ശബരിമലയിലെ തന്ത്രപ്രധാന സ്ഥാനങ്ങളിലെ ചുമതല; ജാഗ്രത വേണമെന്ന ഹൈക്കോടതി നിർദേശത്തിന് പുല്ലുവില

തിരുവനന്തപുരം: ശബരിമലയിലെ തന്ത്രപ്രധാനമായ സ്ഥാനങ്ങളിൽ ഉദ്യോഗസ്ഥരെ നിയമിക്കുമ്പോൾ അതീവ ജാഗ്രത പാലിക്കണമെന്ന ഹൈക്കോടതി നിർദ്ദേശം തിരുവിതാംകൂർ ദേവസ്വം ബോർഡ് അട്ടിമറിച്ചതായി റിപ്പോർട്ട്. അഴിമതി ആരോപണങ്ങളിൽ ഹൈക്കോടതി സംശയമുനയിൽ നിർത്തിയ എക്‌സിക്യൂട്ടീവ് ഓഫീസർ അടക്കമുള്ള ഉദ്യോഗസ്ഥരെ തൽസ്ഥാനങ്ങളിൽ നിലനിർത്തിക്കൊണ്ടാണ് ബോർഡ് പുതിയ ഉത്തരവിറക്കിയിരിക്കുന്നത്. മെയ് 30-ന് ദേവസ്വം ബോർഡ് പുറത്തിറക്കിയ ഉത്തരവ് പ്രകാരം എക്‌സിക്യൂട്ടീവ് ഓഫീസർ ഒ.ജി. ബിജു അടക്കം ആറ് ഉദ്യോഗസ്ഥർക്ക് നിലവിലെ സ്ഥാനങ്ങളിൽ തുടരാൻ അനുമതി നൽകി. ശബരിമലയിലെ അഷ്ടാഭിഷേകവുമായി ബന്ധപ്പെട്ട ക്രമക്കേടുകളിൽ മെയ് 18-ന് ഹൈക്കോടതി ബോർഡിനെതിരെ രൂക്ഷമായ പരാമർശങ്ങൾ നടത്തിയിട്ടും ഇത് അവഗണിച്ചാണ് നടപടി.

ചില ഉദ്യോഗസ്ഥർ ശബരിമലയിലെ സുപ്രധാന തസ്തികകളിൽ മാറി മാറി വരുന്നത് ക്ഷേത്രത്തിന്റെ പക്ഷപാതരഹിതമായ ഭരണത്തിന് തടസ്സമാണെന്ന് ഹൈക്കോടതി നിരീക്ഷിച്ചിരുന്നു. ഒ.ജി. ബിജു എക്‌സിക്യൂട്ടീവ് ഓഫീസറായിരിക്കെയാണ് അഷ്ടാഭിഷേകത്തിനുള്ള പൂജാദ്രവ്യങ്ങളുടെ വിതരണം വിവാദ വ്യക്തിയായ സുനിൽ സ്വാമിക്ക് ലഭ്യമാക്കിയതെന്ന ആക്ഷേപം ഉയർന്നത്. കൂടാതെ, ആടിയശിഷ്ടം നെയ്യ് വിതരണത്തിലെ ക്രമക്കേടുകൾ നടന്നതും 2025-ൽ ദ്വാരപാലക ശിൽപങ്ങളിൽ സ്വർണ്ണം പൂശാനായി ചെന്നൈയിലേക്ക് അയച്ചപ്പോഴും ഇദ്ദേഹമായിരുന്നു എക്‌സിക്യൂട്ടീവ് ഓഫീസർ. ബോർഡിലെ സിപിഎം സർവീസ് സംഘടന നേതാക്കൾക്കും തൽസ്ഥാനങ്ങളിൽ തുടരാൻ ദേവസ്വം ബോർഡ് നേതൃത്വം അവസരമൊരുക്കിയിട്ടുണ്ട്.

അഴിമതിയോട് സന്ധിയില്ലാത്ത സമീപനമാണ് തങ്ങളുടേതെന്ന് ദേവസ്വം ബോർഡ് പ്രസിഡന്റ് കെ. ജയകുമാർ ഐ.എ.എസ്. അവകാശപ്പെടുമ്പോഴും, വിവാദ ഉദ്യോഗസ്ഥരെ സംരക്ഷിക്കുന്ന ബോർഡിന്റെ നടപടി വാക്കുകളിൽ പൊരുത്തക്കേടുള്ളതായി വിലയിരുത്തപ്പെടുന്നു. ഹൈക്കോടതി ഉത്തരവിന്റെ നഗ്‌നമായ ലംഘനമാണ് ഈ നടപടിയെന്ന് ചൂണ്ടിക്കാണിക്കപ്പെടുന്നു. അഴിമതി മുക്തമാക്കാനുള്ള നടപടികൾ തുടങ്ങിയെന്ന് ബോർഡ് അവകാശപ്പെടുമ്പോഴും പഴയ വിവാദങ്ങൾ വീണ്ടും ചർച്ചയാകുകയാണ്.

Content Highlights: Devaswom Board retains controversial officials despite High Court directives., Order issued on May 30, 2026, allows Executive Officer OG Biju to continue., Allegations of corruption linked to Ashtabhishekam and gold plating of idols., Conflict between Devaswom Board's anti-corruption stance and internal actions.