ലോകകപ്പ് വിജയത്തിന്റെ 40-ാം വാര്‍ഷികം ഇന്ത്യന്‍ ടീം ആഘോഷിച്ചത് ആകാശത്ത്
ഇന്ത്യയുടെ കായിക ചരിത്രം തന്നെ മാറ്റിമറിച്ച 1983 ലോകകപ്പ് വിജയത്തിന്റെ 40-ാം വാര്‍ഷികമാണ് ഞായറാഴ്ച. 1983 ജൂണ്‍ 25-ന് ക്രിക്കറ്റിന്റെ മെക്കയായ ലോര്‍ഡ്‌സില്‍ കരുത്തരായ വെസ്റ്റിന്‍ഡീസിനെ പരാജയപ്പെടുത്തിയായിരുന്നു കപില്‍ ദേവിന്റെയും സംഘത്തിന്റെയും കിരീടധാരണം. ഇന്ത്യയില്‍ ക്രിക്കറ്റിന്റെ വളര്‍ച്ചയ്ക്ക് വിത്തിട്ടത് ആ കിരീടനേട്ടമായിരുന്നു.
ആ വിശ്വവിജയത്തിന്റെ 40-ാം വാര്‍ഷികം ഇന്ത്യന്‍ സംഘം ആഘോഷിച്ചത് വ്യത്യസ്തമായിട്ടാണ്. ഇന്ത്യയുടെ ഇതിഹാസ താരങ്ങള്‍ ഇത്തവണ കിരീട നേട്ടത്തിന്റെ വാര്‍ഷികം ആഘോഷിച്ചത് 35,000 അടി ഉയരത്തില്‍ വിമാനത്തിനുള്ളിലായിരുന്നു.
അന്നത്തെ ടീം അംഗവും നിലവില്‍ രാഷ്ട്രീയ പ്രവര്‍ത്തകനും കൂടിയായ കീര്‍ത്തി ആസാദാണ് ട്വിറ്ററിലൂടെ ആഘോഷത്തിന്റെ വീഡിയോ ദൃശ്യങ്ങള്‍ പങ്കുവെച്ചിരിക്കുന്നത്. അദാനി ഗ്രൂപ്പ് സംഘടിപ്പിച്ച 'ജീതേംഗേ ഹം' എന്ന ക്യാമ്പയ്‌നിന്റെ ഭാഗമായിട്ടായിരുന്നു ഇന്ത്യന്‍ സംഘത്തിന്റെ യാത്ര.
സുനില്‍ ഗാവസ്‌ക്കര്‍, സയ്യിദ് കിര്‍മാണി, കെ. ശ്രീകാന്ത്, സന്ദീപ് പാട്ടീല്‍, ദിലീപ് വെങ്‌സാര്‍ക്കര്‍, ബല്‍വിന്ദര്‍ സിങ് സന്ധു, കീര്‍ത്തി ആസാദ്, ബിസിസിഐ പ്രസിഡന്റ് കൂടിയായ റോജര്‍ ബിന്നി, മദന്‍ ലാല്‍, സുനില്‍ വല്‍സന്‍, കപില്‍ ദേവ് തുടങ്ങിയവരെല്ലാം വിമാനത്തിലുണ്ടായിരുന്നു.
Content Highlights: 1983 World Cup-Winning India Legends Celebrate 40th Anniversary in flight