ബഹ്റൈൻ കിരീടാവകാശി 'റോയൽ ബഹ്റൈൻ കോൺകൂർസ് 2026'ൽ പങ്കെടുത്തു

മനാമ: ബഹ്റൈൻ കിരീടാവകാശിയും പ്രധാനമന്ത്രിയുമായ പ്രിൻസ് സൽമാൻ ബിൻ ഹമദ് അൽ ഖലീഫ റോയൽ ഗോൾഫ് ക്ലബ്ബിൽ നടന്ന 'റോയൽ ബഹ്റൈൻ കോൺകൂർസ് 2026'ൽ പങ്കെടുത്തു. അന്താരാഷ്ട്ര കായിക മത്സരങ്ങളും വാഹനങ്ങളുമായി ബന്ധപ്പെട്ട പ്രത്യേക പരിപാടികളും സംഘടിപ്പിക്കുന്നതിൽ ബഹ്റൈൻ കൈവരിച്ച നേട്ടങ്ങൾ അദ്ദേഹം എടുത്തുപറഞ്ഞു. മുൻകാല വിജയങ്ങളുടെ അടിത്തറയിൽ മികവിന്റെ മേഖലകൾ കൂടുതൽ വിപുലീകരിക്കാനുള്ള രാജ്യത്തിന്റെ പ്രതിബദ്ധതയും അദ്ദേഹം ഊന്നിപ്പറഞ്ഞു.

മിഡിൽ ഈസ്റ്റിൽ ഫോർമുല വൺ മത്സരങ്ങൾ നടത്തുന്നതിലും രാജ്യത്തിന്റെ വൈദഗ്ധ്യവും ശേഷിയും മികച്ച സംഘാടന മികവും പ്രതിഫലിപ്പിക്കുന്ന വിവിധ പരിപാടികളും പ്രദർശനങ്ങളും സംഘടിപ്പിക്കുന്നതിലും ബഹ്റൈൻ വഹിക്കുന്ന നേതൃപരമായ പങ്കിനെ അദ്ദേഹം പ്രശംസിച്ചു.

രാജാവ് ഹമദ് ബിൻ ഈസ അൽ ഖലീഫയുടെ നേതൃത്വത്തിൽ ബഹ്റൈൻ നടപ്പാക്കുന്ന സമഗ്ര വികസന പദ്ധതികളുടെ ഭാഗമായി അന്താരാഷ്ട്ര തലത്തിലെ അഭിമാനകരമായ പരിപാടികൾക്ക് ആതിഥേയത്വം വഹിക്കാൻ രാജ്യത്തിന് കഴിയുന്നതിന്റെ തെളിവാണ് ഈ നേട്ടങ്ങളെന്ന് അദ്ദേഹം പറഞ്ഞു.

രാജ്യത്തിന്റെ ടൂറിസം മേഖല വികസിപ്പിക്കേണ്ടതിന്റെയും ദേശീയ സമ്പദ്വ്യവസ്ഥയിലേക്കുള്ള ഈ മേഖലയുടെ സംഭാവന വർധിപ്പിക്കേണ്ടതിന്റെയും പ്രാധാന്യവും അദ്ദേഹം ചൂണ്ടിക്കാട്ടി. ലോകമെമ്പാടുമുള്ള സന്ദർശകർക്ക് ആകർഷകമായ കേന്ദ്രമായി ബഹ്റൈനെ മാറ്റാൻ ഇത്തരം പ്രവർത്തനങ്ങൾ സഹായിക്കുമെന്നും അദ്ദേഹം പറഞ്ഞു.

'റോയൽ ബഹ്റൈൻ കോൺകൂർസ് 2026' പോലുള്ള പ്രധാന അന്താരാഷ്ട്ര പരിപാടികൾക്ക് ആതിഥേയത്വം വഹിക്കുന്നത് ആഗോള പരിപാടികളുടെ പ്രധാന കേന്ദ്രമെന്ന നിലയിൽ ബഹ്റൈന്റെ സ്ഥാനം കൂടുതൽ ഉറപ്പിക്കുന്നു. രാജ്യത്തിന്റെ സാംസ്കാരിക വൈവിധ്യവും സമ്പന്നമായ പൈതൃകവും ലോകത്തിന് മുന്നിൽ അവതരിപ്പിക്കാനും ഇത്തരം പരിപാടികൾ അവസരമൊരുക്കുന്നു.

വാഹനങ്ങളുടെ ചരിത്രവും പരിണാമവും അവയുടെ ചരിത്രപരവും സാംസ്കാരികവുമായ പ്രാധാന്യവും ആഘോഷിക്കുന്ന 'കോൺകൂർസ്' ബഹ്റൈനിലെ പരിപാടികളുടെ പട്ടികയിലേക്ക് മികച്ചൊരു കൂട്ടിച്ചേർക്കലാണെന്ന് കിരീടാവകാശി അഭിപ്രായപ്പെട്ടു.

ബഹ്റൈൻ പൗരന്മാർ കൈവരിച്ച നേട്ടങ്ങൾ അവരുടെ അചഞ്ചലമായ നിശ്ചയദാർഢ്യത്തിന്റെ ഫലമാണെന്നും അത് രാജ്യത്തോടുള്ള കൂറും മികവിനോടുള്ള പ്രതിബദ്ധതയും പ്രതിഫലിപ്പിക്കുന്നുവെന്നും അദ്ദേഹം പറഞ്ഞു. ജനങ്ങളുടെ കഴിവുകളിൽ വിശ്വാസമർപ്പിക്കുന്ന രാജ്യങ്ങൾ കൂടുതൽ നേതൃത്വത്തിലേക്കും വിജയത്തിലേക്കും ആത്മവിശ്വാസത്തോടെ മുന്നേറുമെന്നും ഇത്തരം നേട്ടങ്ങൾ വിവിധ മേഖലകളിൽ രാജ്യത്തിന്റെ സ്ഥാനം ശക്തിപ്പെടുത്തുമെന്നും അദ്ദേഹം കൂട്ടിച്ചേർത്തു.

ആഡംബര വാഹനപ്രേമികളുടെ പ്രധാന സംഗമവേദിയായ 'റോയൽ ബഹ്റൈൻ കോൺകൂർസ് 2026' ക്ലാസിക് വാഹന പൈതൃകത്തെയും ആധുനിക നവീകരണങ്ങളെയും ഒരുമിപ്പിക്കുന്നു. അപൂർവവും സവിശേഷവുമായ ക്ലാസിക്, പൈതൃക, ആധുനിക വാഹനങ്ങളുടെ ശേഖരമാണ് പരിപാടിയിൽ പ്രദർശിപ്പിക്കുന്നത്. പ്രമുഖ കാർ ശേഖരണക്കാരെയും വാഹനപ്രേമികളെയും അന്താരാഷ്ട്ര തലത്തിലെ മുൻനിര വാഹന നിർമാതാക്കളെയും പരിപാടി ഒരുമിപ്പിക്കുന്നു.

ലോകത്തിലെ ഏറ്റവും ആഡംബരപൂർണവും അപൂർവവുമായ എഴുപതോളം കാറുകൾ മത്സരത്തിൽ പങ്കെടുക്കുന്നുണ്ട്. കൂടാതെ, 'റോയൽ ബഹ്റൈൻ കോൺകൂർസ് ക്ലബ്ബി'ൽ നിന്നുള്ള നൂറിലധികം വാഹനങ്ങളും പ്രദർശിപ്പിക്കുന്നുണ്ട്.

ഷെയ്ഖ് മുഹമ്മദ് ബിൻ സൽമാൻ ബിൻ ഹമദ് അൽ ഖലീഫ, ധനകാര്യ-ദേശീയ സമ്പദ്വ്യവസ്ഥാ മന്ത്രി ഷെയ്ഖ് സൽമാൻ ബിൻ ഖലീഫ അൽ ഖലീഫ എന്നിവരും മറ്റ് ഉന്നത ഉദ്യോഗസ്ഥരും പരിപാടിയിൽ പങ്കെടുത്തു.

Content Highlights: The event brought together international car collectors and enthusiasts, featuring around 70 rare luxury cars competing and more than 100 vehicles from the Royal Bahrain Concours Club on display.