റംസാന് മുന്നോടിയായി വ്യവസായ മന്ത്രാലയം പരിശോധന വർധിപ്പിക്കും

മനാമ: വിശുദ്ധ റംസാൻ മാസത്തിനായുള്ള തയ്യാറെടുപ്പിനായി ഉപഭോക്തൃ ഉത്പന്നങ്ങളുടെ ലഭ്യത ഉറപ്പാക്കുന്നതിനും വില സ്ഥിരത നിലനിർത്തുന്നതിനുമായി കൂടുതൽ പരിശോധനകളും നിരീക്ഷണ ശ്രമങ്ങളും വ്യവസായ- വാണിജ്യ മന്ത്രാലയം പ്രഖ്യാപിച്ചു. മാർക്കറ്റുകളും കടകളും ഉൾക്കൊള്ളുന്ന വിപുലമായ ഫീൽഡ് പരിശോധനകൾക്കൊപ്പം വ്യാപാരികൾക്കും ഉപഭോക്താക്കൾക്കും വേണ്ടി മന്ത്രാലയം ബോധവത്കരണ കാംപെയ്‌നുകൾ നടപ്പാക്കും.

ലൈസൻസുള്ള പ്രവർത്തനങ്ങൾ, പ്രൊമോഷനുകളുടെയും കിഴിവുകളുടെയും സാധുത, ഓഫറുകൾക്ക് മുമ്പും ശേഷവുമുള്ള വില കൃത്യത, ഷെൽഫ് വിലകളും പോയിന്റ്- ഓഫ്- സെയിൽ സംവിധാനങ്ങളും തമ്മിലുള്ള സ്ഥിരത എന്നിവ പരിശോധിക്കും. വഞ്ചനയോ കൃത്രിമത്വമോ ഉണ്ടോ എന്നും മാർക്കറ്റ് സ്ഥിരതയെയും ഉപഭോക്താക്കളെയും സംരക്ഷിക്കുന്നതിനായി ഏതെങ്കിലും അന്യായമായ വില വർധനവ് പരിഹരിക്കുന്നതിനും അധികാരികൾ നിരീക്ഷിക്കും.

റംസാൻ മധ്യത്തിൽ പരിശോധന സന്ദർശനങ്ങൾ വർധിക്കും. ഭക്ഷണശാലകൾ, പഴം, പച്ചക്കറി കടകൾ, മാംസം, മത്സ്യം വിൽപ്പന കടകൾ, തയ്യൽ കടകൾ, സ്വർണ്ണക്കടകൾ, മധുരപലഹാര കടകൾ തുടങ്ങിയ ഉയർന്ന ഡിമാൻഡ് ഉള്ള ബിസിനസുകളിൽ ശ്രദ്ധ കേന്ദ്രീകരിച്ച് നിയന്ത്രണങ്ങൾ പാലിക്കുന്നുണ്ടെന്ന് ഉറപ്പാക്കും.

ഗുരുതരമായ ലംഘനങ്ങൾക്ക് പിഴ, അടച്ചുപൂട്ടൽ അല്ലെങ്കിൽ രജിസ്‌ട്രേഷൻ റദ്ദാക്കൽ, പബ്ലിക് പ്രോസിക്യൂഷന് റഫർ ചെയ്യൽ എന്നിവയ്ക്ക് കാരണമാകുമെന്ന് മന്ത്രാലയം വ്യക്തമാക്കി. നിയമലംഘനങ്ങൾ ശ്രദ്ധയിൽപ്പെട്ടാൽ നാഷണൽ സജഷൻസ് ആൻഡ് കംപ്ലയിന്റ്‌സ് സിസ്റ്റം (തവാസുൽ), വാട്ട്സ്ആപ്പ് (17111225) എന്നിവ വഴിയോ inspection@moic.gov.bh എന്ന ഇമെയിൽ വിലാസത്തിലോ റിപ്പോർട്ട് ചെയ്യാൻ ഉപഭോക്താക്കളോട് അധികൃതർ നിർദ്ദേശിച്ചു.

Content Highlights: Bahrain`s Industry Ministry boosts inspections for Ramadan, ensuring product availability & stable prices. Market checks, awareness campaigns, & strict enforcement to protect consumers from price gouging