CPM എന്തിനാണ് മലപ്പുറത്തെ ആക്ഷേപിക്കുന്നത്, നന്ദകുമാറിന്റെ പരാമർശം ആ പാർട്ടിയുടെ വർഗീയരീതി- കെ.എം. ഷാജി

കോഴിക്കോട്: സിപിഎം നേതാവ് പി. നന്ദകുമാറിന്റെ മലപ്പുറം വിരുദ്ധപരാമർശത്തിൽ പ്രതികരണവുമായി മന്ത്രി കെ.എം ഷാജി. സിപിഎം എന്തിനാണ് ഒരു ജില്ലയെ ഇത്തരത്തിൽ ആക്ഷേപിക്കുന്നതെന്നും അവരുടെ ഉള്ളിലുള്ള ധാരണ പുറത്ത് വരികയാണെന്നും അദ്ദേഹം പറഞ്ഞു. ‘മതമൗലികവർഗീയവാദികളുടെ കൂടാണ് മലപ്പുറം ജില്ല’ എന്നായിരുന്നു പൊന്നാനി മുൻ എംഎൽഎ കൂടിയായ നന്ദകുമാറിന്റെ കഴിഞ്ഞദിവസത്തെ പരാമർശം. 

സിപിഎം നന്നാവുകയല്ല ചെയ്യുന്നതെന്നും നന്ദകുമാറിന്റേത് വളരെ മോശം പരാമർശമാണെന്നും ഷാജി പറഞ്ഞു. കേവലമൊരു പ്രദേശത്തെയല്ല സമൂഹത്തെയും സമുദായത്തെയുമാണ് അവർ ലക്ഷ്യം വയ്ക്കുന്നതെന്നും അദ്ദേഹം കൂട്ടിച്ചേർത്തു.

‘കേരളത്തിൽ അത്ഭുതമുണ്ടാക്കുന്ന മഹാമനുഷ്യരുടെ നാട് കൂടിയാണ് മലപ്പുറം. നന്ദകുമാറിന്റെ പരാമർശം ആയാൾ പ്രതിനിധീകരിക്കുന്ന പാർട്ടിയുടെ വർഗീയരീതിയാണ്. അതിനെ മുസ്ലീം വിരുദ്ധം എന്നൊക്കെ പറഞ്ഞിട്ട് മാർക്കറ്റ് ചെയ്യുന്നതിനോട് താൽപര്യമില്ലെന്നും കെ.എം ഷാജി ചൂണ്ടിക്കാട്ടി. സിപിഎമ്മിന്റെ ശക്തികേന്ദ്രമായ കണ്ണൂരിൽ ഉൾപ്പെടെ സിപിഎം തോറ്റു. എന്നുവെച്ച് അവിടെയുള്ള ആളുകളെല്ലാം വെട്ടും കുത്തും തൊഴിലാക്കിയവരാണ് എന്ന് പറയാൻ കഴിയുമോ. അങ്ങനെ പറഞ്ഞാൽ എത്രമാത്രം അബദ്ധമാകും അത്. കണ്ണൂരിൽ എത്ര നല്ല മനുഷ്യരുണ്ട്. സിപിഎമ്മിന് സ്വാധീനമുള്ളത് കൊണ്ട് ആ നാട് മോശമെന്ന് പറയാൻ കഴിയുമോയെന്നും ഷാജി ചോദിച്ചു.

പിണറായി വിജയനിൽനിന്നും അദ്ദേഹത്തിന്റെ കൂട്ടരിൽനിന്നും പാർട്ടി ഇപ്പോഴും മോചിതരായിട്ടില്ല. അദ്ദേഹത്തെ കാണുമ്പോൾ മുട്ടുവിറക്കുന്ന അഭിപ്രായങ്ങൾ മാറ്റുന്ന സഖാക്കൾ ഇപ്പോഴും മാറിയിട്ടില്ലെന്നും ഷാജി ചൂണ്ടിക്കാട്ടി.

ലീഗ് ജനപ്രതിനിധികളുടെ യോഗത്തിൽ ഇന്ന് ഗൗരവമുള്ള ചർച്ച നടന്നെന്നും ഗവേണൻസിനെ പറ്റിയാണ് യോഗത്തിൽ ചർച്ചയായതെന്നും ഷാജി പറഞ്ഞു ജനപ്രതിനിധികൾ ഓഡിറ്റ് ചെയ്യപ്പെടുന്നത് നല്ലതല്ലേ? മുസ്ലിംലീഗിൽ പെരുമാറ്റച്ചട്ടമൊക്കെ നേരത്തെയുണ്ട്. എങ്കിൽ മാത്രമേ അംഗത്വം ലഭിക്കുകയുള്ളുവെന്നും അദ്ദേഹം വ്യക്തമാക്കി. 

Content Highlights: KM Shaji strongly condemned CPM leader P Nandhakumar's remarks targeting Malappuram district., Shaji accused the CPM of fostering communal mindset and targeting specific communities., He compared the situation to Kannur, stating that political leanings do not define the character of a region's people., He also mentioned discussions on governance and code of conduct during the Muslim League representatives meeting.