മീഡിയ വണ് ചാനലിന്റെ സംപ്രേഷണം തടഞ്ഞ് വാര്ത്താവിതരണ മന്ത്രാലയം; ഉത്തരവ് മരവിപ്പിച്ച് ഹൈക്കോടതി
കോഴിക്കോട്: മീഡിയ വണ് ചാനലിന്റെ സംപ്രേഷണം കേന്ദ്ര വാര്ത്താ വിതരണ മന്ത്രാലം തടഞ്ഞു. സുരക്ഷാ കാരണങ്ങള് ഉന്നയിച്ചാണ് സംപ്രേഷണം തടഞ്ഞതെന്ന് ചാനല് പ്രസ്താവനയില് വ്യക്തമാക്കി.
സംപ്രേഷണം തടഞ്ഞുകൊണ്ടുള്ള തീരുമാനത്തിന്റെ വിശദാംശങ്ങള് ലഭ്യമാക്കാന് കേന്ദ്ര വാര്ത്താ വിതരണ മന്ത്രാലയം തയ്യാറായിട്ടില്ലെന്നും ഉത്തരവിനെതിരെ നിയമനടപടികള് ആരംഭിച്ചിട്ടുണ്ടെന്നും ചാനല് വ്യക്തമാക്കി.
അതിനിടെ, ഉത്തരവ് നടപ്പാക്കുന്നത് ഹൈക്കോടതി രണ്ട് ദിവസത്തേക്ക് മരവിപ്പിച്ചു. ഇതു സംബന്ധിച്ച് കേന്ദ്ര സര്ക്കാരിനോട് കോടതി വിശദീകരണം തേടി. ഹര്ജി ബുധനാഴ്ച വീണ്ടും പരിഗണിക്കും.
നേരത്തെ ഡല്ഹി കലാപം റിപ്പോര്ട്ട് ചെയ്തതുമായി ബന്ധപ്പെട്ട് മീഡിയ വണ് ചാനലിന് കേന്ദ്ര വാര്ത്താ വിതരണ മന്ത്രാലയം 48 മണിക്കൂര് വിലക്ക് ഏര്പ്പെടുത്തിയിരുന്നു. കേബിള് നെറ്റ് വര്ക്ക് ചട്ടങ്ങളുടെ ലംഘനം ചൂണ്ടിക്കാട്ടിയായിരുന്നു അന്ന് വിലക്ക് ഏര്പ്പെടുത്തിയത്.
ജനാധിപത്യവിരുദ്ധമെന്ന് പ്രതിപക്ഷ നേതാവ്
മീഡിയവൺ ചാനലിന്റെ സംപ്രേക്ഷണം വീണ്ടും തടഞ്ഞ കേന്ദ്രസർക്കാർ നടപടി ജനാധിപത്യ വിരുദ്ധമാണെന്ന് പ്രതിപക്ഷ നേതാവ് വിഡി സതീശൻ അഭിപ്രായപ്പെട്ടു. കാരണങ്ങൾ പറയാതെയാണ് കേന്ദ്ര വാർത്താ വിതരണ പ്രക്ഷേപണ മന്ത്രാലയം മീഡിയവണിന്റെ സംപ്രേക്ഷണം തടഞ്ഞത്. ഇത് സ്വാഭാവിക നീതിയുടെ ലംഘനമാണ്. എന്ത് കാരണത്താൽ സംപ്രേക്ഷണം തടഞ്ഞു എന്നത് വ്യക്തമാക്കാനുള്ള ബാധ്യത കേന്ദ്ര സർക്കാരിനുണ്ടെന്നും അദ്ദേഹം പറഞ്ഞു.
അപ്രിയമായ വാർത്തകളോട് അസഹിഷ്ണുത കാട്ടുന്ന സംഘപരിവാർ നയമാണ് മീഡിയവണിന്റെ പ്രക്ഷേപണം തടയുന്നതിലൂടെ കേന്ദ്ര സർക്കാർ നടപ്പാകുന്നത്. മാധ്യമസ്വാതന്ത്ര്യത്തിന് മേലുള്ള കടന്നുകയറ്റമാണിത്. ഇതിനെതിരെ ശക്തമായ പ്രതിഷേധം ഉയർന്നു വരേണ്ടതുണ്ടെന്ന് പ്രതിപക്ഷ നേതാവ് വ്യക്തമാക്കി.
Content Highlights: MediaOne channel telecast barred by ministry of information and broadcasting
Content Highlights: