നുഴഞ്ഞുകയറ്റക്കാര് ഇല്ലെന്ന് തിരഞ്ഞെടുപ്പ് കമ്മിഷന്, ഉണ്ടെന്ന് ബിജെപി; ബിഹാറില് പഴയ തന്ത്രം പയറ്റി മോദിയും ഷായും
പടിവാതില്ക്കലെത്തി നില്ക്കുന്ന ബിഹാര് നിയമസഭാ തിരഞ്ഞെടുപ്പ് ഇത്തവണ അത്ര എളുപ്പമാവില്ലെന്ന തിരിച്ചറിവുണ്ട് എന്.ഡി.എയ്ക്കും ബിജെപിക്കും. നിതീഷ് കുമാര് എന്ന രാഷ്ട്രീയ ബിംബത്തെ മുന്നില് നിര്ത്തിയായിരുന്നു കഴിഞ്ഞ തവണയൊക്കെ അവര് തിരഞ്ഞെടുപ്പിനെ നേരിട്ടിരുന്നതെങ്കിലും ഭരണവിരുദ്ധ വികാരം വേണ്ടുവോളം നിലനില്ക്കുന്നുണ്ട് സംസ്ഥാനത്ത്. ഇതിനൊപ്പം വോട്ടുകൊള്ള ആരോപണത്തില് പ്രതിപക്ഷ നേതാവ് രാഹുല്ഗാന്ധി നയിച്ച പ്രചാരണയാത്ര കാര്യമായി സ്വാധീനമുണ്ടാക്കുകയും ചെയ്തിട്ടുണ്ടെന്നാണ് എന്ഡിഎ ക്യാമ്പിന്റെ വിലയിരുത്തല്. ഇതോടെ നേരത്തെ ഝാര്ഖണ്ഡില് പരീക്ഷിച്ച അനധികൃത നുഴഞ്ഞുകയറ്റമെന്ന വിഷയത്തിലൂന്നി പ്രചാരണം കടുപ്പിക്കാനുള്ള തീരുമാനത്തിലാണ് പ്രധാനമന്ത്രി നരേന്ദ്ര മോദിയും ആഭ്യന്തരമന്ത്രി അമിത് ഷായും.
എന്ഡിഎ ക്യാമ്പ് മുഖ്യമന്ത്രി സ്ഥാനാര്ഥിയായി നിതീഷ്കുമാറിനെ തന്നെയാണ് ഇത്തവണയും ഉയർത്തിക്കാട്ടുന്നത അതിന് പകരംവെക്കാന് മറ്റൊരു നേതാവിനെ കാണിക്കാനില്ലാത്തത് കൊണ്ടാണ്. ഇതോടെ ഭരണവിരുദ്ധ വികാരം മറികടക്കാന് മോദി തന്നെ താരപ്രചാരകരായി എത്തുമെന്നും ഉറപ്പായിട്ടുണ്ട്. ഇതിന് മുന്നോടിയാണ് ബിഹാറിലെ 75 ലക്ഷം സ്ത്രീകള്ക്ക് പതിനായിരം രൂപ വീതം നല്കുന്ന മഹിള റോസ്ഗര് യോജന പദ്ധതി വീഡിയോ കോണ്ഫറന്സിലൂടെ പ്രധാനമന്ത്രി ഉദ്ഘാടനം ചെയ്തത്. ഒപ്പം തിരഞ്ഞെടുപ്പ് പ്രചാരണം ബിഹാറിലെ എസ്.ഐ.ആറിലും (തീവ്ര വോട്ടര്പട്ടിക പരിഷ്കരണം) അനധികൃക നുഴഞ്ഞുകയറ്റുമെന്ന വിഷയത്തിലേക്കും ഫോക്കസ് ചെയ്യാനും തീരുമാനിച്ചിട്ടുണ്ട് നേതൃത്വം.
Content Highlights: BJP eyes Bihar polls with infiltration narrative, contrasting EC`s stance. Modi & Shah employ old tactics to counter anti-incumbency & Rahul Gandhi`s campaign