പബ്ലിക് അക്കൗണ്ട്സ് കമ്മിറ്റി; കണക്കിലെ കളികളും കാത്തിരിക്കുന്ന വെല്ലുവിളികളും

പാര്‍ലമെൻ്ററി ജനാധിപത്യത്തിലെ പ്രധാനപ്പെട്ട ഒന്നാണ് ജനങ്ങളാൽ തിരഞ്ഞെടുക്കപ്പെട്ട പാര്‍ലമെൻ്റും തുടർന്ന് രൂപീകരിക്കപ്പെടുന്ന പാര്‍ലമെൻ്ററി കമ്മിറ്റികളും. ഭരണനിർവഹണവുമായി ബന്ധപ്പെട്ട പാര്‍ലമെൻ്ററി കമ്മിറ്റികൾ ദേശീയതലത്തിലും സംസ്ഥാന തലങ്ങളിലും പ്രവർത്തിക്കുന്നുണ്ട്. ഇന്ത്യയിൽ നിലവിൽ ഉള്ള മുപ്പത്തിലധികം പാര്‍ലമെൻ്ററി കമ്മിറ്റികളിലെ ഏറ്റവും പ്രധാനപ്പെട്ട കമ്മറ്റിയാണ് സർക്കാരിൻ്റെ പൊതുധനകാര്യ ഇടപാടുകളെ സൂഷ്മമായി പരിശോധിക്കുവാൻ അധികാരമുള്ള പബ്ലിക് അക്കൗണ്ട്സ് കമ്മിറ്റി (PAC). ഈ കമ്മിറ്റിയെ പാര്‍ലമെൻ്ററി കമ്മിറ്റികളുടെ മാതാവ് എന്നു കൂടി വിശേഷിപ്പിക്കുന്നു. ലോക്​സഭാ സ്പീക്കർ നിയമിക്കുന്ന കമ്മിറ്റിയുടെ ഏറ്റവും പ്രധാന പ്രത്യേകത പ്രതിപക്ഷ അംഗമാകും ഈ കമ്മറ്റിയുടെ ചെയർമാൻ എന്നതാണ്. ലോക്​സഭയിലെയും (15) രാജ്യസഭയിലെയും (7) ഉൾപ്പെടെ 22 അംഗങ്ങൾ ഉൾപ്പെടുന്നതാണ് പബ്ലിക് അക്കൗണ്ട്സ് കമ്മിറ്റി.

സ്പീക്കർ രൂപികരിക്കുന്ന കമ്മിറ്റിയുടെ ചെയർമാൻ പദത്തിൽ ഒരു പ്രതിപക്ഷാംഗം ചെയർമാനായി വരണമെന്ന് പാര്‍ലമെൻ്ററി ജനാധിപത്യം വ്യവസ്ഥ ചെയ്യുമ്പോൾ രാജ്യത്തെ സർക്കാറിൻ്റെ സാമ്പത്തിക ക്രയവിക്രിയങ്ങൾ സുതാര്യമാകണമെന്ന നിഷ്കർഷയുള്ള കാര്യമായി മാറുന്നു. ഈ കമ്മിറ്റിയുടെ  ചെയർമാൻ പദത്തിലേക്ക് വരുന്ന പ്രതിപക്ഷ അംഗം പാര്‍ലമെൻ്ററി രംഗത്തെ പ്രഗൽഭൻമാരൊ സീനിയർ അംഗങ്ങളൊ ആകും എന്നത് എടുത്ത് പറയേണ്ട കാര്യമാണ്. ആർ. വെങ്കിട്ടരാമൻ, പി.വി. നരസിംഹറാവു, എ.ബി വാജ്പേയി, ഐ.കെ ഗുജറാൾ, ജസ്വന്ത് സിംഗ്, ഡോ. മുരളി മനോഹർ ജോഷി,  മല്ലികാർജുൻ ഖാർഖെ തുടങ്ങിയ അധി പ്രഗൽഭരായ അംഗങ്ങൾ ഈ കമ്മറ്റിയുടെ ചെയർമാൻമാരായി ഇരുന്നിട്ടുണ്ട്. പബ്ലിക് അക്കൗണ്ട്സ് കമ്മിറ്റിയുടെ ചെയർമാനായി ലോക്സഭാ സ്പീക്കർ ഓം ബിർള കെ.സി വേണുഗോപാലിനെ നിയമിച്ചിരിക്കുകയാണ്. അതിലൂടെ ഈ സുപ്രധാന കമ്മറ്റിയെ പറ്റിയുള്ള ചർച്ചകൾ സജീവമായി നടക്കുന്നു.

Content Highlights: public accounts committee history and its responsibilities