ജെൻ സീയുടെ പ്രിയങ്കരൻ, തോൽപ്പിച്ചത് മുൻ പ്രധാനമന്ത്രിയെ; ബാലേൻ നേപ്പാളിനെ നയിക്കുമ്പോൾ

നേപ്പാളിൽ അധികാരമുറപ്പിച്ച് കാഠ്മണ്ഡു മുൻമേയറും റാപ്പറുമായ ബാലേന്ദ്ര ഷാ. കഴിഞ്ഞ വർഷം അരങ്ങേറിയ ജെൻ സീ പ്രക്ഷോഭത്തിനുശേഷം നടന്ന ആദ്യ പാർലമെൻറ് തിരഞ്ഞെടുപ്പിൽ വ്യക്തമായ ഭൂരിപക്ഷത്തോടെയാണ് ‘ബലേൻ ഷാ’ എന്ന് അറിയപ്പെടുന്ന ബാലേന്ദ്ര ഷാ അധികാരത്തിലേക്ക് എത്തുന്നത്. രാഷ്ട്രീയ സ്വതന്ത്ര പാർട്ടിയുടെ (ആർ.എസ്.പി.) സ്ഥാനാർഥിയായി ഝാപ-5 മണ്ഡലത്തിൽ മത്സരിച്ച ഷാ, മുൻ പ്രധാനമന്ത്രി കെ.പി. ശർമ ഒലിയെ അരലക്ഷത്തോളം വോട്ടുകൾക്കാണ് തോൽപ്പിച്ചത്. അന്തിമഫലം പുറത്തുവരാനിരിക്കെ ഫലം പുറത്തുവന്ന 97 സീറ്റുകളിൽ 77 സീറ്റ് ആർ.എസ്.പി. നേടി. ബാക്കിയുള്ള സീറ്റിലും പാർട്ടിക്ക് വ്യക്തമായ മുൻതൂക്കം ലഭിക്കുമെന്നാണ് പ്രവചനം.

സാമൂഹികമാധ്യമ നിരോധനത്തിൽ തുടങ്ങി, തൊഴിലില്ലായ്മയും അഴിമതിയും സ്വജനപക്ഷപാതവുമടക്കമുള്ള കാരണങ്ങളുടെ പേരിൽ ശക്തിപ്പെട്ട ജെൻ സീ വിപ്ലവത്തിന്റെ ശക്തനായ പിന്തുണക്കാരനായിരുന്നു ഷാ. ആദ്യം സംഗീതത്തിലൂടെയും പിന്നീട് വേറിട്ട രാഷ്ട്രീയ ശൈലിയിലൂടെയും യുവതലമുറയുടെ മനം കവർന്നയാൾ. നേപ്പാളിലെ അഴിമതി രാഷ്ട്രീയത്തെ നിരന്തരം എതിർത്തയാൾ. ഒലിയുടെ കമ്യൂണിസ്റ്റ് സർക്കാരിനെ താഴെയിറക്കിയതിന് ശേഷം അധികാരത്തിൽവന്ന ഇടക്കാല സർക്കാരിന്റെ നേതൃത്വത്തിലേക്ക് യുവാക്കൾ ആദ്യം നിർദേശിച്ചതും ബാലേൻ ഷായെ ആയിരുന്നു. അന്നത് നിരസിച്ചെങ്കിലും നാലുവർഷം പ്രധാനമന്ത്രിയായ ഒലിയെ അദ്ദേഹത്തിന്റെ തട്ടകത്തിൽ മുട്ടുകുത്തിച്ചാണ് ഷാ പ്രധാനമന്ത്രി കസേരയിലേക്ക് എത്തുന്നത്.