ധന്‍കറുടെ തിടുക്കത്തിലുള്ള രാജിക്ക് പിന്നില്‍ നേതൃത്വത്തിന്റെ അതൃപ്തിയോ? BJPക്ക് കണ്ണ് ബിഹാറിലും
വര്‍ഷകാല സമ്മേളനത്തിന്റെ ആദ്യ ദിനത്തില്‍ പാര്‍ലമെന്റിനെ ഞെട്ടിച്ചുകൊണ്ടായിരുന്നു ഉപരാഷ്ട്രപതി ജഗ്ദീപ് ധന്‍കറിന്റെ രാജി പ്രഖ്യാപനം. ജൂലൈ 21 തിങ്കളാഴ്ച വൈകുന്നേരം രാഷ്ട്രപതി ദ്രൗപദി മുര്‍മുവുമായി കൂടിക്കാഴ്ച നടത്തിയതിനുശേഷമായിരുന്നു രാത്രി സാമൂഹിക മാധ്യമങ്ങളിലൂടെ അദ്ദേഹം രാജി പ്രഖ്യാപിച്ചത്. എന്നാല്‍ അപ്രതീക്ഷിത രാജി അഭ്യൂഹങ്ങള്‍ക്കും തിരികൊളുത്തിയിരിക്കുകയാണ്. ആരോഗ്യകാരണങ്ങളാലാണ് രാജിയെന്ന് പറയുന്നുണ്ടെങ്കിലും ഇതിനുപിന്നില്‍ രാഷ്ട്രീയ നീക്കമുണ്ടെന്നാണ് റിപ്പോര്‍ട്ട്. അപ്രതീക്ഷിത രാജി പാര്‍ലമെന്റിനെ ഭരണഘടനാ പ്രതിസന്ധിയിലേക്കും കൊണ്ടെത്തിച്ചിരിക്കുന്നു. 2027ല്‍ ഉപരാഷ്ട്രപതി സ്ഥാനം രാജിവെക്കുമെന്ന് നേരത്തെ തന്നെ ധന്‍കര്‍ സൂചന നല്‍കിയിരുന്നെങ്കിലും പെട്ടെന്നുള്ള തീരുമാനം എന്ത് കാരണത്തിലാവുമെന്നാണ് രാജ്യവും രാഷ്ട്രീയപാര്‍ട്ടികളും ഉറ്റുനോക്കുന്നത്. ഏകദേശം മൂന്ന് വര്‍ഷത്തോളമായി ധന്‍കര്‍ ഈ പദവിയിലേറിയിട്ട്, കാലവധി പൂര്‍ത്തിയാക്കുന്നതിന് മുന്‍പ് രാജിവെക്കുന്ന മൂന്നാമത്തെ ഉപരാഷ്ട്രപതികൂടിയാണ് ധന്‍കര്‍. ആര്‍. വെങ്കിട്ടരാമനും വി.വി. ഗിരിയുമാണ് ഇതിനുമുന്‍പ് രാജിവെച്ചവര്‍. എന്നാല്‍ ഇവരിലാരും പാര്‍ലമെന്റ് സമ്മേളനം നടന്നുകൊണ്ടിരിക്കെ പദവിയില്‍ നിന്നിറങ്ങിപ്പോയവരല്ല. ധന്‍കറിന്റെ രാജിയോടെ ഇനി എന്ത് എന്ന ചോദ്യമുയരുന്നു. ആരാകും അടുത്ത ഉപരാഷ്ട്രപതിയെന്ന ചോദ്യം പല കോണുകളില്‍നിന്നും ഉയര്‍ന്നുകഴിഞ്ഞു.
Content Highlights: jagdeep-dhankhar-resignation-india-vice-president