‘ദുരന്തനിവാരണത്തിൽ അവഗണിച്ചു’; മുഖ്യമന്ത്രിക്കെതിരെ കെ.യു. ജനീഷ് കുമാർ എംഎൽഎ, ആരോപണങ്ങൾ തള്ളി സതീശൻ

പത്തനംതിട്ട: ജില്ലയിലെ പ്രളയക്കെടുതിയുമായി ബന്ധപ്പെട്ട ദുരിതാശ്വാസ പ്രവർത്തനങ്ങളിലും അവലോകന യോഗങ്ങളിലും തന്നെ ബോധപൂർവ്വം ഒഴിവാക്കിയെന്ന് ആരോപിച്ച് കോന്നി എംഎൽഎ കെ.യു. ജനീഷ് കുമാർ. ദുരന്തമേഖലയിൽ മുഖ്യമന്ത്രി നടത്തുന്ന സന്ദർശനങ്ങൾ വെറും 'ഷൂട്ടിങ്' ആണെന്നും മുൻകൂട്ടി നിശ്ചയിച്ച ലൊക്കേഷനുകളിൽ എത്തി ഫോട്ടോയെടുത്ത് മടങ്ങുകയാണെന്നും എംഎൽഎ കുറ്റപ്പെടുത്തി. കോന്നി വഴി പത്തനംതിട്ടയിലേക്ക് പോയിട്ടും മുഖ്യമന്ത്രി അവിടുത്തെ നാശനഷ്ടങ്ങൾ കാണാൻ തയ്യാറായില്ലെന്ന് ജനീഷ് കുമാർ ആരോപിച്ചു.

കൊക്കാത്തോട്, തേക്കുതോട്, വയ്യാറ്റുപുഴ എന്നിവിടങ്ങളിൽ വലിയ ഉരുൾപൊട്ടലുകൾ ഉണ്ടാവുകയും നിരവധി വീടുകൾ തകരുകയും ചെയ്തിട്ടുണ്ട്. ഏക്കർകണക്കിന് കൃഷിനാശം സംഭവിച്ച മേഖലയിലൂടെ കടന്നുപോയിട്ടും ഒരു മിനിറ്റ് പോലും അവിടെ നിർത്താൻ മുഖ്യമന്ത്രി തയ്യാറായില്ലെന്ന് അദ്ദേഹം പറഞ്ഞു. കോന്നി എംഎൽഎയെ യോഗങ്ങളെക്കുറിച്ച് അറിയിക്കേണ്ടതില്ലെന്ന് മുഖ്യമന്ത്രിയുടെ ഓഫീസിൽനിന്ന് നിർദ്ദേശം നൽകിയതായാണ് തനിക്ക് അറിയാൻ കഴിഞ്ഞതെന്നും ഏകോപനത്തിലെ പോരായ്മകൾ ചൂണ്ടിക്കാട്ടുമെന്ന് ഭയന്നാണ് തന്നെ ഒഴിവാക്കിയതെന്നും ജനീഷ് കുമാർ ആരോപിക്കുന്നു.

ജില്ലയുടെ ചുമതലയുള്ള മന്ത്രി പി.സി. വിഷ്ണുനാഥിനെതിരെയും എംഎൽഎ രൂക്ഷമായ വിമർശനം ഉന്നയിച്ചു. മന്ത്രി കൃത്യമായ ഏകോപനം നടത്തുന്നില്ലെന്നും റൂമിൽ വിശ്രമിക്കുകയാണെന്നുമാണ് എംഎൽഎയുടെ ആക്ഷേപം. മന്ത്രി വിളിച്ച ഒരു യോഗത്തിൽ ജനപ്രതിനിധികൾക്ക് പകരം യുഡിഎഫ് നേതാക്കളാണ് പങ്കെടുത്തതെന്നും ഫീൽഡിലെ യഥാർത്ഥ അവസ്ഥ മനസ്സിലാക്കാൻ സർക്കാർ സംവിധാനങ്ങൾ തയ്യാറാകുന്നില്ലെന്നും അദ്ദേഹം കൂട്ടിച്ചേർത്തു. നിലവിൽ സർക്കാർ സംവിധാനങ്ങൾ നോക്കുകുത്തിയാണെന്നും നാശനഷ്ടങ്ങളുടെ കണക്കെടുപ്പ് പോലും കൃത്യമായി നടക്കുന്നില്ലെന്നും ജനീഷ് കുമാർ ആരോപിച്ചു.

എന്നാൽ, കോന്നി എംഎൽഎയുടെ ആരോപണങ്ങൾ മുഖ്യമന്ത്രി തള്ളി. പത്തനംതിട്ടയിൽ നടന്ന അവലോകന യോഗത്തിലേക്ക് എംഎൽഎമാരെ ആരെയും ക്ഷണിച്ചിരുന്നില്ലെന്ന് മുഖ്യമന്ത്രി വിശദീകരിച്ചു. ജില്ലാ കളക്ടർമാരും വകുപ്പ് മേധാവികളും മാത്രം പങ്കെടുത്താൽ മതിയെന്നതായിരുന്നു തീരുമാനം. ദുരന്തം ഏറ്റവും കൂടുതൽ ബാധിച്ച ആറന്മുള, റാന്നി, തിരുവല്ല തുടങ്ങിയ മേഖലകളിലാണ് താൻ സന്ദർശനം നടത്തിയത്. കോന്നിയിലും അടൂരും പോയിട്ടില്ലെന്നും മുഖ്യമന്ത്രി വ്യക്തമാക്കി. ദുരന്തനിവാരണ പ്രവർത്തനങ്ങൾക്കായി ജില്ലാ ഭരണകൂടത്തിന് പൂർണ അധികാരം നൽകിയിട്ടുണ്ടെന്നും അദ്ദേഹം കൂട്ടിച്ചേർത്തു.

Content Highlights: Konni MLA K U Jenish Kumar accused the Chief Minister and district minister of neglecting flood relief operations in Pathanamthitta and excluding him from review meetings, charges that the Chief Minister subsequently denied.