പരിക്കേറ്റ് കിടന്നത് അഭിനയം തന്നെയോ ? ഇൻസ്റ്റഗ്രാം പോസ്റ്റുമായി സഹതാരം

നിര്‍ണായകമായ സൂപ്പര്‍ എട്ട് മത്സരത്തില്‍ ബംഗ്ലാദേശിനെ കീഴടക്കിയാണ് അഫ്ഗാനിസ്താന്‍ ലോകകപ്പ് സെമി ടിക്കറ്റെടുത്തത്. സെമിയിൽ കടന്നെങ്കിലും മത്സരത്തിനിടെ അഫ്​ഗാൻ കോച്ച് നടത്തിയ ഇടപെടൽ വൻ വിവാദമായിരുന്നു. ഡക്ക് വര്‍ത്ത് ലൂയിസ് നിയമപ്രകാരം അഫ്ഗാന്‍ മുന്നിട്ടുനില്‍ക്കുന്ന സന്ദര്‍ഭത്തിലാണ് ഈ ഇടപെടല്‍. അഫ്ഗാന്‍ താരമായ ​ഗുൽബാദിൻ നയ്ബിനോട് മത്സരം വൈകിപ്പിക്കാനുള്ള ആംഗ്യം കാണിച്ചതാണ് വിവാദമായത്. ഗുല്‍ബാദിന്‍ നയ്ബ് പെട്ടെന്ന് തന്നെ പരിക്കുണ്ടെന്ന് പറഞ്ഞ് മൈതാനത്ത് കിടക്കുകയും ചെയ്തു. കളി മന:പൂര്‍വ്വം വൈകിപ്പിച്ച് മത്സരം അനുകൂലമാക്കാനാണ് പരിശീലകന്‍ ജൊനാഥന്‍ ട്രോട്ട് ഇടപെട്ടത് എന്നാണ് ഉയരുന്ന ആരോപണം. ഇതിന്റെ വീഡിയോ സമൂഹമാധ്യമങ്ങളില്‍ വ്യാപകമായി പ്രചരിക്കുകയാണ്. 

ഇപ്പോഴിതാ മത്സരത്തിന് പിന്നാലെ അഫ്ഗാന്‍ താരം നവീന്‍ ഉള്‍ ഹഹിന്റെ ഇന്‍സ്റ്റഗ്രാം പോസ്റ്റാണ് ചര്‍ച്ചയാകുന്നത്. 'അഫ്ഗാന്റെ ജയത്തിന് ശേഷം ഗുല്‍ബാദിന്‍ നയ്ബ്' എന്നെഴുതിക്കൊണ്ടുള്ള ട്രോളാണ് താരം പങ്കുവെച്ചത്. വെല്‍ക്കം എന്ന ബോളിവുഡ് സിനിമയിലെ രംഗം ഉള്‍പ്പെടുത്തിക്കൊണ്ടുള്ള ട്രോൾ നയ്ബിന്റെ പരിക്ക് യഥാര്‍ഥമല്ല എന്ന് സൂചിപ്പിക്കുന്നത് കൂടിയാണ്. റാഷിദ് ഖാനുള്‍പ്പെടെ നിരവധി അഫ്ഗാന്‍ താരങ്ങള്‍ ഇതിന് കമന്റിട്ടുണ്ട്.  

കളിയുടെ 12-ാം ഓവറിലായിരുന്നു സംഭവം. ബംഗ്ലാദേശ് 81-7 എന്ന നിലയിലായിരുന്നു. ആ ഘട്ടത്തില്‍ ചെറിയ മഴ പെയ്യാനും തുടങ്ങി. പിന്നാലെ പരിശീലകന്‍ അഫ്ഗാന്‍ താരമായ നയ്ബിനോട് മത്സരം വൈകിപ്പിക്കാനുള്ള ആംഗ്യം കാണിച്ചു. ഗുല്‍ബാദിന്‍ നയ്ബ് പെട്ടെന്ന് തന്നെ പരിക്കുണ്ടെന്ന് പറഞ്ഞ് മൈതാനത്ത് കിടന്നു. ആ ഘട്ടത്തില്‍ ഡക്ക് വര്‍ത്ത് ലൂയിസ് നിയമപ്രകാരം അഫ്ഗാന്‍ 2 റണ്‍സിന് മുന്നിലായിരുന്നു. 83-ആയിരുന്നു പാര്‍ സ്‌കോര്‍. അടുത്ത പന്തില്‍ ബംഗ്ലാദേശ് ബൗണ്ടറി നേടിയാല്‍ പാര്‍ സ്‌കോറില്‍ ബംഗ്ലാദേശ് മുന്നിലെത്തും. അതിനാല്‍ കളി മന:പൂര്‍വ്വം വൈകിപ്പിച്ച് മത്സരം അനുകൂലമാക്കാനാണ് പരിശീലകന്‍ ജൊനാഥന്‍ ട്രോട്ട് ഇടപെട്ടത് എന്നാണ് ഉയരുന്ന ആരോപണം. 

ലോകകപ്പ് ചരിത്രത്തിലെ തന്നെ അഫ്ഗാന്റെ ആദ്യ സെമിപ്രവേശമാണിത്. ബംഗ്ലാദേശിനെ എട്ട് റണ്‍സിനാണ് അഫ്ഗാന്‍ കീഴടക്കിയത്. ആദ്യം ബാറ്റ് ചെയ്ത അഫ്ഗാന്‍ നിശ്ചിത 20-ഓവറില്‍ അഞ്ച് വിക്കറ്റ് നഷ്ടത്തില്‍ 115 റണ്‍സെടുത്തു.116 റണ്‍സെന്ന ലക്ഷ്യം 12.1 ഓവറില്‍ മറികടന്നാല്‍ ബംഗ്ലാദേശിന് സെമിയിലെത്താമായിരുന്നു. എന്നാല്‍ അത് സാധിച്ചില്ലെന്ന് മാത്രമല്ല ടീം പരാജയപ്പെടുകയും ചെയ്തു. മഴ മൂലം വിജയലക്ഷ്യം 19-ഓവറില്‍ 114 റണ്‍സാക്കിയിരുന്നു. എന്നാല്‍ ബംഗ്ലാദേശിനെ 105 റണ്‍സിന് പുറത്താക്കി അഫ്ഗാന്‍ സെമിയിലേക്ക് മുന്നേറി. 

Content Highlights: Gulbadin Naibs Injury Afghanistan Teammate Post