ഇസ്രായേൽ തിരഞ്ഞെടുപ്പിൽ ആർക്കും കേവല ഭൂരിപക്ഷമുണ്ടാകില്ലെന്ന് എക്സിറ്റ് പോൾ ഫലങ്ങൾ

ടെൽ അവീവ്: ഇസ്രായേൽ പാർലമെന്റ് തിരഞ്ഞെടുപ്പിൽ ഒരു മുന്നണിക്കും കേവലഭൂരിപക്ഷം ലഭിക്കില്ലെന്ന് എക്സിറ്റ് പോൾ ഫലങ്ങൾ. പ്രധാനമന്ത്രി ബെഞ്ചമിൻ നെതന്യാഹുവിന്റെ ലിക്യുഡ് പാർട്ടി ഏറ്റവും വലിയ ഒറ്റക്കക്ഷിയാകുമെങ്കിലും, ഭരണം പിടിക്കാൻ ആവശ്യമായ സീറ്റുകൾ സമാഹരിക്കുന്നതിൽ നെതന്യാഹുവിന്റെ സഖ്യവും പ്രതിപക്ഷ മുന്നണിയും ഒരുപോലെ പരാജയപ്പെടുമെന്നാണ് പ്രവചനം.

ചാനൽ 12, ചാനൽ 13, പബ്ലിക് ബ്രോഡ്കാസ്റ്ററായ കാൻ (Kan) എന്നിവ പുറത്തുവിട്ട എക്സിറ്റ് പോളുകളിലാണ് ഇസ്രായേൽ വീണ്ടും രാഷ്ട്രീയ അനിശ്ചിതത്വത്തിലേക്ക് നീങ്ങുമെന്ന സൂചന നൽകുന്നത്. 24 മുതൽ 25 വരെ സീറ്റുകൾ നേടി നെതന്യാഹുവിന്റെ ലിക്യുഡ് (Likud) പാർട്ടി ഏറ്റവും വലിയ ഒറ്റക്കക്ഷിയായേക്കും.എന്നാൽ ഗാഡി ഐസൻകോട്ട് നയിക്കുന്ന മധ്യവർഗ്ഗ പാർട്ടിയായ 'യാഷാർ' (Yashar) 21 മുതൽ 23 വരെ സീറ്റുകളും പ്രവചിക്കപ്പെടുന്നുണ്ട്.ഈ ഇഞ്ചോടിഞ്ച് ഫലങ്ങൾ വന്നാൽ നെതന്യാഹു വിരുദ്ധ പ്രതിപക്ഷ സഖ്യത്തിന് 52 മുതൽ 53 സീറ്റുകൾ വരെ ലഭിക്കുമ്പോൾ , നെതന്യാഹുവിനെ പിന്തുണയ്ക്കുന്ന വലതുപക്ഷ മുന്നണിക്ക് 50 സീറ്റുകൾ മാത്രമേ ലഭിക്കൂ.120 അംഗങ്ങളുള്ള നെസറ്റിൽ (Knesset) സർക്കാർ രൂപീകരിക്കാൻ 61 സീറ്റുകളുടെ പിന്തുണ വേണം. നിലവിലെ സാഹചര്യത്തിൽ ഇരുപക്ഷത്തിനും ഇത് തികയ്ക്കാനാവില്ല.ഒരു മുന്നണിക്കും സഖ്യമുണ്ടാക്കാൻ സാധിച്ചില്ലെങ്കിൽ ഇസ്രായേൽ വീണ്ടും മറ്റൊരു തിരഞ്ഞെടുപ്പിലേക്ക് നീങ്ങും. 2019-2022 കാലയളവിൽ അഞ്ച് തവണയാണ് ഇസ്രായേലിൽ പൊതുതിരഞ്ഞെടുപ്പ് നടന്നത്. പുതിയ സർക്കാർ അധികാരമേൽക്കുന്നത് വരെ നെതന്യാഹു തന്നെയാകും താൽക്കാലിക പ്രധാനമന്ത്രിയായി തുടരുക. ഔദ്യോഗിക വോട്ടെണ്ണൽ പുരോഗമിക്കുകയാണ്.

Content Highlights: Exit polls indicate no coalition will secure a clear majority in the Israeli parliament., Benjamin Netanyahu's Likud party is projected to be the largest single party., Both the right-wing bloc and the anti-Netanyahu opposition fall short of the 61-seat majority required in the 120-member Knesset., Israel faces potential political deadlock and the possibility of repeat elections.