ഉത്തർപ്രദേശ് 2027: യോഗി-ഷാ ഭിന്നതയും അയോധ്യയിലെ സംഭാവനക്കൊള്ളയും ബിജെപിക്ക് വെല്ലുവിളിയാവുമോ?

ഇന്ത്യൻ രാഷ്ട്രീയത്തിൽ ഡൽഹിയിലേക്കുള്ള പാത എക്കാലവും ഉത്തർപ്രദേശ് വഴിക്കായിരുന്നു. ഇനിയും അതങ്ങനെ തുടരും. കാരണം, ഇരുപത്തിനാലു കോടിയിലധികം ജനങ്ങളും 80 ലോക്‌സഭാ സീറ്റുകളും 403 നിയമസഭാ മണ്ഡലങ്ങളുമുള്ള സംസ്ഥാനത്ത് മേധാവിത്വം നേടുന്ന പാർട്ടിക്ക് കേന്ദ്രഭരണം കിട്ടാനുള്ള സാധ്യത വളരെ കൂടുതലാണ്. അതുകൊണ്ടുതന്നെ, 2027-ൽ നടക്കാനിരിക്കുന്ന നിയമസഭാ തിരഞ്ഞെടുപ്പിനുള്ള ഒരുക്കങ്ങൾ ദേശീയപാർട്ടികൾ ആരംഭിച്ചുകഴിഞ്ഞു.
പ്രധാനമന്ത്രി നരേന്ദ്രമോദിയുടെ കീഴിലുള്ള കുതിപ്പിന് ഏറ്റവുമധികം കരുത്തുപകർന്ന സംസ്ഥാനം തിരഞ്ഞടുപ്പിലേക്ക് നടക്കുമ്പോൾ അകത്തും പുറത്തുമുള്ള നിരവധി പ്രശ്‌നങ്ങൾ ബിജെപിക്ക് വെല്ലുവിളിയാവുകയാണ്. നീറ്റ് പരീക്ഷയുടെ ചോദ്യപ്പേപ്പർ ചോർന്നതിനെ തുടർന്ന് നാലിലധികം വിദ്യാർത്ഥികളാണ് ഉത്തർപ്രദേശിൽ ജീവനൊടുക്കിയത്. അയോധ്യയിലെ രാമക്ഷേത്രത്തിലേക്കുള്ള സംഭാവന കൈകാര്യം ചെയ്തതിലെ വലിയ തോതിലുള്ള ക്രമക്കേടുകൾ കണ്ടെത്തിയതാണ് മറ്റൊരു വലിയ പ്രശ്‌നം. അയൽസംസ്ഥാനമായ മധ്യപ്രദേശിലെ ബിജെപി മുഖ്യമന്ത്രി മോഹൻ യാദവിന്റെയും കുടുംബത്തിന്റെയും റിയൽഎസ്‌റ്റേറ്റ് ഇടപാടുകൾ സംബന്ധിച്ച അഴിമതി ആരോപണവും നിയമസഭാ തിരഞ്ഞെടുപ്പിൽ ചർച്ചയാകുമെന്നുറപ്പ്.
ഉരുക്കുകോട്ടയായി കരുതിയിരുന്ന സംസ്ഥാനത്ത് ബിജെപി പ്രതിരോധത്തിലാവുന്നതിന് പാർട്ടിക്കകത്തുമുണ്ട് കാരണങ്ങൾ. സംസ്ഥാനത്ത് ഏറ്റവും ജനസ്വാധീനമുള്ള പ്രാദേശികനേതാവായ യോഗി ആദിത്യനാഥിനെതിരായ നീക്കങ്ങൾ ചില കോണുകളിൽ നിന്നുയരുന്നതായി ആരോപണമുണ്ട്. 2024-ലെ പാർലമെന്റ് തിരഞ്ഞെടുപ്പിൽ യോഗിയെ അവഗണിച്ച് സ്ഥാനാർത്ഥിനിർണയം നടത്തിയതാണ് തിരിച്ചടി വിളിച്ചുവരുത്തിയതെന്ന് റിപ്പോർട്ടുകളുണ്ടായിരുന്നു. മൂന്നാംതവണയും മുഖ്യമന്ത്രിയാകാൻ യോഗി കച്ചകെട്ടുമ്പോൾ ഭരണവിരുദ്ധവികാരത്തെ മാത്രമല്ല ഭയക്കേണ്ടത്. പ്രതിപക്ഷത്ത് പ്രതീക്ഷ പടരുന്നതും അതുകൊണ്ടാണ്.

പത്തുവർഷം കൊണ്ട് ബിജെപിയും മുഖ്യമന്ത്രി യോഗിയും ചേർന്ന് സൃഷ്ടിച്ച'ജാതിക്കതീതമായ' ഹിന്ദുത്വം സംസ്ഥാനത്തെ സങ്കീർണമായ ജാതി, സമുദായ അടിയൊഴുക്കുകൾക്കു മുന്നിൽ പതറാമെന്ന് 2024-ലെ തിരഞ്ഞെടുപ്പ് തെളിയിച്ചു.
2014-ൽ നരേന്ദ്രമോദിയെ ഡൽഹിയിൽ പ്രധാനമന്ത്രിയായി വാഴിക്കുന്നതിൽ ഏറ്റവും വലിയ പങ്ക് വഹിച്ചത് യുപിയാണ്. ആകെയുള്ള 80 ലോക്‌സഭാ സീറ്റുകളിൽ 71 എണ്ണവും ബിജെപി നേടി. ആ വിജയത്തിന് കാരണമായത് അമിത് ഷായുടെ തന്ത്രങ്ങളായിരുന്നു, അന്ന് യോഗി ചിത്രത്തിലില്ല. (2017-ലാണ് യോഗിയെ മുഖ്യമന്ത്രിയാക്കുന്നത്. നിയമസഭാ തിരഞ്ഞെടുപ്പിൽ മത്സരിക്കാത്ത അദ്ദേഹത്തെ മുഖ്യമന്ത്രിയാക്കാനുള്ള തീരുമാനമെടുത്തത് മോദിയായിരുന്നത്രെ.) 2019-ൽ സമാജ്‌വാദി പാർട്ടിയും ബഹുജൻ സമാജ് പാർട്ടിയും കൈകോർത്തെങ്കിലും 62 സീറ്റുകൾ നേടിക്കൊണ്ട് ബിജെപി വിജയം ആവർത്തിച്ചു. എന്നാൽ 2024-ൽ സീറ്റുകൾ 33 ആയി ചുരുങ്ങി. ലോക്‌സഭയിൽ ബിജെപിക്കുണ്ടായിരുന്ന ഒറ്റയ്ക്കുള്ള ഭൂരിപക്ഷം നഷ്ടപ്പെടുന്നതിൽ ഈ തിരിച്ചടി നിർണായകമായി. ഈ പരാജയത്തിന് വഴിവെച്ച ഭൂരിഭാഗം കാരണങ്ങളും 2027ലെ പ്രചാരണത്തെ സ്വാധീനിച്ചേക്കാം.
യോഗി-ഷാ ഭിന്നതയും അയോധ്യയിലെ സംഭാവനക്കൊള്ളയും
2024-ൽ സ്ഥാനാർത്ഥി നിർണയത്തിൽ അമിത് ഷായുടെ ഓഫീസ് നേരിട്ട് തീരുമാനങ്ങൾ എടുത്തെന്നും യോഗി ആദിത്യനാഥിനെ മറികടന്നെന്നും റിപ്പോർട്ടുകൾ വന്നിരുന്നു. 2024-ന് ശേഷം യു.പിയിലെ രാഷ്ട്രീയ അന്തരീക്ഷത്തിൽ വലിയ മാറ്റംവന്നു. ഇപ്പോൾ സ്ഥാനാർത്ഥി നിർണയത്തിന്റെയും പാർട്ടി സംഘടനയുടെയും നിയന്ത്രണം യോഗിയുടെ കൈകളിലേക്ക് തിരിച്ചെത്തിയതായി സൂചനയുണ്ട്. എങ്കിലും ഭിന്നത പൂർണമായി പരിഹരിക്കപ്പെട്ടിട്ടില്ല.

Content Highlights: The 2027 Uttar Pradesh Assembly Elections are critical for national political dominance., Internal friction between Yogi Adityanath and the central BJP leadership remains a major vulnerability., Key controversies include NEET paper leaks, Ayodhya temple trust corruption allegations, and law-and-order debates., The opposition, led by Akhilesh Yadav's SP, is utilizing new socio-political strategies to challenge BJP's Hindutva base., Yogi's governance model and infrastructure development are the primary counters to anti-incumbency.