റിയാദിനെ ലക്ഷ്യമിട്ടെന്ന ഹൂതി അവകാശവാദം തെറ്റിദ്ധരിപ്പിക്കുന്നത്- സഖ്യസേനാ വക്താവ്

റിയാദ്: സൗദി തലസ്ഥാനമായ റിയാദിനെ ലക്ഷ്യമിട്ട് ആക്രമണം നടത്തിയെന്ന ഹൂതികളുടെ അവകാശവാദം തെറ്റിദ്ധരിപ്പിക്കുന്നതാണെന്ന് യെമനിലെ നിയമാനുസൃത സർക്കാരിനെ പിന്തുണയ്ക്കുന്ന സഖ്യസേന വ്യക്തമാക്കി. യുദ്ധമുഖങ്ങളിൽ കനത്ത തിരിച്ചടി നേരിടുന്ന ഹൂതികൾ പരാജയങ്ങൾ മറച്ചുവെക്കാൻ സാങ്കൽപ്പിക വിജയങ്ങൾ പ്രചരിപ്പിക്കുകയാണെന്ന് സഖ്യസേനാ വക്താവ് മേജർ ജനറൽ തുർക്കി അൽ മാലിക്കി പറഞ്ഞു.

യെമനിലെ തായിസിലും മറ്റു യുദ്ധമുഖങ്ങളിലും യെമൻ സായുധസേനയുടെയും ജനകീയ പ്രതിരോധസേനയുടെയും ആക്രമണങ്ങളിൽ ഹൂതികൾക്ക് വൻ ആൾനാശമാണ് സംഭവിക്കുന്നത്. ഈ സാഹചര്യത്തിലാണ് റിയാദിനെ ആക്രമിച്ചെന്ന തരത്തിലുള്ള അടിസ്ഥാനരഹിതമായ അവകാശവാദങ്ങളുമായി ഹൂതികൾ രംഗത്തെത്തിയതെന്ന് അൽ മാലിക്കി അശ്ശർഖുൽ ഔസത്ത് പത്രത്തോട് പറഞ്ഞു.

യുദ്ധരംഗത്തെ കനത്ത നഷ്ടങ്ങളിൽനിന്നും ഹൂതികളുടെ നടപടികൾക്കെതിരെ ജനങ്ങൾക്കിടയിൽ വർധിച്ചുവരുന്ന പ്രതിഷേധങ്ങളിൽനിന്നും ശ്രദ്ധ തിരിച്ചുവിടാനുള്ള ശ്രമമാണിതെന്നും അദ്ദേഹം കുറ്റപ്പെടുത്തി. വിദേശ ശക്തികളുടെ താത്പര്യങ്ങൾക്കനുസരിച്ചുള്ള ഹൂതികളുടെ പ്രവർത്തനങ്ങളാണ് യെമനെ അരാജകത്വത്തിലേക്കും നാശത്തിലേക്കും നയിച്ചതെന്നും അദ്ദേഹം ആരോപിച്ചു.

യെമന്റെ പടിഞ്ഞാറൻ തീരമേഖലയിൽ ആക്രമിച്ചുകയറിയ പ്രദേശങ്ങളിൽ ആധിപത്യം ഉറപ്പിക്കാനുള്ള ഹൂതികളുടെ ശ്രമങ്ങളെ സംയുക്ത യെമൻ സേന ചെറുക്കുന്നതിനിടെയാണ് റിയാദിനെ ലക്ഷ്യമിട്ടെന്ന അവകാശവാദവുമായി ഇറാൻ പിന്തുണയുള്ള ഹൂതി സംഘം രംഗത്തെത്തിയത്. യെമനിൽനിന്നുള്ള സമീപകാല റിപ്പോർട്ടുകൾ പ്രകാരം ഒരാഴ്ചയ്ക്കിടെ അയ്യായിരത്തോളം ഹൂതി പോരാളികൾ കൊല്ലപ്പെട്ടിട്ടുണ്ട്. ഹൂതികൾ ആക്രമണം നടത്തുന്ന വിവിധ യുദ്ധമുഖങ്ങളിൽ യെമൻ സായുധസേന ശക്തമായ വ്യോമ- കരസേനാ നടപടികൾ തുടരുകയാണ്.

അതേസമയം, ഹൂതികളുടെ സൈനിക കേന്ദ്രങ്ങൾക്കും നീക്കങ്ങൾക്കും സൈനിക ശേഷിക്കുമെതിരെ 257 കൃത്യതയാർന്ന സൈനിക നടപടികൾ നടത്തിയതായി യെമൻ സായുധസേന ശനിയാഴ്ച വൈകുന്നേരം അറിയിച്ചു. യുദ്ധവിമാനങ്ങൾ, ഡ്രോണുകൾ, പീരങ്കികൾ, മിസൈലുകൾ, റോക്കറ്റ് ലോഞ്ചറുകൾ എന്നിവ ഉപയോഗിച്ചായിരുന്നു ആക്രമണങ്ങൾ.

സനാ, മിദി, ബാഖിം എന്നിവിടങ്ങളിലും അൽ ജൗഫ്, മാരിബ്, അൽ ബൈദ, ലഹജ് തുടങ്ങിയ യുദ്ധമുഖങ്ങളിലുമാണ് സൈനിക നടപടികൾ നടന്നത്. തായിസ് മേഖലയായിരുന്നു പ്രധാനമായും കേന്ദ്രീകരിച്ചതെന്നും യെമൻ സായുധസേനയുടെ ഔദ്യോഗിക വക്താവ് കേണൽ മാജിദ് അൽ നുസൈലി വ്യക്തമാക്കി.

ഹൂതികളുടെ സൈനിക കമാൻഡ് ആൻഡ് കൺട്രോൾ കേന്ദ്രങ്ങൾ, പോരാളികളുടെ താവളങ്ങൾ, സൈനിക ശക്തിവർധനയ്ക്കായി എത്തിച്ച സംഘങ്ങൾ, കരുതൽ സേന, ആയുധ- വെടിക്കോപ്പ് സംഭരണശാലകൾ, സൈനിക വിതരണ പാതകൾ, യുദ്ധോപകരണങ്ങൾ എന്നിവയാണ് ആക്രമണങ്ങളിൽ ലക്ഷ്യമിട്ടതെന്നും അദ്ദേഹം അറിയിച്ചു.

Content Highlights: Major General Turki Al-Malki dismissed Houthi claims of targeting Riyadh as fabricated news.