'മൂലധന'ത്തിൽ നിന്നകലെ, മൂലധനത്തിനു പിറകേ.... സി.പി.എമ്മിന്റെ നയവ്യതിയാനം കാലത്തോട് പറയുന്നത്

സി.പി.എമ്മിന്റെ നയവ്യതിയാനത്തിന് അതിന്റെ പിറവിയോളം തന്നെ നീണ്ട ചരിത്രമുണ്ട്. പാർട്ടിയുടെ രൂപവത്കരണത്തിലേക്ക് നയിച്ച ആശയപ്രചാരണം എട്ട് വർഷത്തോളം നീണ്ടതായിരുന്നു. കമ്യൂണിസ്റ്റ് പാർട്ടിയുടെ ഔദ്യോഗിക ലൈനിനെതിരേ പോരാടിയവർ സി.പി.എം. രൂപവത്കരിച്ച ശേഷം സഞ്ചരിച്ചത് തികച്ചും വിരുദ്ധമായ ദിശയിലേക്കായിരുന്നു. പാർലമെന്ററി രാഷ്ട്രീയത്തിന് ഉപരിയായി ബഹുജനസമരങ്ങളിലൂന്നിയുള്ള പ്രവർത്തനത്തിന് മുൻതൂക്കം നൽകിയുള്ള നയപരിപാടികളെ കുറിച്ചാണ് സി.പി.ഐ.യിൽ വിമതസ്വരമുയർത്തി ആശയസംഘർഷത്തിലേർപ്പട്ടവർ പറഞ്ഞുകൊണ്ടിരുന്നത്. പ്രവർത്തനമാർഗമായി ആയുധപാതയിലൂടെയുള്ള സഞ്ചാരത്തെ കൂടി ചില രഹസ്യയോഗങ്ങളിൽ നേതാക്കൾ ഉദ്ബോധിപ്പിച്ചുകൊണ്ടിരുന്നു. 
    
വേദനാജനകമായ പിളർപ്പിനുശേഷമുണ്ടായ സി.പി.എമ്മിന്റെ പിറവിക്കുശേഷം ബഹുജനസമരത്തിന്റെയും സായുധപാതയുടെയും വചനങ്ങളെ കുറിച്ചുള്ള പ്രവർത്തകരുടെ അന്വേഷണങ്ങൾ സി.പി.എം. നേതൃത്വത്തിന്റെ ബധിരകർണങ്ങളിലാണ് ചെന്നുപതിച്ചത്. കാരണം, സി.പി.എമ്മിന്റെ നയവ്യതിയാനം അതിവേഗമായിരുന്നു. അങ്ങനെയാണ് സി.പി.എമ്മും റിവിഷനിസ്റ്റായെന്ന് പ്രതിഷേധിച്ച് ഒരുവിഭാഗം സായുധസമരത്തിലേക്കും ബഹുജനസമര പാതയിലേക്കും നീങ്ങിയത്. 

സി.പി.എമ്മിനെ ഭേദിച്ചുകൊണ്ട് കമ്യൂണിസ്റ്റ് യൂണിറ്റി സെന്റർ മുദ്രാവാക്യം മുഴക്കിയതും നക്സലൈറ്റ് പ്രസ്ഥാനം വെടിമുഴക്കിക്കൊണ്ട് രംഗപ്രവേശം നടത്തിയതും അതിന്റെ ചരിത്രദൃഷ്ടാന്തം. ബഹുജനസമരത്തിന്റെ നയരേഖ ഉയർത്തിപ്പിടിച്ച് പാർട്ടിയിൽ ആശയ പോരാട്ടം നടത്തിയ കേന്ദ്രക്കമ്മിറ്റിയംഗം ടി.നാഗിറെഡ്ഡിയായിരുന്നു. കേരളത്തിനും ഇതിന്റെ ഘടകമുണ്ടായി. കമ്യൂണിസ്റ്റുപ്രസ്ഥാനത്തിന്റെ അന്തകനായ ആധുനികശങ്കരനാണ് ഇ.എം.എസ്. നമ്പൂതിരിപ്പാടെന്ന് കണ്ണൂരിലെ പൊതുയോഗത്തിൽ ആയിരങ്ങളെ സാക്ഷിയാക്കി പറഞ്ഞു നാഗിറെഡ്ഡി പ്രസംഗിച്ചിട്ടുണ്ട്. ചാരുമജുംദാറിന്റെയും കനുസന്യാലിന്റെയും ആവിർഭാവവും കണ്ടു. 

Content Highlights: Analysis of CPM`s ideological shifts, its embrace of capitalism