തോന്നുന്നതെന്തും പ്രസിഡന്റിന് ചെയ്യാൻ കഴിയില്ല- നീൽ കത്യാൽ; ട്രംപിനെ തോൽപിച്ച ഇന്ത്യൻ അഭിഭാഷകൻ

വാഷിങ്ടൺ: യുഎസ് പ്രസിഡന്റ് ഡൊണാൾഡ് ട്രംപിന്റെ അധികത്തീരുവയ്‌ക്കെതിരെ സുപ്രീം കോടതിയിൽ വാദിച്ചു ജയിച്ചത് ഇന്ത്യൻ വംശജനായ അഭിഭാഷകൻ നീൽ കത്യാൽ. തോന്നുന്നതെന്തും ചെയ്യാൻ പ്രസിഡന്റിനു കഴിയില്ലെന്നും വ്യക്തികളേക്കാൾ മുകളിലാണ് ഭരണഘടനയെന്നും നീൽ പറയുന്നു. ട്രംപ് നിയമിച്ച ജഡ്ജിമാരിൽ രണ്ടുപേർ തങ്ങൾക്കനുകൂലമായി വോട്ടുചെയ്തത് വിധിയിൽ നിർണായകമായെന്നും അദ്ദേഹം പറഞ്ഞു.

'മൊത്തം ഒമ്പത് ജഡ്ജിമാരിൽ, ഇത്തരം ഉന്നത പ്രൊഫൈൽ കേസുകളിൽ പലപ്പോഴും 5-4 വരെ എന്ന അനുപാതത്തിലാണ് വോട്ട് വരാറ്. എന്നാൽ തീരുവ കേസിൽ ഇത് 6-3 എന്ന അനുപാതത്തിലായിരുന്നു. ട്രംപിനെതിരായി വോട്ട് ചെയ്ത ആറുപേരിൽ രണ്ടുപേർ ട്രംപ് തന്നെ നിയമിച്ച ജഡ്ജിമാരാണ്.' നീൽ സിഎൻഎൻ-ന് നൽകിയ അഭിമുഖത്തിൽ പറഞ്ഞു.

മുൻ ആക്ടിങ്‌ സോളിസിറ്റർ ജനറൽ കൂടിയായ നീൽ താരിഫുകളെ ചോദ്യം ചെയ്ത ചെറുകിടക്കാരെയാണ് പ്രതിനിധീകരിച്ചത്. ഭരണകൂടത്തിന്റെ നിയമപരമായ സമീപനം കേസിനെ ദുർബലപ്പെടുത്തിയതായി അദ്ദേഹം വ്യക്തമാക്കി. 'ഞാനാണ് പ്രസിഡന്റ്, എനിക്കെന്തും ചെയ്യാൻ കഴിയും എന്ന അസംബന്ധമായ ചിന്തയ്ക്കുപകരം ഭരണഘടനാപരമായി പ്രവർത്തിക്കുകയായിരുന്നു ട്രംപ് ചെയ്യേണ്ടിയിരുന്നത്.' അദ്ദേഹം പറഞ്ഞു.

'സുപ്രീം കോടതിയിൽ യുഎസ് പ്രസിഡന്റിനെതിരെ കേസ് ജയിക്കാൻ വളരെ ബുദ്ധിമുട്ടാണ്. എന്നാൽ, പ്രസിഡന്റ് അങ്ങേയറ്റം തീവ്രമായ നിലപാടുകളാണ് എടുത്തിരുന്നത്. അതു ഞങ്ങൾക്ക് ഗുണകരമായി. ഒരൊറ്റ കാര്യത്തിൽ മാത്രമാണ് ഞങ്ങൾ ശ്രദ്ധ കേന്ദ്രീകരിച്ചത് - ഭരണഘടനയിൽ.'  പ്രസിഡൻഷ്യൽ അധികാരത്തിന്മേലുള്ള ഭരണഘടനയുടെ അധികാരത്തെ നിർവചിക്കുന്ന അംഗീകാരമെന്നാണ് നീൽ ഈ വിധിയെ വിശേഷിപ്പിച്ചത്.

'യുണൈറ്റഡ് സ്റ്റേറ്റ്‌സ് സുപ്രീം കോടതി നിയമവാഴ്ചയ്ക്കും എല്ലാ അമേരിക്കക്കാർക്കും വേണ്ടി നിലകൊണ്ടു. അതിന്റെ സന്ദേശം ലളിതമായിരുന്നു: പ്രസിഡന്റുമാർ ശക്തരാണ്, പക്ഷേ നമ്മുടെ ഭരണഘടന അതിലും ശക്തമാണ്. അമേരിക്കയിൽ, അമേരിക്കൻ ജനങ്ങൾക്ക് നികുതി ചുമത്താൻ കോൺഗ്രസിന് മാത്രമേ കഴിയൂ.' അദ്ദേഹം പറഞ്ഞു.

'ഈ കേസ് പ്രസിഡൻസിയെക്കുറിച്ചായിരുന്നു, അല്ലാതെ ഏതെങ്കിലും ഒരു പ്രത്യേക പ്രസിഡന്റിനെക്കുറിച്ചല്ല. ഇത് എപ്പോഴും അധികാര വിഭജനത്തെക്കുറിച്ചായിരുന്നു, അല്ലാതെ ഒരു പ്രത്യേക സന്ദർഭത്തിലെ രാഷ്ട്രീയത്തെക്കുറിച്ചല്ല.' അദ്ദേഹം പറഞ്ഞു. ചെറുകിടക്കാരും ലിബർട്ടി ജസ്റ്റിസ് സെന്ററിന്റെ പിന്തുണയുമുള്ള ഈ കേസ്, അടിയന്തര സാമ്പത്തിക ശക്തികളുടെ കീഴിൽ നികുതികൾ ന്യായീകരിക്കപ്പെടുന്നു എന്ന ട്രംപിന്റെ വാദത്തെയാണ് ചോദ്യം ചെയ്തത്.

'സ്വയം തിരുത്തുന്ന ഒരു സംവിധാനം എന്ന ആശയം നമുക്ക് തരുന്ന അറിവ് ഇതാണ്; നിങ്ങളായിരിക്കാം ലോകത്തിലെ ഏറ്റവും ശക്തനായ വ്യക്തി, പക്ഷേ, നിങ്ങൾക്ക് ഭരണഘടനയെ ലംഘിക്കാൻ കഴിയില്ല. ഇതാണ് ഇന്ന് തെളിയിക്കപ്പെട്ടിരിക്കുന്നത്.' അദ്ദേഹം പറഞ്ഞു.

ഇന്ത്യയിൽനിന്നുള്ള കുടിയേറ്റക്കാരുടെ മകനായ നീൽ കത്യാൽ ചിക്കാഗോയിലാണ് ജനിച്ചത്. സുപ്രീം കോടതിക്ക് മുമ്പാകെ 50-ലധികം കേസുകൾ വാദിച്ചിട്ടുണ്ട്. കൂടാതെ യുഎസ് മുൻ പ്രസിഡന്റ് ബരാക് ഒബാമയുടെ കീഴിൽ യുഎസ് സർക്കാരിന്റെ മുൻനിര കോടതി അഭിഭാഷകനായി സേവനമനുഷ്ഠിച്ചിട്ടുണ്ട്. അദ്ദേഹം നിലവിൽ മിൽബാങ്ക് എൽഎൽപിയിൽ പങ്കാളിയും ജോർജ്ടൗൺ യൂണിവേഴ്‌സിറ്റിയിൽ നിയമ പ്രൊഫസറുമാണ്.

Content Highlights: Indian-origin lawyer Neal Katyal successfully argued against Trump`s tariffs at the Supreme Court. Learn how the ruling affirmed constitutional limits on presidential power.