ഇറാനിൽ ഇൻറർനെറ്റ് നിരോധനം ശക്തം, രഹസ്യമായി വിതരണമൊരുക്കി നിഗൂഢശൃംഖല

ടെഹ്റാൻ: ഇറാറിൽ ഇൻറർനെറ്റ് സാങ്കേതികവിദ്യ നിയമവിരുദ്ധമായി തുടരുകയാണെന്നാണ് മാധ്യമ റിപ്പോർട്ടുകൾ നൽകുന്ന സൂചന. അതേസമയം രാജ്യത്തിനകത്തേക്ക് ഒരു നിഗൂഢശൃംഖല ആഗോള ഇന്റർനെറ്റ് സേവനങ്ങൾ ഒളിച്ചുകടത്തുന്നതായി റിപ്പോർട്ടുകളുണ്ട്. ഇറാനിൽ ഇന്റർനെറ്റ് ഏതാണ്ട് നിരോധിക്കപ്പെട്ടിരിക്കുന്ന സ്ഥിതിയാണ്. ജനുവരിയിൽ രാജ്യവ്യാപകമായ പ്രക്ഷോഭത്തിനിടെയാണ് അധികാരികൾ ഇന്റർനെറ്റ് നിരോധിച്ചത്. ഫെബ്രുവരിയിൽ യുഎസും ഇസ്രയേലും രാജ്യത്ത് ആക്രമണം നടത്തിയതിനെത്തുടർന്ന് നിരോധനം ശക്തിപ്പെടുത്തി.

തുടർച്ചയായുള്ള നിരോധനം ജനങ്ങൾക്കിടയിൽ ഇന്റർനെറ്റിനുള്ള ആവശ്യകത സൃഷ്ടിച്ചു. തുടർന്ന് നിഗൂഢ ശൃംഖല ഇറാനിലേക്ക് സാറ്റലൈറ്റ് വഴി ഇന്റർനെറ്റ് സേവനങ്ങൾ അനധികൃതമായി എത്തിച്ചുതുടങ്ങി. രാജ്യത്തെ ചില ഗ്രൂപ്പുകൾ സ്റ്റാർലിങ്ക് ഉപകരണങ്ങൾ രാജ്യത്തേക്ക് രഹസ്യമായി കടത്തുന്നുണ്ട്. ഇറാനിലേക്ക് അയയ്ക്കുന്ന സ്റ്റാർലിങ്ക് ഉപകരണങ്ങൾ ഇന്റർനെറ്റ് നിരോധനം മറികടക്കുന്നതിനുള്ള ഏറ്റവും ഫലപ്രദമായ മാർഗ്ഗങ്ങളിൽ ഒന്നാണ്, ഇത് അധികാരികളുടെ കർശന നിരീക്ഷണത്തിൽ നിന്ന് ഒഴിവാകാൻ ഉപയോക്താക്കളെ സഹായിക്കുന്നുണ്ട്. ഒരേ സമയം പലർക്കും ഒരു ടെർമിനലുമായി ബന്ധിപ്പിക്കാൻ കഴിയുമെന്ന് ഇതുമായി ബന്ധപ്പെട്ട ഒരു വ്യക്തി ബിബിസിയോട് പറഞ്ഞു,

2025 ൽ, സ്റ്റാർലിങ്ക് ഉപകരണങ്ങൾ ഉപയോഗിക്കുകയോ വാങ്ങുകയോ വിൽക്കുകയോ ചെയ്യുന്നത് നിയമവിരുദ്ധമാക്കുന്ന ഒരു നിയമം ഇറാൻ പാസാക്കി. പിടിക്കപ്പെട്ടാൽ രണ്ട് വർഷം വരെ ജയിൽ ശിക്ഷ ലഭിക്കാൻ സാധ്യതയുണ്ട്. 10 യൂണിറ്റിൽ കൂടുതൽ ഉപകരണങ്ങൾ ഇറക്കുമതി ചെയ്യുന്നതിനും വിതരണം ചെയ്യുന്നതിനും 10 വർഷം ജയിൽ ശിക്ഷയുണ്ട്. ഇറാനിയൻ സർക്കാർ മാധ്യമങ്ങൾ റിപ്പോർട്ട് ചെയ്തതനുസരിച്ച് രണ്ട് വിദേശ പൗരന്മാർ ഉൾപ്പെടെ നാല് പേരെ സാറ്റലൈറ്റ് ഇന്റർനെറ്റ് ഉപകരണങ്ങൾ ഇറക്കുമതി ചെയ്തതിന് ഏപ്രിൽ മാസത്തിൽ അറസ്റ്റ് ചെയ്തു. ഇതുവരെ നിരവധി അറസ്റ്റുകൾ നടന്നിട്ടുണ്ട്. ഒരു ഡിജിറ്റൽ അവകാശ ഗ്രൂപ്പ് നൽകുന്ന കണക്കനുസരിച്ച്, സ്റ്റാർലിങ്ക് ടെർമിനലുകൾ കൈവശം വെച്ചതിന് ഏകദേശം 100 പേരെ അറസ്റ്റ് ചെയ്തു.

ജനുവരിയിലെ കണക്കനുസരിച്ച് ഇറാനിൽ കുറഞ്ഞത് 50,000 സ്റ്റാർലിങ്ക് ഉപകരണങ്ങളെങ്കിലും ഉണ്ടെന്നും ഇത് വർദ്ധിക്കുമെന്നും മനുഷ്യാവകാശ സംഘടനയായ വിറ്റ്നസ് പറയുന്നു. പേർഷ്യൻ ഭാഷയിലുള്ള പബ്ലിക് ടെലിഗ്രാം ചാനലായ നാസ്നെറ്റ് (NasNet) ലെ ഒരു സന്നദ്ധപ്രവർത്തകൻ പറയുന്നത് കഴിഞ്ഞ രണ്ടര വർഷത്തിനിടെ ഏകദേശം 5,000 സ്റ്റാർലിങ്ക് ടെർമിനലുകൾ ഈ ചാനൽ വഴി വിറ്റുവെന്നാണ്.

ഈ പ്രവർത്തനങ്ങൾക്ക് വിദേശത്ത് താമസിക്കുന്ന ഇറാനികളും യുദ്ധം തകർത്ത രാജ്യത്തെ ജനങ്ങളെ സഹായിക്കാൻ ആഗ്രഹിക്കുന്നവരും ധനസഹായം നൽകുന്നുണ്ടെന്നാണ് റിപ്പോർട്ട്. ഇതിൽ സ്റ്റാർലിങ്ക് ടെർമിനലുകളുടെ വാങ്ങലും ഉൾപ്പെടുന്നു. ആഗോള ശൃംഖല വഴി അന്താരാഷ്ട്ര തലത്തിൽ വിവരങ്ങൾ പങ്കുവെക്കുമെന്ന് വിശ്വാസമുള്ള ആളുകൾക്ക് ടെർമിനലുകൾ അയയ്ക്കുന്നു. "ഗ്രൗണ്ടിൽ എന്താണ് സംഭവിക്കുന്നതെന്ന് പങ്കുവെക്കാൻ ആളുകൾക്ക് ഇന്റർനെറ്റ് ആവശ്യമാണ്, ഈ ടെർമിനലുകൾ യഥാർത്ഥത്തിൽ മാറ്റം വരുത്താൻ ആവശ്യമുള്ളവരുടെ കയ്യിൽ ആയിരിക്കണമെന്ന് ഞങ്ങൾ കരുതുന്നു." ഈ വിതരണശൃംഖലയിലെ ഒരാൾ ബിബിസിയോട് പ്രതികരിച്ചു.

Content Highlights: Iran has banned Starlink equipment with penalties of up to 10 years in prison., Despite the 2025 law, an underground network continues to smuggle satellite terminals into the country., Over 50,000 Starlink devices are estimated to be active in Iran as of January 2025., Digital rights groups and volunteers are funding and distributing hardware to bypass state-imposed internet censorship.