യുഎസിന്റെ ഭീഷണിയും അബ്രഹാം ഉടമ്പടിയും; ഇറാനെ മെരുക്കാനുള്ള തന്ത്രം, പാകിസ്താന്റെ ധർമ്മസങ്കടം
അമേരിക്കയുടെ നയതന്ത്ര മധ്യസ്ഥതയിൽ ഇസ്രയേലും വിവിധ അറബ്-മുസ്ലിം രാജ്യങ്ങളും തമ്മിൽ ഉഭയകക്ഷി ബന്ധങ്ങൾ സ്ഥാപിക്കുന്നതിനായി ഒപ്പുവെച്ച ചരിത്രപരമായ നയതന്ത്ര ഉടമ്പടികളാണ് അബ്രഹാം ഉടമ്പടികൾ എന്ന് അറിയപ്പെടുന്നത്. പശ്ചിമേഷ്യൻ ഭൗമരാഷ്ട്രീയ ഭൂപടത്തെ മാറ്റിമറിച്ച ഈ ഉടമ്പടി വീണ്ടും ചർച്ചയാവുകയാണ്. ഇറാനുമായുള്ള സമാധാന ചർച്ചയുടെ ഭാഗമായി നിലവിൽ ഉടമ്പടിയുടെ ഭാഗമാകാത്തതും എന്നാൽ ഇസ്രയേലിനെ ഇതുവരെ നയതന്ത്രപരമായി അംഗീകരിക്കാതിരിക്കുകയും ചെയ്യുന്ന ഇസ്ലാമിക രാജ്യങ്ങളെയും കൂടി ഉടമ്പടിയുടെ ഭാഗമാക്കാനാണ് അമേരിക്ക ശ്രമിക്കുന്നത്. സൈനികപരമായും ഭൗമരാഷ്ട്രീയമായും അമേരിക്കയുടെ നിരവധി താത്പര്യങ്ങളുമായി കെട്ടുപിണഞ്ഞു കിടക്കുന്ന ഒന്നാണ് അബ്രഹാം ഉടമ്പടി. എന്നാൽ പലസ്തീൻ വിഷയത്തിന്റെ പേരിൽ ഇസ്രയേലുമായുള്ള സമീപനത്തിൽ മാറ്റം വരുത്താൻ പല അറബ്-മുസ്ലീം രാജ്യങ്ങളും തയ്യാറല്ല. അമേരിക്കയുടെ ഭീഷണികൾക്കും തന്ത്രങ്ങൾക്കും വഴങ്ങാതെ എത്രനാൾ ഈ രാജ്യങ്ങൾക്ക് പിടിച്ചുനിൽക്കാനാകുമെന്നാണ് ലോകം ഉറ്റുനോക്കുന്നത്. കാരണം അമേരിക്കയുമായി സുരക്ഷാ സഹകരണമുള്ള രാജ്യങ്ങളാണ് അറബ് മേഖലയിലുള്ളത്. ഇനി സമ്മർദങ്ങൾക്ക് വഴങ്ങിയാൽ തന്നെ അതുയർത്തുന്ന സമാധാനം എത്രനാൾ നീണ്ടുനിൽക്കുമെന്ന് കണ്ടറിയേണ്ടിയിരിക്കുന്നു.
പശ്ചിമേഷ്യൻ ഭൗമരാഷ്ട്രീയത്തെ മാറ്റിമറിച്ച ഈ പ്രക്രിയയ്ക്ക് തുടക്കം കുറിച്ചത് 2020 ഓഗസ്റ്റിലാണ്. തുടർന്ന് സെപ്റ്റംബർ 15-ന് വാഷിംഗ്ടൺ ഡി.സിയിൽ വെച്ച് ഒപ്പുവെക്കുകയും ചെയ്ത നയതന്ത്ര കരാറുകളിലൂടെയാണ് അബ്രഹാം ഉടമ്പടി നിലവിൽ വന്നത്. യഹൂദ, ഇസ്ലാം, ക്രൈസ്തവ മതങ്ങളുടെ പൊതുവായ പിതാവായി കരുതപ്പെടുന്ന അബ്രഹാമിന്റെ (ഇബ്രാഹിം) പേരാണ് ഈ ഉടമ്പടിക്ക് നൽകിയിരിക്കുന്നത്. മതപരമായ ഈ സാദൃശ്യം ജൂത-അറബ് ജനതകൾക്കിടയിലെ സഹവർത്തിത്വത്തിന്റെയും സമാധാനത്തിന്റെയും പ്രതീകമായി അമേരിക്ക ഉയർത്തിക്കാട്ടുന്നു.
Content Highlights: US push to integrate Saudi Arabia, Pakistan, and others into the Abraham Accords by 2026., Strategic goal to counter Iranian influence and secure regional stability., US military exhaustion from regional conflicts necessitates a pivot to the Pacific., Economic corridors like I2U2 aimed at countering China's Belt and Road initiative., Resistance from regional powers citing the unresolved Palestinian statehood issue.