അതിർത്തികൾക്കപ്പുറം മലയാളം..

:കേരളപ്പിറവി എന്നത് കേവലം ഒരു സംസ്ഥാനത്തിന്റെ ജന്മദിനാഘോഷമല്ല. ഒരു ഭാഷയുടെയും സംസ്കാരത്തിന്റെയും സാഹിത്യത്തിന്റെയും ചരിത്രത്തിന്റെയും ഓർമ പുതുക്കുന്ന ദിനം കൂടിയാണ്. ലോകത്തിന്റെ ഏതു കോണിലായിരുന്നാലും മലയാളം കേൾക്കുമ്പോൾ മനസിൽ തെളിയുന്ന നാടിന്റെ ചിത്രമുണ്ട്. ആ ചിത്രമാണ് മലയാളിയെ മലയാളിയാക്കുന്നത്. എന്നാൽ മാറുന്ന കാലത്ത് ആ ഭാഷയെയും സംസ്കാരത്തെയും അടുത്ത തലമുറയ്ക്ക് എങ്ങനെ കൈമാറാം എന്ന ചോദ്യം നാം ഗൗരവമായി ചിന്തിക്കേണ്ടതുണ്ട്.

കേരളത്തിന് പുറത്തുള്ള മലയാളി സമൂഹങ്ങൾ മലയാളഭാഷയുടെ നിലനിൽപ്പിനായി നടത്തുന്ന പ്രവർത്തനങ്ങൾ വിലപ്പെട്ടതാണ്. മലയാളി സംഘടനകൾ, വായനശാലകൾ, സാഹിത്യസമിതികൾ, സാംസ്‌കാരിക കൂട്ടായ്മകൾ, ഓണാഘോഷങ്ങൾ, കേരളപ്പിറവി ആഘോഷങ്ങൾ എന്നിവയിലൂടെ ഭാഷയും സംസ്‌കാരവും പുതിയ തലമുറയിലേക്ക് എത്തിക്കാൻ അവർ ശ്രമിക്കുന്നു.

എന്നാൽ ആഘോഷങ്ങൾക്കപ്പുറത്തേക്ക് നമ്മുടെ പ്രവർത്തനങ്ങൾ വളരേണ്ടതുണ്ട്. ഓരോ പ്രവാസി മലയാളി സംഘടനയ്ക്കും ഒരു ചെറിയ മലയാളം ലൈബ്രറി ഉണ്ടാകണം.

കുട്ടികൾക്കായി മലയാളം വായനാക്ലാസുകളും എഴുത്തുപരിശീലനവും സംഘടിപ്പിക്കണം. പ്രാദേശിക എഴുത്തുകാരെ പരിചയപ്പെടുത്തണം. യുവതലമുറയുടെ രചനകൾക്ക് അവസരം നൽകണം. മുതിർന്ന തലമുറയുടെ ഓർമകളും അനുഭവങ്ങളും രേഖപ്പെടുത്തണം. മലയാളത്തിലെ മികച്ച കൃതികൾ മറ്റു ഭാഷകളിലേക്ക് വിവർത്തനം ചെയ്യാനും മറ്റു ഭാഷകളിലെ മികച്ച സാഹിത്യങ്ങൾ മലയാളത്തിലേക്ക് എത്തിക്കാനും കൂട്ടായ ശ്രമങ്ങളുണ്ടാകണം.

കുട്ടികൾക്ക് വിദ്യാഭ്യാസം നൽകുന്നതിനൊപ്പം മനുഷ്യരെ മനസിലാക്കാനുള്ള ഹൃദയവും നാം വളർത്തണം. അവരിൽ മാതൃഭാഷയോടുള്ള അടുപ്പം വളർത്തിയെടുക്കേണ്ടതുണ്ട്. വീട്ടിൽ മലയാളം സംസാരിക്കുന്നതുകൊണ്ടുമാത്രം ഭാഷ നിലനിൽക്കില്ല.

മലയാളം വായിക്കാനും എഴുതാനും ആസ്വദിക്കാനും സൃഷ്ടിക്കാനും കുട്ടികൾക്ക് അവസരം ലഭിക്കണം. മലയാളത്തിലെ ബാലസാഹിത്യം, കവിതകൾ, കഥകൾ, നാടൻപാട്ടുകൾ, പഴഞ്ചൊല്ലുകൾ, ഐതിഹ്യങ്ങൾ, നാട്ടറിവുകൾ എന്നിവ കുട്ടികളിലേക്ക് എത്തിക്കണം. നമ്മുടെ നാടിന്റെ ചരിത്രവും കലകളും ആചാരങ്ങളും ഉത്സവങ്ങളും പ്രകൃതിയും പരിചയപ്പെടുത്തണം.

അതോടൊപ്പം കുട്ടികളെ മറ്റു ഭാഷകൾ പഠിക്കുന്നതിൽനിന്ന് ഒരിക്കലും പിന്തിരിപ്പിക്കരുത്. ഇംഗ്ലീഷും ഹിന്ദിയും മറ്റു ഇന്ത്യൻ ഭാഷകളും ലോകഭാഷകളും പഠിക്കട്ടെ. എന്നാൽ മറ്റു ഭാഷകൾ പഠിക്കുമ്പോൾ സ്വന്തം മാതൃഭാഷയെ മറക്കേണ്ടതില്ല.

മലയാള സാഹിത്യത്തിന്റെ വളർച്ചയ്ക്ക് പ്രവാസി എഴുത്തുകാർക്കും വിവർത്തകർക്കും വലിയ സാധ്യതകളുണ്ട്.

കേരളത്തിന് പുറത്തുള്ള ജീവിതാനുഭവങ്ങൾ, വിവിധ ഭാഷകളുടെയും സംസ്‌കാരങ്ങളുടെയും സമ്പർക്കം, പുതിയ സാമൂഹിക യാഥാർഥ്യങ്ങൾ എന്നിവ മലയാള സാഹിത്യത്തിന് പുതിയ വിഷയങ്ങളും കാഴ്ചപ്പാടുകളും നൽകും. മലയാളം നമ്മുടെ മാതൃഭാഷ മാത്രമല്ല; നമ്മുടെ ഓർമകളുടെയും അനുഭവങ്ങളുടെയും സ്വത്വത്തിന്റെയും അടയാളമാണ്. ആ അടയാളം തലമുറകളിലൂടെ മായാതെ നിലനിൽക്കട്ടെ.ഇന്ന് കേരളപ്പിറവി