‘ക്യൂബയുടെ കാര്യം ഞാൻ നോക്കിക്കൊള്ളാം, ആ രാജ്യം അതിന്റെ അന്ത്യനാളുകളിലാണ്’ - ട്രംപ്

ഫ്‌ളോറിഡ: ക്യൂബയിലെ കമ്യൂണിസ്റ്റ് ഭരണകൂടം ഉടൻ തകരുമെന്ന അവകാശവാദവുമായി അമേരിക്കൻ പ്രസിഡന്റ് ഡൊണാൾഡ് ട്രംപ്. ഫ്‌ളോറിഡയിൽ നടന്ന ഉച്ചകോടിയിൽ സംസാരിക്കവെ, ലാറ്റിൻ അമേരിക്കൻ രാജ്യമായ ക്യൂബ അതിന്റെ അന്ത്യഘട്ടത്തിലാണെന്നും വലിയ രാഷ്ട്രീയ മാറ്റങ്ങൾ അവിടെ സംഭവിക്കുമെന്നും അദ്ദേഹം അവകാശപ്പെട്ടു. ശനിയാഴ്ച ക്യൂബ ഒഴികെയുള്ള അമേരിക്കൻ സഖ്യകക്ഷികൾ പങ്കെടുത്ത ഉച്ചകോടിയിൽ സംസാരിക്കവെയായിരുന്നു ട്രംപിന്റെ ഈ പ്രസ്താവനകൾ.

'ക്യൂബയുടെ കാര്യം ഞാൻ നോക്കിക്കൊള്ളാം. അവരുടെ കൈവശം പണമില്ല, എണ്ണയില്ല. അവരുടേത് മോശം തത്വശാസ്ത്രമാണ്, വളരെക്കാലമായി മോശമായി തുടരുന്ന ഒരു മോശം ഭരണകൂടമാണ് അവരുടേത്. ക്യൂബ അതിന്റെ അവസാന നിമിഷങ്ങളിലാണ്.' ഫ്‌ളോറിഡയിലെ ലാറ്റിൻ അമേരിക്കൻ ഉച്ചകോടിയിൽ പന്ത്രണ്ടോളം നേതാക്കളോടായി ട്രംപ് പറഞ്ഞു.

നിലവിൽ അനുഭവപ്പെടുന്ന ഇന്ധനക്ഷാമവും സാമ്പത്തിക പ്രതിസന്ധിയും ക്യൂബയെ തളർത്തുന്നതായും അമേരിക്കൻ സമ്മർദ്ദം ഇതിന് ആക്കം കൂട്ടിയതായും റിപ്പോർട്ടുകളുണ്ട്. അമേരിക്കൻ വംശജരായ ക്യൂബക്കാർക്ക് വൈകാതെ സ്വന്തം നാട്ടിലേക്ക് മടങ്ങാൻ സാധിക്കുമെന്ന് ട്രംപ് ശുഭാപ്തിവിശ്വാസം പ്രകടിപ്പിച്ചു. ദീർഘകാലമായി നിലനിൽക്കുന്ന അമേരിക്ക-ക്യൂബ നയതന്ത്ര ബന്ധത്തിലെ പുതിയ അധ്യായമായാണ് ഈ നീക്കങ്ങൾ വിലയിരുത്തപ്പെടുന്നത്.

വ്യാഴാഴ്ച വൈറ്റ് ഹൗസിൽ വെച്ചും ട്രംപ് സമാനമായ പ്രസ്താവനകൾ നടത്തിയിരുന്നു. ഇറാനുമായുള്ള നിലവിലെ സംഘർഷത്തിന് ശേഷം തന്റെ ഭരണകൂടത്തിന്റെ അടുത്ത ശ്രദ്ധ ക്യൂബയിലായിരിക്കുമെന്ന് അദ്ദേഹം സൂചിപ്പിച്ചിരുന്നു. അമേരിക്കൻ ക്യൂബക്കാർ തങ്ങളുടെ മാതൃരാജ്യത്തേക്ക് മടങ്ങുന്നത് വെറും 'സമയത്തിന്റെ പ്രശ്‌നം' മാത്രമാണെന്നാണ് അന്ന് ട്രംപ് പറഞ്ഞത്. അമേരിക്കയുടെ ശക്തമായ സമ്മർദ്ദം ക്യൂബയെ തകർച്ചയുടെ വക്കിലെത്തിച്ചിട്ടുണ്ട്.

ബുധനാഴ്ച പടിഞ്ഞാറൻ ക്യൂബയുടെ മിക്ക ഭാഗങ്ങളിലും ഉണ്ടായ വ്യാപകമായ ബ്ലാക്ക്ഔട്ട് വർദ്ധിച്ചുവരുന്ന ഊർജ്ജ പ്രതിസന്ധിയെയാണ് സൂചിപ്പിക്കുന്നത്. ഇന്ധന ഇറക്കുമതി നിയന്ത്രിക്കുകയും ക്ഷാമം രൂക്ഷമാക്കുകയും ചെയ്ത അമേരിക്കയുടെ ഇന്ധന ഉപരോധമാണ് ഈ സാഹചര്യം വഷളാക്കിയത്.

വിശകലന വിദഗ്ധരെ ഉദ്ധരിച്ച് 'ദ ഹിൽ' റിപ്പോർട്ട് ചെയ്യുന്നത് പ്രകാരം, ക്യൂബയുടെ ശേഷിക്കുന്ന ഇന്ധനശേഖരം മാർച്ച് പകുതിയോടെയോ അവസാനത്തോടെയോ തീർന്നുപോയേക്കാം. ഇത് ക്യൂബയുടെ സമ്പദ്‌വ്യവസ്ഥയെ പൂർണ്ണമായും നിശ്ചലമാക്കിയേക്കാം. ക്യൂബൻ ഉദ്യോഗസ്ഥരുമായുള്ള ചർച്ചകൾക്ക് നേതൃത്വം നൽകാൻ ട്രംപ് റൂബിയോയെയാണ് ചുമതലപ്പെടുത്തിയിരിക്കുന്നത്. കൂടാതെ ക്യൂബയെ 'സൗഹൃദപരമായി' ഏറ്റെടുക്കുന്നതിനെ കുറിച്ചും അദ്ദേഹം സൂചിപ്പിച്ചിരുന്നു.

സാമ്പത്തിക പരിഷ്‌കാരങ്ങൾ, പ്രാദേശിക മുൻഗണനകളിലെ സഹകരണം, അമേരിക്കയെ എതിർക്കുന്ന രാജ്യങ്ങളുമായുള്ള ബന്ധം കുറയ്ക്കൽ എന്നിവയുൾപ്പെടെ സ്വന്തം നിലനിൽപ്പിനായുള്ള വിവിധ വഴികൾ ക്യൂബൻ നേതാക്കൾ ആലോചിക്കുന്നതായാണ് റിപ്പോർട്ട്. 1959-ൽ ഫിഡൽ കാസ്‌ട്രോ അധികാരം ഏറ്റെടുക്കുകയും ഏകകക്ഷി ഭരണം സ്ഥാപിക്കുകയും ചെയ്തത് മുതൽ അമേരിക്കയും ക്യൂബയും തമ്മിൽ നല്ല ബന്ധമല്ല ഉള്ളത്.

Content Highlights: President Trump claims Cuba is in its final stages due to economic failure. US fuel blockade has triggered a severe energy crisis in Cuba. Potential for economic reforms or regime change under US pressure. Rubio tasked with leading diplomatic talks regarding Cuba's future.