ചര്‍ച്ച പ്രായപരിധിയെ കുറിച്ച് മാത്രം; ഇതു പറയാന്‍ ആലപ്പുഴയില്‍ നിന്ന് ചണ്ഡിഗഡ് വരെ പോകണോ?
മാര്‍ക്‌സിസ്റ്റ് ആചാര്യനും പ്രമുഖ സിപിഐ നേതാവുമായിരുന്ന മോഹിത് സെന്‍ ആത്മവിമര്‍ശനമെന്നോണം ആത്മകഥയില്‍ ഇന്ത്യന്‍ കമ്യൂണിസ്റ്റുകളുടെ ഒരു പൊതുനിലപാടിനെ കളിയാക്കി നടത്തുന്ന പ്രസ്താവന ഇപ്രകാരമാണ് : 'ഇന്ത്യന്‍ കമ്യൂണിസ്റ്റുകള്‍ക്ക് ഗാന്ധിജിയോടുള്ള ദേഷ്യം തങ്ങളുടെ വിപ്ലവം റാഞ്ചിയ നേതാവ് എന്നതാണ്'! ഇന്ത്യയുടെ ആത്മാവ് കണ്ടെത്തിയ ഗാന്ധിജിയെ കണ്ടെത്താന്‍ ഇന്ത്യന്‍ കമ്യൂണിസ്റ്റുകള്‍ക്ക് ഇന്നും കഴിയുന്നില്ലെന്നത് അത്ഭുതപെടുത്തുന്നു.
നൂറാം വാര്‍ഷികത്തില്‍ ചണ്ഡിഗഡില്‍ നടന്ന പാര്‍ട്ടി കോണ്‍ഗ്രസില്‍ തര്‍ക്കം പ്രായപരിധിയെ കുറിച്ച് മാത്രമായിരുന്നു. അതും അധികാരക്കൈമാറ്റത്തിലെ തര്‍ക്കവിതര്‍ക്കങ്ങളുമായി ബന്ധപ്പെട്ട്! അല്ലാതെ കാലഘട്ടം ആവശ്യപ്പെടുന്ന വെല്ലുവിളികള്‍ നേരിടുന്നതിന് ആവശ്യമായ പ്രത്യയശാസ്ത്ര നവീകരണം സംബന്ധിച്ചോ, ഫാസിസ്റ്റ് വെല്ലുവിളികള്‍ നേരിടാന്‍ ജോര്‍ജ്ജ് ദിമിത്രോവ്, പാമിറോ തോഗ്ലിയാട്ടി മാതൃകയിലുള്ള ഫാസിസ്റ്റ് വിരുദ്ധ മുന്നണിക്ക് ഇന്ത്യന്‍ സാഹചര്യത്തിലുള്ള സാധ്യതകളെ കുറിച്ചോ, ഗൗരവത്തിലുള്ള ചര്‍ച്ച കോണ്‍ഗ്രസില്‍ നടന്ന് കണ്ടില്ല.
Content Highlights: cpi chandigarh party congress analysis congress alliance