പ്രതിഭാ വികസനത്തിലും സ്വകാര്യമേഖലയ്ക്കുള്ള പിന്തുണയിലും സഹകരണം ;ചർച്ച നടത്തി ചേംബർ ഓഫ് കൊമേഴ്സ്
മനാമ :ബഹ്റൈൻ ചേംബർ ഓഫ് കൊമേഴ്സ് ആൻഡ് ഇൻഡസ്ട്രി ചെയർമാൻ നബീൽ ഖാലിദ് കാനൂ, ഉന്നത വിദ്യാഭ്യാസ കൗൺസിൽ സെക്രട്ടറി ജനറലും ഇൻസ്റ്റിറ്റ്യൂട്ട് ഓഫ് പബ്ലിക് അഡ്മിനിസ്ട്രേഷൻ ഡയറക്ടർ ജനറലുമായ ഡോ. ശൈഖ റാന ബിൻത് ഈസ അൽ ഖലീഫയെ സ്വീകരിച്ചു. വിദ്യാഭ്യാസം, പരിശീലനം, മാനവ വിഭവശേഷി വികസനം എന്നീ മേഖലകളിലെ സംയുക്ത സഹകരണത്തിനുള്ള സാധ്യതകളെക്കുറിച്ചും ചർച്ച ചെയ്തു.അതുപോലെ ദേശീയ തൊഴിൽ സേനയുടെ ശേഷി വർദ്ധിപ്പിക്കുകയും ചേംബർ അംഗങ്ങൾക്കും സ്വകാര്യ മേഖലയിലെ സ്ഥാപനങ്ങൾക്കും പരമാവധി പ്രയോജനം ലഭിക്കുന്ന തരത്തിലുള്ള പദ്ധതികളും പരിപാടികളും മുന്നോട്ട് കൊണ്ടുപോകാനുള്ള വഴികൾ എന്നിവയും കൂടിക്കാഴ്ചയിൽ ചർച്ചാവിഷയമായി. സ്വകാര്യ മേഖലയും വിദ്യാഭ്യാസ-പരിശീലന സ്ഥാപനങ്ങളും തമ്മിലുള്ള പങ്കാളിത്തം ശക്തിപ്പെടുത്തേണ്ടതിന്റെ പ്രാധാന്യം കാനൂ ഊന്നിപ്പറഞ്ഞു.
തൊഴിൽ വിപണിയുടെ ആവശ്യങ്ങൾക്കനുസൃതമായി വിദ്യാഭ്യാസ-പരിശീലന പരിപാടികൾ ക്രമീകരിക്കുന്നതിനും, മാനേജ്മെന്റ്-നേതൃത്വ ശേഷികൾ വികസിപ്പിക്കുന്നതിനും, ബിസിനസ്സ് രംഗത്തെയും വിവിധ സാമ്പത്തിക മേഖലകളിലെയും ദ്രുതഗതിയിലുള്ള മാറ്റങ്ങൾക്കൊപ്പം സഞ്ചരിക്കാൻ പ്രാപ്തിയുള്ള ഒരു ദേശീയ തൊഴിൽ സേനയെ ഒരുക്കുന്നതിനും ഇത്തരം പങ്കാളിത്തങ്ങൾ സഹായിക്കുന്നു.
സ്വകാര്യ മേഖലയുടെ മത്സരക്ഷമത വർദ്ധിപ്പിക്കുന്നതിനും സുസ്ഥിരമായ വളർച്ച ഉറപ്പാക്കുന്നതിനും മാനവ വിഭവശേഷി വികസനം ഒരു അടിസ്ഥാന ഘടകമാണെന്ന് അദ്ദേഹം ചൂണ്ടിക്കാട്ടി. പ്രത്യേക പരിശീലന പരിപാടികളിലൂടെയും സംരംഭങ്ങളിലൂടെയും സ്വകാര്യ മേഖലയിലെ ഉദ്യോഗസ്ഥരെയും നേതൃനിരയെയും വികസിപ്പിക്കാനാണ് ബഹ്റൈൻ ചേംബർ ഓഫ് കൊമേഴ്സ് ആൻഡ് ഇൻഡസ്ട്രിയും ഇൻസ്റ്റിറ്റ്യൂട്ട് ഓഫ് പബ്ലിക് അഡ്മിനിസ്ട്രേഷനും തമ്മിലുള്ള സഹകരണം ലക്ഷ്യമിടുന്നത്. മാനേജ്മെന്റ്-നേതൃത്വ ശേഷി വർദ്ധിപ്പിക്കുക, നൂതനാശയങ്ങൾ പ്രോത്സാഹിപ്പിക്കുക, പ്രകടനം മെച്ചപ്പെടുത്തുക എന്നിവയിലൂടെ സ്വകാര്യ മേഖലയിലെ സ്ഥാപനങ്ങളുടെ മത്സരക്ഷമത വർദ്ധിപ്പിക്കാനും ബഹ്റൈൻ രാജ്യത്തിന്റെ സാമ്പത്തിക വികസന ലക്ഷ്യങ്ങൾക്ക് സംഭാവന നൽകാനും ഈ ശ്രമങ്ങൾ സഹായിക്കുന്നു.
ബഹ്റൈൻ ചേംബർ, ഉന്നത വിദ്യാഭ്യാസ കൗൺസിൽ, ഇൻസ്റ്റിറ്റ്യൂട്ട് ഓഫ് പബ്ലിക് അഡ്മിനിസ്ട്രേഷൻ എന്നിവയുടെ പങ്കാളിത്തത്തോടെയുള്ള സംയുക്ത സംരംഭങ്ങളും പദ്ധതികളും വികസിപ്പിക്കുന്നതിനും വൈദഗ്ധ്യം കൈമാറുന്നതിനുമുള്ള സാധ്യതകളും യോഗം പരിശോധിച്ചു. വിദ്യാഭ്യാസം, പരിശീലനം, തൊഴിൽ വിപണിയുടെ ആവശ്യങ്ങൾ എന്നിവ തമ്മിലുള്ള ഏകോപനം ശക്തിപ്പെടുത്തുക, ശേഷി വികസന പരിപാടികളിൽ സ്വകാര്യ മേഖലയുടെ പങ്കാളിത്തം വർദ്ധിപ്പിക്കുക, ദേശീയ തലത്തിലുള്ള പ്രതിഭകളെ വളർത്തുക, ബഹ്റൈൻ രാജ്യത്തിന്റെ സുസ്ഥിര സാമ്പത്തിക വികസന യാത്രയെ പിന്തുണയ്ക്കുക എന്നിവയാണ് ഈ ശ്രമങ്ങളുടെ ലക്ഷ്യം.
Content Highlights: Bahrain Chamber Chairman Nabeel Khalid Kanoo met with Dr. Shaikha Rana bint Isa Al Khalifa., Discussed cooperation in education, training, and human resources development., Focused on enhancing the national workforce's capabilities to meet labor market needs., Emphasized strengthening public-private partnerships for sustainable economic growth in Bahrain.