ഹവായി ദ്വീപില്‍ സക്കര്‍ബര്‍ഗിനായി കൂറ്റന്‍ ഭൂഗര്‍ഭ ബങ്കര്‍ നിർമിക്കുന്നു; 5,000 ചതുരശ്രയടി വിസ്തീർണം

ന്യൂയോർക്ക്: മെറ്റാ സി.ഇ.ഒ മാർക്ക് സക്കർബർ​ഗ് ഹവായി ദ്വീപായ കവായിയിൽ വലിയൊരു ഭൂ​ഗർഭ ബങ്കർ നിർമിക്കുന്നതായി റിപ്പോർട്ടുകൾ. 5,000 ചതുരശ്ര അടി വിസ്തീർണത്തിലാണ് ബങ്കർ നിർമിക്കുന്നത്. ഓസ്ട്രേലിയൻ മാധ്യമമായ ന്യൂസ് ഡോട്ട്കോം ഡോട്ട് എ.യു ആണ് വാർത്ത പുറത്തുവിട്ടിരിക്കുന്നത്. സക്കർബർ​ഗ് നിർമിക്കുന്ന ആഢംബര എസ്റ്റേറ്റിന്റെ ഭാ​ഗമായാണ് ബങ്കർ നിർമിക്കുന്നതെന്നാണ് വിവരം. 

260 മില്യൺ ഡോളർ (ഏകദേശം 2000 കോടി രൂപ) ചിലവിലാണ് അദ്ദേഹത്തിന്റെ എസ്റ്റേറ്റിൽ നിർമാണം പുരോ​ഗമിക്കുന്നതെന്നാണ് റിപ്പോർട്ടുകൾ പറയുന്നത്. എന്നാൽ, വിഷയവുമായി ബന്ധപ്പെട്ട് സക്കർബർ​ഗ് ഇതുവരെ പ്രതികരിച്ചിട്ടില്ല. സംഭവത്തെക്കുറിച്ച് പുറത്തുപറയരുതെന്ന കർശന നിർദേശം സക്കർബർ​ഗിന്റെ ഭാ​ഗത്ത് നിന്നും ജോലിക്കാർക്കുമുണ്ട്. 

സാമൂഹ്യമാധ്യമങ്ങളിൽ ഇതേക്കുറിച്ച് പോസ്റ്റ് ചെയ്തതുമായി ബന്ധപ്പെട്ട് നിർമാണത്തൊഴിലാളികളിൽ ചിലരെ പറഞ്ഞ് വിട്ടതായി നേരത്തെ റിപ്പോർട്ടുകളുണ്ടായിരുന്നു. ചിത്രമെടുക്കാൻ പോലും തൊഴിലാളികൾക്ക് അനുവാദമില്ലെന്നാണ് വിവരം. 

2014 ആ​ഗസ്റ്റിലാണ് സക്കർബർ​ഗ് 1,400 ഏക്കറിൽ വ്യാപിച്ചുകിടക്കുന്ന എസ്റ്റേറ്റ് സ്വന്തമാക്കിയത്. 2016-ൽ കുടുംബത്തോടൊപ്പം നിൽക്കുന്ന ചില ചിത്രങ്ങളും അദ്ദേഹം പങ്കുവച്ചിരുന്നു.

Content Highlights: Mark Zuckerberg Building Massive Underground Bunker On Hawaiian Island