മൂന്ന് മാധ്യമങ്ങൾക്ക് വിലക്കേർപ്പെടുത്തി ട്രംപ്; കവറേജ് നിർത്തിവെക്കുന്നതായി യു.എസ്. മാധ്യമങ്ങൾ

വാഷിങ്‌ടൺ: പ്രമുഖ വാർത്താ മാധ്യമങ്ങളായ സി.എൻ.എൻ., എം.എസ്. നൗ, പൊളിറ്റിക്കോ എന്നിവയ്ക്ക് വൈറ്റ് ഹൗസിൽ പ്രവേശനവിലക്ക് ഏർപ്പെടുത്തിയ പ്രസിഡന്റ് ഡൊണാൾഡ് ട്രംപിന്റെ നടപടിയിൽ പ്രതിഷേധം. സംഭവത്തിന് പിന്നാലെ ട്രംപിന്റെ ഔദ്യോഗിക പരിപാടികളുടെ സംപ്രേഷണം താത്ക്കാലികമായി നിർത്തിവെക്കാൻ പ്രമുഖ യു.എസ്. ടിവി നെറ്റ്‌വർക്കുകൾ തീരുമാനിച്ചു.

സി.എൻ.എൻ., എ.ബി.സി. ന്യൂസ്, സി.ബി.എസ്. ന്യൂസ്, എൻ.ബി.സി. ന്യൂസ്, ഫോക്സ് ന്യൂസ് എന്നീ അഞ്ച് മുൻനിര നെറ്റ്‌വർക്കുകൾ ചേർന്നുള്ള 'വൈറ്റ് ഹൗസ് പൂൾ' സംപ്രേഷണമാണ് നിർത്തിവെച്ചത്. 'വ്യാജവാർത്തകൾ' പ്രചരിപ്പിക്കുന്നു എന്ന് ആരോപിച്ചാണ് ട്രംപ് മൂന്ന് മാധ്യമസ്ഥാപനങ്ങൾക്കും അവയിലെ മാധ്യമപ്രവർത്തകർക്കും വൈറ്റ് ഹൗസിലേക്ക് വിലക്കേർപ്പെടുത്തിയത്.

വൈറ്റ് ഹൗസിന്റെ നടപടി മാധ്യമസ്വാതന്ത്ര്യത്തിന്മേലുള്ള കടന്നുകയറ്റമാണെന്ന് ചൂണ്ടിക്കാട്ടി സി.എൻ.എൻ., എം.എസ്. നൗ, പൊളിറ്റിക്കോ എന്നീ സ്ഥാപനങ്ങൾ ട്രംപ് ഭരണകൂടത്തിനെതിരെ അമേരിക്കൻ ഫെഡറൽ കോടതിയെ സമീപിച്ചിട്ടുണ്ട്.

പ്രസിഡന്റിന്റെ പൊതുപരിപാടികളുടെ ദൃശ്യങ്ങൾ പകർത്തി മറ്റ് എല്ലാ മാധ്യമങ്ങൾക്കും പങ്കുവെക്കുന്ന സംവിധാനമാണ് ടിവി പൂൾ കവറേജ്. പ്രധാനപ്പെട്ട അഞ്ച് നെറ്റ്‌വർക്കുകൾ മാറിമാറിയാണ് ഈ ചുമതല വഹിക്കാറുള്ളത്. തിങ്കളാഴ്ച പൂൾ കവറേജിന്റെ ചുമതല സി.എൻ.എന്നിനായിരുന്നു. എന്നാൽ സി.എൻ.എൻ. സംഘത്തെ വൈറ്റ് ഹൗസിൽ പ്രവേശിക്കാൻ അനുവദിക്കാതിരുന്നതോടെ മറ്റ് മാധ്യമങ്ങളും പ്രക്ഷേപണം ബഹിഷ്കരിക്കാൻ തീരുമാനിക്കുകയായിരുന്നു.

"സ്വതന്ത്രവും കൃത്യവുമായ വിവരങ്ങൾ അറിയാൻ പൊതുജനങ്ങൾക്ക് അവകാശമുണ്ട്. തങ്ങൾക്ക് താൽപ്പര്യമില്ലാത്ത വാർത്തകൾ നൽകുന്നു എന്ന കാരണത്താൽ ഒരു ഭരണകൂടത്തിനും മാധ്യമങ്ങളെ വിലക്കാൻ അധികാരമില്ല," എന്ന് ടിവി നെറ്റ്‌വർക്കുകൾ സംയുക്ത പ്രസ്താവനയിൽ വ്യക്തമാക്കി.

ഐക്യരാഷ്ട്രസഭയുടെ പൊതുസഭാ സമ്മേളനത്തിൽ പങ്കെടുക്കാൻ ട്രംപ് ന്യൂയോർക്കിലേക്ക് തിരിച്ച ഘട്ടത്തിലാണ് ഇത്തരത്തിൽ ഒരു തീരുമാനത്തിലെത്തുന്നത് എന്നതും ശ്രദ്ധേയമാണ്. 

Content Highlights: President Donald Trump banned CNN, MSN, and Politico from the White House., Five major US TV networks jointly suspended White House pool coverage in protest., Media outlets filed a lawsuit in US Federal Court citing violation of press freedom., The boycott affected coverage of Trump's trip to the UN General Assembly in New York.