ഇന്ത്യൻ സ്‌കൂൾ സോഷ്യൽ സയൻസ് ദിനം ആഘോഷിച്ചു
മനാമ: ഇന്ത്യൻ സ്‌കൂൾ സോഷ്യൽ സയൻസ് ദിനമായ 'സോഷ്യസ് 2026' ഒക്ടോബർ നാല് ഞായറാഴ്ച ജഷൻമാൽ ഓഡിറ്റോറിയത്തിൽ ആഘോഷിച്ചു. 'സുസ്ഥിരമായ സഹവർത്തിത്വം' എന്ന പ്രമേയം ആസ്പദമാക്കി, വിദ്യാർഥികൾക്ക് തങ്ങളുടെ അറിവും സർഗാത്മകതയും ആശയവിനിമയ ശേഷിയും പ്രകടിപ്പിക്കാനുള്ള മികച്ച വേദിയായി പരിപാടി മാറി.
ദേശീയ ഗാനാലാപനത്തോടെയാണ് പരിപാടി ആരംഭിച്ചത്. സ്‌കൂൾ അസിസ്റ്റന്റ് സെക്രട്ടറിയും അക്കാദമിക് അംഗവുമായ രഞ്ജിനി മോഹൻ ഭദ്രദീപം തെളിയിച്ച് പരിപാടി ഉദ്ഘാടനം ചെയ്തു. പ്രിൻസിപ്പൽ ശാന്ത കുമാർ ദസരി, സ്റ്റാഫ് പ്രതിനിധി പാർവതി ദേവദാസ്, സോഷ്യൽ സയൻസ് വിഭാഗം മേധാവി ഷെൻസി ജോർജ്, ഹെഡ് ടീച്ചർമാരായ ശ്രീകല നായർ, സലോന പയസ് എന്നിവരും അധ്യാപകരും വിദ്യാർഥികളും പരിപാടിയിൽ പങ്കെടുത്തു. അതിരുകൾക്കപ്പുറം നിലനിൽക്കുന്ന മൂല്യങ്ങളെക്കുറിച്ച് വേദ പതിശ്ശേരി പ്രചോദനാത്മകമായ പ്രസംഗം നടത്തി.
ഇന്ത്യയുടെ സമ്പന്നമായ സാംസ്‌കാരിക പൈതൃകത്തിലൂടെയുള്ള ഊർജസ്വലമായ ഒരു യാത്രയായിരുന്നു ഗ്രൂപ്പ് ഡാൻസ്. സന്നദ്ധപ്രവർത്തനത്തിന്റെ പ്രാധാന്യത്തെക്കുറിച്ച് ശശാങ്കിത് രൂപേഷ് അയ്യർ വിജ്ഞാനപ്രദമായ പ്രസംഗം നടത്തി. ആമില ഷാനവാസ്, ആലിയ ഷാനവാസ് എന്നിവർ ഗാന്ധിജിയുടെ പ്രിയപ്പെട്ട ഭജനുകൾ ഹൃദ്യമായി അവതരിപ്പിച്ചത് പരിപാടിക്ക് ഭക്തിനിർഭരമായ അന്തരീക്ഷം പകർന്നു.
പരിപാടിയുടെ വിജയത്തിനായി പ്രവർത്തിച്ച എല്ലാവർക്കും നന്ദി രേഖപ്പെടുത്തിക്കൊണ്ട് ശ്രിയ സുരേഷ് നന്ദി പ്രസംഗം നടത്തി. നിയ പോൾ സദസ്സിനെ സ്വാഗതം ചെയ്തു. ഗാന്ധിജിയുടെ പൈതൃകത്തോടുള്ള ആദരസൂചകമായി ചർക്ക നിർമാണം (മോഡൽ മേക്കിങ്), ആൽബം നിർമാണം എന്നിവയും സംഘടിപ്പിച്ചു.
ആഘോഷങ്ങളുടെ ഭാഗമായി, സമാധാനം, അഹിംസ, സത്യം, സാമൂഹിക ഐക്യം എന്നീ മഹത്തായ ആദർശങ്ങളെ അനുസ്മരിച്ചുകൊണ്ട് വിശിഷ്ടാതിഥികൾ മഹാത്മാഗാന്ധിയുടെ ചിത്രത്തിൽ പുഷ്പാർച്ചന നടത്തി. ഇന്ത്യയുടെ ചരിത്രം, സംസ്‌കാരം, സമൂഹം, ജനാധിപത്യ മൂല്യങ്ങൾ എന്നിവയുമായി അർഥവത്തായ രീതിയിൽ ഇടപഴകാൻ വിദ്യാർഥികളെ പ്രോത്സാഹിപ്പിക്കുന്ന തരത്തിലാണ് പ്രവർത്തനങ്ങൾ ആസൂത്രണം ചെയ്തിരുന്നത്. വിവിധ ക്ലാസുകളിലെ വിദ്യാർഥികൾക്കായി നിരവധി മത്സരങ്ങളും സംഘടിപ്പിച്ചിരുന്നു.
'സന്നദ്ധസേവനം- വ്യക്തികൾക്കും സമൂഹത്തിനുമുള്ള നേട്ടങ്ങൾ' എന്ന വിഷയത്തിൽ നടന്ന പ്രസംഗ മത്സരത്തിൽ പത്താം ക്ലാസിലെ 32 വിദ്യാർഥികൾ പങ്കെടുത്തു. 'ഇന്ത്യയുടെ സാംസ്‌കാരിക പൈതൃകം' എന്ന വിഷയത്തിൽ നടന്ന പോസ്റ്റർ നിർമാണ മത്സരത്തിൽ ഒമ്പതാം ക്ലാസിൽനിന്ന് 30 വിദ്യാർഥികൾ പങ്കെടുത്തു. ഗാന്ധിജിയുടെ കാലഘട്ടത്തെ ആസ്പദമാക്കി നടത്തിയ ക്വിസ് മത്സരത്തിൽ ആറ് മുതൽ എട്ട് വരെയുള്ള ക്ലാസുകളിൽനിന്ന് 272 വിദ്യാർഥികൾ പങ്കെടുത്തു. മോഡൽ നിർമാണ മത്സരത്തിൽ 45 വിദ്യാർഥികൾ പങ്കെടുത്തു.
വിദ്യാർത്ഥികളുടെയും അധ്യാപകരുടെയും മികച്ച പ്രവർത്തനങ്ങളെ സ്‌കൂൾ ചെയർമാൻ അഡ്വ. ബിനു മണ്ണിൽ വറുഗീസ്, സെക്രട്ടറി വി. രാജപാണ്ഡ്യൻ, അസിസ്റ്റന്റ് സെക്രട്ടറിയും അക്കാദമിക് അംഗവുമായ രഞ്ജിനി മോഹൻ, എക്‌സിക്യൂട്ടീവ് കമ്മിറ്റി അംഗങ്ങൾ, പ്രിൻസിപ്പൽ ശാന്ത കുമാർ ദസരി, അക്കാദമിക് അഡ്മിനിസ്‌ട്രേഷൻ വൈസ് പ്രിൻസിപ്പൽ രാജേഷ് നായർ എന്നിവർ അഭിനന്ദിച്ചു.
Content Highlights: Indian School Bahrain celebrated Social Science Day 'Socius 2026' under the theme 'Sustainable Coexistence'.