ചേരാനല്ലൂർ വീഴ്ചയിൽ കടുത്ത നടപടി; കൊച്ചി സിറ്റി പോലീസ് കമ്മിഷണറും തെറിച്ചു, കാളിരാജ് മഹേഷിനെ മാറ്റി

കൊച്ചി: ചേരാനല്ലൂർ വാഹനാപകടക്കേസിൽ നടപടികളെടുക്കുന്നുതിലുണ്ടായ വീഴ്ചകളെത്തുടർന്ന് കൊച്ചി സിറ്റി പോലീസ് കമ്മിഷണറെ മാറ്റി. കാളിരാജ് മഹേഷ് കുമാറിനെയാണ് മാറ്റിയത്. പകരം നിലവിൽ ദക്ഷിണ മേഖല ഐ.ജി.യായ ആർ. നിശാന്തിനിയെ പുതിയ കൊച്ചി സിറ്റി പോലീസ് കമ്മീഷണറായി നിയമിച്ച് ഉത്തരവിറങ്ങി. കാളിരാജ് മഹേഷിന് പകരം ചുമതല നൽകിയിട്ടില്ല. അതോടൊപ്പം പി. പ്രകാശിനെ പുതിയ ദക്ഷിണ മേഖല ഐ.ജി.യായും നിയമിച്ചു.  ആഭ്യന്തര മന്ത്രി രമേശ് ചെന്നിത്തലയുടെ നിർദേശപ്രകാരമാണ് നടപടി.

ചേരാനല്ലൂർ അപകടവുമായി ബന്ധപ്പെട്ട് പോലീസ് തലത്തിലുണ്ടായ ഗുരുതര വീഴ്ചകളെത്തുടർന്നാണ് അടിയന്തര അഴിച്ചുപണി. സംഭവം അന്വേഷിക്കാൻ എ.ഡി.ജി.പി. പി. വിജയൻ നേരിട്ടെത്തി നടത്തിയ പരിശോധനയിൽ പോലീസിന്റെ ഭാഗത്തുനിന്ന് വലിയ വീഴ്ചകൾ സംഭവിച്ചതായി കണ്ടെത്തിയിരുന്നു. ചേരാനല്ലൂർ പോലീസ് സ്റ്റേഷനിലെ എസ്.എച്ച്.ഒ., എസ്.ഐ., സി.ഐ. അടക്കമുള്ള ഉദ്യോഗസ്ഥർക്കെതിരേ നേരത്തേ നടപടി സ്വീകരിച്ചിരുന്നെങ്കിലും ഉയർന്ന ഉദ്യോഗസ്ഥർക്കെതിരേ നടപടിയുണ്ടാകാത്തതിൽ പോലീസുകാർക്കിടയിൽ എതിർപ്പും അസ്വാരസ്യങ്ങളും നിലനിന്നിരുന്നു.

ഉദ്യോഗസ്ഥരുടെ ഭാഗത്തുനിന്നുണ്ടായ വീഴ്ച ആഭ്യന്തര വകുപ്പിന് വലിയ നാണക്കേടും രാഷ്ട്രീയ പ്രതിസന്ധിയും സൃഷ്ടിച്ചിരുന്നു. ഉയർന്ന ഉദ്യോഗസ്ഥ തലത്തിലുണ്ടായ സൂപ്പർവൈസറി വീഴ്ചകൾകൂടി കണക്കിലെടുത്താണ് സിറ്റി പോലീസ് കമ്മിഷണറെ ഉൾപ്പെടെ മാറ്റിക്കൊണ്ട് ഉന്നതതലത്തിൽ അഴിച്ചുപണി നടത്താൻ തീരുമാനിച്ചത്.

ചേരാനല്ലൂരിൽ കഴിഞ്ഞ ഞായറാഴ്ചയാണ് ജഡ്ജിയുടെ മകനായ 17 വയസ്സുകാരൻ ഓടിച്ച ബെൻസ് കാറിടിച്ച് സ്‌കൂട്ടർ യാത്രക്കാരനായ ജയബാലകൃഷ്ണൻ മരിച്ചത്. അർധരാത്രി രണ്ടരയോടെയാണ് അപകടം. വിദ്യാർഥി സ്ഥിരമായി ബൈക്ക് ഓടിക്കാറുണ്ടെന്നും ഫ്‌ളാറ്റിലെ സെക്യൂരിറ്റി ഉദ്യോഗസ്ഥന്റെ മൊഴിയുണ്ട്. ഇതടക്കമുള്ള സി.സി.ടി.വി. ദൃശ്യങ്ങളും പോലീസ് ശേഖരിച്ചു. സംഭവത്തിൽ പ്രായപൂർത്തിയാവാത്ത മകന് വാഹനമോടിക്കാൻ കൊടുത്തതിന് പിതാവായ അഡീഷണൽ സെഷൻസ് ജഡ്ജിക്കെതിരെയും കേസെടുത്തിരുന്നു.

Content Highlights: Kochi City Police Commissioner Kaliraj Mahesh Kumar replaced due to lapses in handling the Cheranalloor accident case.