മാതൃഭൂമി അന്താരാഷ്ട്ര അക്ഷരോത്സവം: താളമിട്ട്, ഒപ്പുചാര്ത്തി മാനവീയംവീഥിയില് വിളംബര സായാഹ്നം
തിരുവനന്തപുരം: അക്ഷരങ്ങളും ചിന്തകളും സംഗീതവും സംവാദവുമൊക്കെ നിറയുന്ന മാതൃഭൂമി അന്താരാഷ്ട്ര അക്ഷരോത്സവത്തിലേക്ക് ഉണരാന് തയ്യാറായി കനകക്കുന്ന്. ഫെബ്രുവരി എട്ടിന് ആരംഭിക്കുന്ന അക്ഷരോത്സവത്തിന്റെ വിളംബരമായി ഞായറാഴ്ച മാനവീയംവീഥിയില് കലാസായാഹ്നവും ഒപ്പുശേഖരണവും നടക്കും. രാഷ്ട്രീയ-സാംസ്കാരികരംഗത്തെ പ്രമുഖകര് ഐക്യദാര്ഢ്യത്തിന്റെ ഒപ്പുചാര്ത്തും.
എട്ടു മുതല് 11 വരെ തിരുവനന്തപുരം കനകക്കുന്ന് കൊട്ടാരത്തില് നടക്കുന്ന മാതൃഭൂമി അന്താരാഷ്ട്ര അക്ഷരോത്സവത്തില് ലോകസാഹിത്യവും രാഷ്ട്രീയവും മുതല് സിനിമയും ജനപ്രിയ കലകളുംവരെയാണ് സഹൃദയരെ കാത്തിരിക്കുന്നത്. തുര്ക്കി നോവലിസ്റ്റും അംബാസഡറുമായ ഫിറാദ് സുനേല്, അമേരിക്കന് എഴുത്തുകാരന് ഷോണ്പ്രന്റിസ്, സ്പെയിനില്നിന്നുള്ള ഫ്രാന്സെസ്ക് മിറായെസ് തുടങ്ങി പ്രമുഖരുടെ നിരയാണ് അന്താരാഷ്ട്ര എഴുത്തുവഴികളും രാഷ്ട്രീയചിന്തകളുമായി അക്ഷരോത്സവത്തിന്റെ ഭാഗമാകുന്നത്.
സാംസ്കാരികക്കൂട്ടായ്മയുടെ ഭാഗമായി ജയചന്ദ്രന് കടമ്പനാടിന്റെ 'മണ്പാട്ട്' സംഘം നയിക്കുന്ന നാടന്പാട്ട് അവതരണവുമുണ്ടാകും. ഒപ്പം ടാഗോറിന്റെ ഗീതാഞ്ജലിയും വയലാര് കവിതകളും മാനവീയത്തില് പാടിനിറയും.
Content Highlights: mbifl2024, Rally at Manaveeyam veedhi, Mathrubhumi International Festival of Letters