വന്യജീവി വന്നാൽ ഇനി മൊബൈലിൽ അലാറം

റാന്നി : നിർമിതബുദ്ധി(എ.ഐ.) അധിഷ്ഠിതമായ ക്യാമറയിൽ വന്യജീവി പതിഞ്ഞാൽ അലാറം മുഴങ്ങും. വിവിധതരത്തിലുള്ള ശബ്ദമായിരിക്കും വരിക. ക്യാമറയിൽനിന്നുള്ള ഇൻഫ്രാറെഡ് രശ്മികൾ വന്യജീവികളുടെമേൽ പതിക്കുമ്പോൾ നാട്ടുകാരുടെയും വനപാലകരുടെയും മൊബൈൽഫോണുകളിൽ വന്യജീവി എത്തിയ ലൊക്കേഷനടക്കം സന്ദേശവും ലഭിക്കും.റേഞ്ച് ഓഫീസിൽ സ്ഥാപിക്കുന്ന കംപ്യൂട്ടറിൽ ഇതിന്റെ വീഡിയോയും ലഭിക്കും. വനപാലകർക്ക് സ്ഥലം തിരിച്ചറിയാനും അവിടെ എത്താനും ഇത് സഹായകരമാവും.

വടശ്ശേരിക്കര ഒളികല്ലിൽ രണ്ടും കോടമലയിൽ ഒരുക്യാമറയും സ്ഥാപിച്ചു. ഒരുയൂണിറ്റിന് 3.15 ലക്ഷം രൂപയാണ് ചെലവ്. നബാർഡിന്റെ ഇന്നവേറ്റീവ് പ്രൊജക്ട് ആയി അനുവദിച്ച 10 ലക്ഷം രൂപ ഉപയോഗിച്ചാണ് ഇവ സ്ഥാപിച്ചത്.

വന്യജീവിശല്യത്തിൽനിന്ന് ജനങ്ങളെയും കൃഷിയെയും സംരക്ഷിക്കുന്നതിനായി ലഭ്യമായ എല്ലാ മാർഗങ്ങളും പ്രയോജനപ്പെടുത്തുമെന്ന് പഴകുളം മധു എം.എൽ.എ. പറഞ്ഞു.റാന്നി ഫോറസ്റ്റ് ഡിവിഷന്റെ നേതൃത്വത്തിൽ നബാർഡ് ധനസഹായത്തോടെ സ്ഥാപിച്ച ക്യാമറ സംവിധാനത്തിന്റെ ഉദ്ഘാടനം നിർവഹിക്കുകയായിരുന്നു അദ്ദേഹം. സോളാർ ഫെൻസിങ്, ഇലക്ട്രിക് ഫെൻസിങ്, ട്രഞ്ച് തുടങ്ങിയ പ്രതിരോധമാർഗങ്ങൾ പൂർണതോതിൽ വിജയിക്കാത്തതുകൊണ്ടാണ് എ.ഐ. സംവിധാനം പരീക്ഷിക്കുന്നത്.

ലൈറ്റും ശബ്ദവും മാറിമാറി പുറപ്പെടുവിക്കുന്ന ഈ നവീന സാങ്കേതികവിദ്യ വിജയിച്ചാൽ റാന്നി മണ്ഡലത്തിൽ വ്യാപകമായി സ്ഥാപിക്കുമെന്ന് അദ്ദേഹം പറഞ്ഞു. വിവിധസ്ഥലങ്ങളിൽ പ്രതിരോധസംവിധാനങ്ങൾ ഒരുക്കിയിട്ടും വന്യജീവികളുടെ സാന്നിധ്യം പൂർണമായും ഒഴിവാക്കാൻ കഴിയാത്ത സാഹചര്യമാണ് നിലവിലുള്ളതെന്നും എം.എൽ.എ. പറഞ്ഞു.

വടശ്ശേരിക്കര ഗ്രാമപ്പഞ്ചായത്ത് പ്രസിഡന്റ് ഉഷാ കേശവൻ അധ്യക്ഷതവഹിച്ചു. റാന്നി ഡി.എഫ്.ഒ. എൻ.രാജേഷ്, റേഞ്ച് ഓഫീസർമാരായ ജി.എസ്. രഞ്ജിത്ത്, വി.എസ്. ശുഹൈബ്, ജില്ലാ പഞ്ചായത്ത് സ്റ്റാൻഡിങ് കമ്മിറ്റി ചെയർപേഴ്‌സൺ ജൂലി സാബു, അനൂപ് സ്റ്റീഫൻ, സ്വപ്ന സൂസൻ, സാലി മാത്യു, ലിജു ജോർജ്, മണിയാർ രാധാകൃഷ്ണൻ, അജേഷ് മണപ്പാട്ട് തുടങ്ങിയവർ പ്രസംഗിച്ചു. വന്യജീവികളുടെ സാന്നിധ്യം മുൻകൂട്ടി തിരിച്ചറിയാനും പ്രദേശവാസികൾക്ക് സമയബന്ധിതമായി മുന്നറിയിപ്പ് നൽകാനും പുതിയ സാങ്കേതികവിദ്യയിലൂടെ സാധിക്കുമെന്ന പ്രതീക്ഷയാണുള്ളതെന്ന് വനപാലകർ പറഞ്ഞു.