മന്ത്രി ജമാഅത്തെ ഇസ്ലാമി വേദിയിൽ; താൻ പങ്കെടുത്തത് ജമാഅത്തിന്റെ പരിപാടിയിൽ അല്ലെന്ന് ദലീമ MLA

കൊച്ചി: ജമാഅത്തെ ഇസ്ലാമിയുടെ പരിപാടിയിൽ പങ്കെടുത്തെന്ന വാർത്തകൾക്ക് പിന്നാലെ വിശദീകരണവുമായി സിപിഎം എംഎൽഎ ദലീമ. അരൂർ നിയോജക മണ്ഡലത്തിൽ സംഘടിപ്പിച്ച 'കനിവ്' എന്ന പാലിയേറ്റീവ് സംഘടനയുടെ ആംബുലൻസ് ഫ്‌ളാഗ് ഓഫ് ചടങ്ങിലാണ് താൻ പങ്കെടുത്തതെന്നും ഇവിടെ തന്നെ ക്ഷണിച്ചതും പങ്കെടുത്തതും ജമാഅത്തെ ഇസ്ലാമിയുടെയോ അതിന്റെ പോഷകസംഘടനകളുടെയോ പരിപാടികൾക്കല്ലെന്നും ദലീമ ഫെയ്‌സ്ബുക്കിൽ കുറിച്ചു.

കനിവ് പാലിയേറ്റീവ് കെയർ യൂണിറ്റിന്റെ ജനുവരി 11-ന് നടന്ന ചടങ്ങിലാണ് ദലീമയും പങ്കെടുത്തതെന്നും ജമാഅത്തെ ഇസ്ലാമി കേരള അമീർ ഉൾപ്പെടെ ഈ ചടങ്ങിൽ പങ്കെടുത്തതായുമാണ് വാർത്തകളുണ്ടായിരുന്നത്. ഇതിനുപിന്നാലെയാണ് ദലീമ സംഭവത്തിൽ വിശദീകരണവുമായി രംഗത്തെത്തിയത്.

ദലീമയുടെ ഫെയ്‌സ്ബുക്ക് കുറിപ്പ്-

‘’ദെലീമ എം.എൽ.എ ജമാഅത്തെ ഇസ്ലാമിയുടെ വേദിയിൽ എന്നുള്ള തരത്തിൽ ഇതിനോടകം പല മാധ്യമങ്ങളും വാർത്തകൾ പ്രസിദ്ധീകരിക്കുന്നുണ്ട്.

ഈ വാർത്തയുടെ കാരണമായിട്ടുള്ളത് ഈ മാസം ജനുവരി 11ന് എന്റെ നിയോജക മണ്ഡലത്തിൽ നടന്ന ചടങ്ങാണ്.ആ പരിപാടിയിലേക്ക് എന്നെ ക്ഷണിച്ചുകൊണ്ടുള്ള കത്ത് ഞാൻ ഈ കുറിപ്പിനൊപ്പം പങ്കുവെക്കുകയാണ്

അരൂക്കുറ്റി കേന്ദ്രീകരിച്ച് പ്രവർത്തിക്കുന്ന കനിവ് എന്ന പാലീയേറ്റിവ് സംഘടനയുടെ കിടപ്പുരോഗികളെ ചികിത്സിക്കുന്ന ഹോം കെയർ ആവശ്യങ്ങൾക്കായുള്ള ആംബുലൻസിന്റെ ഫ്‌ലാഗ് ഓഫിനായാണ് എന്നെ ക്ഷണിച്ചത്.മണ്ഡലത്തിലെ പാലീയേറ്റീവ് - ചാരിറ്റി പ്രവർത്തനങ്ങൾ നടത്തുന്ന സംഘടനകളെ പ്രോത്സാഹിപ്പിക്കേണ്ടതും അത്തരം വേദികളിൽ പങ്കെടുക്കേണ്ടതും ഒരു ജനപ്രതിനിധി എന്ന നിലയിലുള്ള ഉത്തരവാദിത്വമായാണ് കാണുന്നത്.ക്ഷണിക്കുന്ന പരിപാടികൾക്കെല്ലാം പങ്കെടുക്കാൻ പരിശ്രമിക്കുന്ന, ചാരിറ്റി പാലീയേറ്റീവ് പ്രവർത്തനങ്ങളിൽ കുറേക്കൂടി താത്പര്യം കാണിക്കുന്ന സമീപനമാണ് എന്റേത്

ഇവിടെ എന്നെ ക്ഷണിച്ചതും ഞാൻ പങ്കെടുത്തതും ജമാ അത്തെ ഇസ്ലാമി ഹിന്ദിന്റെയോ അതിന്റെ പോഷക സംഘടനകളുടെയോ പരിപാടികൾക്കല്ല.സംഘപരിവാറിന്റെയോ പൊളിറ്റിക്കൽ ഇസ്ലാമിന്റെയോ കാസ ഉൾപ്പടെയുള്ള തീവ്രനിലപാടുകാരുടെയോ വേദികളിൽ പങ്കെടുക്കില്ല എന്നത് ഞാനും എന്റെ പ്രസ്ഥാനമായ സിപിഐഎമ്മിന്റെയും പ്രഖ്യാപിത നിലപാടാണ്

മനുഷ്യർക്കിടയിൽ വിദ്വേഷം സൃഷ്ടിക്കുന്ന ഒരു പ്രസ്ഥാനവുമായും സന്ധിയില്ല. സമത്വവും സാഹോദര്യവുമാണ് എന്റെ ആശയം അത് ജീവനുള്ള കാലം വരെ തുടരും അതിന്റെ പ്രചരണത്തിനായി സംസാരിക്കും പൊതുപ്രവർത്തനം ചെയ്യും പാട്ടുകളും പാടും’’

കഴിഞ്ഞദിവസം മന്ത്രി വി. അബ്ദുറഹിമാനും ജമാഅത്തെ ഇസ്ലാമി നേതാക്കൾക്കൊപ്പം വേദി പങ്കിട്ടിരുന്നു. മലപ്പുറം താനൂരിൽ 'ബൈത്തുസകാത്ത് കേരള' സംഘടിപ്പിച്ച സക്കാത്ത് കാംപെയ്‌നിന്റെ സംസ്ഥാനതല ഉദ്ഘാടനം നിർവഹിച്ചത് മന്ത്രി അബ്ദുറഹിമാനായിരുന്നു. ജമാഅത്തെ ഇസ്ലാമി ഹിന്ദ് സെക്രട്ടറി ജനറൽ ടി. ആരിഫലി, ബൈത്തുസകാത്ത് കേരള ചെയർമാൻ ശൈഖ് മുഹമ്മദ് കാരക്കുന്ന് തുടങ്ങിയവരും മറ്റു ജമാഅത്തെ ഇസ്ലാമി, സോളിഡാരിറ്റി നേതാക്കളും ഈ ചടങ്ങിൽ മന്ത്രിക്കൊപ്പമുണ്ടായിരുന്നു. ജമാഅത്തെ ഇസ്ലാമിക്കെതിരേ സിപിഎം നിരന്തരം രൂക്ഷവിമർശനം ഉന്നയിക്കുന്നതിനിടെയാണ് മന്ത്രി അബ്ദുറഹിമാൻ ജമാഅത്തെ ഇസ്ലാമി നേതാക്കൾക്കൊപ്പം വേദി പങ്കിട്ടതെന്നതും ശ്രദ്ധേയമാണ്.

Content Highlights: CPM MLA Daleema explains her presence at an event, clarifying it was for a palliative care service, not a Jamaat-e-Islami program. Read her statement.