ഒമ്പത് വര്ഷം, LPG വില കൂട്ടിയത് 700 രൂപ; സബ്സിഡിയും അപ്രത്യക്ഷമായി, നടുവൊടിഞ്ഞ് ജനം
കൂട്ടലിന് മാത്രം ഒരു കുറവുമില്ല. ഇന്ധനമായാലും ഗ്യാസായാലും. പാചകവാതകത്തിന് കേന്ദ്രം 50 രൂപ ഒറ്റയടിക്ക് കൂട്ടിയതോടെ സിലിണ്ടറിന്റെ വില 1100 കടന്നു. പണ്ടൊക്കെ കൂട്ടലിന് ചില കാരണവും ന്യായീകരണവും ഒക്കെ നിരത്താറുണ്ടായിരുന്നു. ഇപ്പോള് അതും ആരും പറയാറില്ല. എല്ലാം സഹിക്കാന് ജനം. വാണിജ്യ സിലിണ്ടറിന് 350 രൂപയാണ് കൂട്ടിയത്. ഹോട്ടലുകാരുടെ നടുവൊടിയാതിരിക്കാന് അവര് ഭക്ഷണസാധനങ്ങള്ക്കു വില കൂട്ടും. ആ വഴിക്കും ജനത്തിന് പ്രഹരം വേറെ.
മോദി സര്ക്കാര് അധികാരമേല്ക്കുമ്പോള് പാചകവാതകത്തിന് ഒരു സിലിണ്ടറിന് 410 രൂപയായിരുന്നു. ഒമ്പത് വര്ഷം കൊണ്ട് അത് 1103 രൂപയിലെത്തി നില്ക്കുന്നു. വീട്ടിലെത്തിക്കണമെങ്കില് 50 അല്ലെങ്കില് 100 രൂപ വേറെയും കൊടുക്കണം. ഏകദേശം 700 രൂപയുടെ വര്ധന. ആദ്യം സബ്സിഡിയുടെ പേരില് പറ്റിച്ചു. ഉപഭോക്താവിന്റെ അക്കൗണ്ടിലേക്ക് സബ്സിഡി തുക വകവെക്കുന്ന പരിഷ്കാരം തുടങ്ങി. വര്ഷത്തില് 10 സിലിണ്ടര് വരെ മാത്രം സബ്സിഡി എന്ന നയം യു.പി.എയുടെ വകയായിരുന്നു. തുടക്കത്തില് അത് അക്കൗണ്ടിലെത്തുകയും ചെയ്തിരുന്നു. കഴിഞ്ഞ രണ്ടു വര്ഷമായി സബ്സിഡി സര്ക്കാര് മറന്നു. സബ്സിഡി രഹിത ഇന്ത്യ എന്നാണോ പുതിയ മുദ്രാവാക്യം. അറിയില്ല. ഏതായാലും സബ്സിഡി കിട്ടാന് അക്കൗണ്ട് തുടങ്ങിയവര് അക്കൗണ്ട് നിലനിര്ത്താന് അങ്ങോട്ട് പണം അടയ്ക്കേണ്ട സ്ഥിതിയാണിന്ന്.
Content Highlights: lpg price hike in india