ചൈനീസ് കമ്മ്യൂണിസ്റ്റ് പാര്‍ട്ടിയില്‍ അധികാര വടംവലിയെന്ന് സൂചന; ഷീ ജിന്‍പിങ് പുറത്തേക്കോ?
മാവോ സേതുങ്ങിനു ശേഷം ചൈന കണ്ട ഏറ്റവും ശക്തനായ നേതാവായ പ്രസിഡന്റ് ഷീ ജിന്‍പിങിന് അധികാരത്തിലെ പിടി അയയുകയാണെന്നും അദ്ദേഹം പുറത്തേക്കുള്ള വഴിയിലാണെന്നുമുള്ള അഭ്യൂഹങ്ങള്‍ പരക്കുകയാണ്. മുന്‍ പ്രസിഡണ്ട് ഹൂ ജിന്റാവോയോടു കൂറുള്ള വിഭാഗം ചൈനീസ് കമ്മ്യൂണിസ്റ്റ് പാര്‍ട്ടിയില്‍ പിടിമുറുക്കിയെന്നും പരിഷ്‌കാരത്തിന്റെയും പ്രായോഗികതയുടെയും വക്താവായ ഒരു നേതാവിനെ പകരം വാഴിക്കാനുള്ള ശ്രമങ്ങള്‍ ശക്തിപ്പെടുകയാണെന്നും കേള്‍ക്കുന്നു. ഷീയ്ക്ക് കടുത്ത ആരോഗ്യപ്രശ്നങ്ങളുണ്ടെന്നും അതാണ് മാറ്റത്തിനു കാരണമെന്നു കരുതുന്നവരും ഏറെയാണ്. എങ്കിലും ചൈന ആയതുകൊണ്ട് അവസാന നിമിഷം വരെ നമുക്ക് ഒന്നും പറയാനാവില്ല. ഒരുപക്ഷേ, ഇപ്പോഴത്തെ മൗനം ഷീ ജിന്‍പിങ് പാര്‍ട്ടിയില്‍ തന്റെ നിയന്ത്രണം അരക്കിട്ടുറപ്പിക്കുന്നതിന്റെ ലക്ഷണവുമാവാം. മുളമറയ്ക്കു പിന്നില്‍ എന്തു നടന്നാലും ലോകം അറിയണമെന്ന് അവര്‍ തീരുമാനിക്കുന്ന കാര്യങ്ങളേ പുറത്തുവരൂ!
ഷീയുടെ കാലിടറുകയാണെന്ന് ചൈനാനിരീക്ഷകര്‍ സംശയിക്കുന്നതിന്റെ പ്രധാനകാരണം കുറച്ചുനാള്‍ അദ്ദേഹം പൊതുവേദിയില്‍ നിന്നും അപ്രത്യക്ഷനായിരുന്നതാണ്. കഴിഞ്ഞ മേയ് അവസാനം മുതല്‍ ജൂണ്‍ തുടക്കം വരെ. ചൈന സന്ദര്‍ശിക്കാന്‍ എത്തുന്ന വിദേശ നേതാക്കളുടെ മുന്നില്‍ പോലും അദ്ദേഹം പ്രത്യക്ഷനായില്ല ഒടുവില്‍ ബെലാറൂസ് നേതാവ് അലക്സാണ്ടര്‍ ലൂക്കാഷെങ്കോ വന്നപ്പോള്‍ മാത്രമാണ് അദ്ദേഹം പൊതുവേദിയില്‍ കാണപ്പെട്ടത്. കാഴ്ചയില്‍ ക്ഷീണിതനായിരുന്നു, പഴയ പ്രതാപവും പരിവാരങ്ങളും ചുവന്ന പരവതാനിയുമൊന്നും ഉണ്ടായിരുന്നില്ല. അതിഥിയെ സ്വീകരിച്ചയിടം ഒരു ഇടത്തരം വീടുപോലെ തോന്നിച്ചു. അദ്ദേഹത്തിന്റെ സുരക്ഷാസംഘത്തിന്റെ അംഗസംഖ്യ പകുതിയാക്കിയിട്ടുണ്ട്. മറ്റു പാര്‍ട്ടി നേതാക്കള്‍ നല്‍കിയ വിരുന്നുകള്‍ക്ക് ഇതിനേക്കാള്‍ പതിന്‍മടങ്ങ് ഗാംഭീര്യവും പ്രൗഢിയുമുണ്ടായിരുന്നു! കുറച്ചുനാളായി അദ്ദേഹം പ്രധാന അന്താരാഷ്ട്ര വേദികള്‍ ഒഴിവാക്കാന്‍ തുടങ്ങിയിട്ട്. ഞായറാഴ്ച ബ്രസീലില്‍ ആരംഭിക്കുന്ന ബ്രിക്സ് ഉച്ചകോടിയിലും അദ്ദേഹമില്ല. ഇതാദ്യമാണ് ചൈനീസ് പ്രസിഡണ്ട് ബ്രിക്സ് ഉച്ചകോടിയില്‍ പങ്കെടുക്കാതിരിക്കുന്നത്.
Content Highlights: xi jinping power struggle china