കക്ഷി ചേരാനില്ല, പക്ഷം പിടിക്കാനില്ല; ഇന്ത്യ-ചൈന ബന്ധത്തില്‍ നയം വ്യക്തമാക്കി ദിസനായകെ

കൊളംബോ: വിദേശ നയത്തില്‍ നിലപാട്‌ വ്യക്തമാക്കി ശ്രീലങ്കൻ പ്രസിഡന്റ് അനുര കുമാര ദിസനായകെ. ഇന്ത്യക്കും ചൈനയ്ക്കും ഇടയിൽ 'സാന്‍ഡ്‌വിച്ച്‌' ആകാനില്ലെന്ന് ദിസനായകെ പറഞ്ഞു. അയൽരാജ്യങ്ങളുമായി സമതുലിതമായ ബന്ധം വളർത്തിയെടുക്കാനാണ് ശ്രമിക്കുന്നതെന്നും അദ്ദേഹം വ്യക്തമാക്കി. മൊണോക്കിൾ മാസികയ്ക്ക് നൽകിയ അഭിമുഖത്തിലായിരുന്നു പ്രതികരണം. 

ആ​ഗോള ശത്രുതയിലേക്ക് വലിച്ചിടുന്നതിൽ നിന്നും ശ്രീലങ്ക മാറിനിൽക്കുമെന്നും അദ്ദേഹം പറഞ്ഞു. രാജ്യത്തിന്റെ ശക്തി നോക്കാതെ ഇന്ത്യയോടും ചൈനയോടും സര്‍ക്കാരിന് ഒരേ ബന്ധമായിരിക്കും. ഏതെങ്കിലും ഒരു രാജ്യവുമായി കൂടുതല്‍ അടുപ്പത്തിനുമില്ല-ദിസനായകെ പറഞ്ഞു

ഇരു രാജ്യങ്ങളും മൂല്യമേറിയ സുഹൃത്തുക്കളാണ്. ഇന്ത്യയും ചൈനയുമായി അടുത്ത ബന്ധം പുലർത്താനാണ് സർക്കാർ ആ​ഗ്രഹിക്കുന്നത്. കൂടാതെ, യൂറോപ്യൻ യൂണിയൻ, മധ്യപൂർവേഷ്യ, ആഫ്രിക്ക തുടങ്ങിയവയായും നല്ല ബന്ധം ആ​ഗ്രഹിക്കുന്നുവെന്നും അദ്ദേഹം കൂട്ടിച്ചേർത്തു. 

തിങ്കളാഴ്ചയായിരുന്നു ശ്രീലങ്കയുടെ ഒൻപതാം പ്രസിഡന്റായി മാർക്സിസ്റ്റ് നേതാവ് അനുര കുമാര ദിസനായകെ സത്യപ്രതിജ്ഞചെയ്ത് അധികാരമേറ്റത്. ശനിയാഴ്ച നടന്ന പ്രസിഡന്റ് തിരഞ്ഞെടുപ്പിൽ 42.31 ശതമാനം വോട്ടുനേടിയായിരുന്നു അദ്ദേഹത്തിന്റെ വിജയം. 

Content Highlights: Dont want to be sandwiched between China and India,Anura Kumara Dissanayake