എപ്‌സ്റ്റീനെക്കുറിച്ച് ഭാര്യ സംശയാലുവായിരുന്നു; ജീവനക്കാരോട് മാപ്പുപറഞ്ഞ് ബിൽഗേറ്റ്സ്

ന്യൂയോർക്ക്: ലൈംഗിക കുറ്റവാളി ജെഫ്രി എപ്‌സ്റ്റീനുമായുണ്ടായിരുന്ന ബന്ധത്തിന്‍റെപേരിൽ ഗേറ്റ്സ് ഫൗണ്ടേഷനിലെ ജീവനക്കാരോട് സ്ഥാപകൻ ബിൽ ഗേറ്റ്സ് മാപ്പുപറഞ്ഞു. നിയമവിരുദ്ധമായി ഒന്നും ചെയ്തിട്ടില്ലെന്നും പറഞ്ഞു. എപ്‌സ്റ്റീനുമായി ബിൽ ഗേറ്റ്സിനു ബന്ധമുണ്ടായിരുന്നു എന്ന വിവരം ഗേറ്റ്സ് ഫൗണ്ടേഷനുമേൽ നിഴൽവീഴ്ത്തിയ സാഹചര്യത്തിലാണ് മാപ്പുപറച്ചിൽ.

രണ്ട് റഷ്യൻ സ്ത്രീകളുമായി ബന്ധമുണ്ടായിരുന്നുവെന്ന് ഗേറ്റ്സ് സമ്മതിച്ചു. എന്നാൽ, എപ്‌സ്റ്റീൻ ഇരകളാക്കിയ പെൺകുട്ടികളുമായി ബന്ധമുണ്ടായിട്ടില്ലെന്നു പറഞ്ഞു. “ഞാൻ ചെയ്ത തെറ്റുകാരണം ഇതിലേക്കു വലിച്ചിഴയ്ക്കപ്പെട്ട മറ്റുള്ളവരോട് മാപ്പു പറയുന്നു. എപ്‌സ്റ്റീനുമൊത്ത് സമയം ചെലവിട്ടത് തെറ്റായിപ്പോയി” -ബിൽ ഗേറ്റ്സ് പറഞ്ഞു.

2011-ലാണ് എപ്‌സ്റ്റീനെ പരിചയപ്പെട്ടത്. അന്ന് തന്റെ ഭാര്യയായിരുന്ന മെലിൻഡ എപ്‌സ്റ്റീനെക്കുറിച്ച് സംശയാലുവായിരുന്നുവെന്നും ഗേറ്റ്സ് പറഞ്ഞു. യു.എസ്. സർക്കാരിന്റെ എപ്‌സ്റ്റീൻ രേഖകളിൽ യുവതികൾക്കൊപ്പം നിൽക്കുന്ന ബിൽ ഗേറ്റ്സിന്റെ ചിത്രവുമുണ്ടായിരുന്നു. ഇത് എപ്‌സ്റ്റീന്റെ നിർദേശപ്രകാരം എടുത്തതാണെന്നും എപ്സ്റ്റീന്റെ കുപ്രസിദ്ധമായ ദ്വീപ് സന്ദർശിച്ചിട്ടില്ലെന്നും ഗേറ്റ്സ് പറഞ്ഞു.

Content Highlights: Bill Gates formally apologized to Gates Foundation staff for his association with Jeffrey Epstein., He admitted that spending time with Epstein was a mistake., Gates denied any illegal activities or involvement with Epstein's victims., He clarified that he never visited Epstein's infamous private island.