും ഷെര്‍ലക്കിനെ സഹായിക്കുന്നു. പുറംവാസിയും സ്വദേശിയും തമ്മിലുള്ള നിരന്തര സംഘര്‍ഷത്തിന്റെ പല തരം അടരുകള്‍ മലയാളിയുടെ പരദേശ (മൈഗ്രന്റ്) ജീവിതത്തിലുണ്ട്. 1998-ല്‍ ഈ കഥ പുറത്തു വരുമ്പോള്‍ കേരളത്തിലെ ഗള്‍ഫ് ബൂം അല്‍പ്പമെങ്കിലും പിന്നോട്ടു പോയിരുന്നു. ഇന്ന് വൃദ്ധര്‍ മാത്രമുള്ള ഒരു സ്ഥലമായി കേരളം മാറിക്കൊണ്ടിരിക്കുന്നു. പരദേശ കേരളത്തിലിരുന്ന് 'ഷെര്‍ലക്ക്' വായിക്കുമ്പോള്‍ അത് തീര്‍ത്തും വ്യത്യസ്തമായ കൃതിയായി മാറുന്നു. ബാലുവിനെപ്പൊലെ പല തരം നഖങ്ങളെ അഭിമുഖീകരിക്കുക എന്ന യാഥാര്‍ഥ്യത്തില്‍നിന്നും (അതിന്റെ രൂപവും ഭാവവും തീക്ഷ്ണതയും മാറുന്നു. രക്തത്തിനും വിയര്‍പ്പിനും സഹനങ്ങള്‍ക്കും മാറ്റമില്ല. മലയാളിയുടെ തൊഴില്‍ പ്രവാസത്തിന്റെ കഥയുടെ റൂട്ട്മാപ്പ് വരക്കുന്നത് ഷെര്‍ലക്കിന്റെ നഖങ്ങള്‍ കൊണ്ടു കൂടിയാണ്) മലയാളിക്ക് ഒരു നിലക്കും രക്ഷയില്ല.
Content Highlights: mt at 90 v. musafar ahammed writes