ശിരോവസ്ത്ര വിവാദം: സ്കൂള് അധികൃതരുടേത് ഗുരുതര വീഴ്ച, തിരുത്തണമെന്ന് വിദ്യാഭ്യാസ മന്ത്രി
തിരുവനന്തപുരം: എറണാകുളം പള്ളുരുത്തി സെന്റ് റീത്താസ് പബ്ലിക് സ്കൂളില് ശിരോവസ്ത്രം ധരിച്ചതിന്റെ പേരില് എട്ടാം ക്ലാസ് വിദ്യാര്ഥിനിയെ ക്ലാസില് കയറ്റാതെ പുറത്തുനിര്ത്തിയ സംഭവത്തില് സര്ക്കാര് ഇടപെട്ടതായി വിദ്യാഭ്യാസമന്ത്രി വി. ശിവന്കുട്ടി. വിദ്യാര്ഥിനിയുടെ പിതാവ് നല്കിയ പരാതിയുടെ അടിസ്ഥാനത്തില് എറണാകുളം വിദ്യാഭ്യാസ ഉപഡയറക്ടര് അന്വേഷണം നടത്തുകയും സ്കൂള് അധികൃതരുടെ ഭാഗത്ത് ഗുരുതരമായ വീഴ്ച സംഭവിച്ചതായി കണ്ടെത്തുകയും ചെയ്തതായി അദ്ദേഹം ഫെയ്സ്ബുക്ക് കുറിപ്പില് വ്യക്തമാക്കി.
മന്ത്രിയുടെ ഫെയ്സ്ബുക്ക് കുറിപ്പിന്റെ പൂര്ണരൂപം
എറണാകുളം പള്ളുരുത്തി സെന്റ് റീത്താസ് പബ്ലിക് സ്കൂളില് ശിരോവസ്ത്രം ധരിച്ചതിന്റെ പേരില് എട്ടാം ക്ലാസ് വിദ്യാര്ഥിനിയെ ക്ലാസില് കയറ്റാതെ പുറത്തുനിര്ത്തിയ സംഭവത്തില് സര്ക്കാര് ഇടപെട്ടിട്ടുണ്ട്. വിദ്യാര്ഥിനിയുടെ പിതാവ് നല്കിയ പരാതിയുടെ അടിസ്ഥാനത്തില് എറണാകുളം വിദ്യാഭ്യാസ ഉപഡയറക്ടര് അന്വേഷണം നടത്തുകയും സ്കൂള് അധികൃതരുടെ ഭാഗത്ത് ഗുരുതരമായ വീഴ്ച സംഭവിച്ചതായി കണ്ടെത്തുകയും ചെയ്തു.
വിദ്യാഭ്യാസ ഉപഡയറക്ടറുടെ അന്വേഷണ റിപ്പോര്ട്ട് പ്രകാരം, വിദ്യാര്ഥിനിയെ ശിരോവസ്ത്രം ധരിച്ചതിന്റെ പേരില് ക്ലാസില്നിന്ന് പുറത്താക്കിയത് ഗുരുതരമായ കൃത്യവിലോപവും വിദ്യാഭ്യാസ അവകാശ നിയമത്തിന്റെ ലംഘനവുമാണ്. ഇന്ത്യന് ഭരണഘടന ഉറപ്പുനല്കുന്ന പൗരന്റെ മൗലികമായ മതാചാര സ്വാതന്ത്ര്യത്തിന് വിരുദ്ധമായ നടപടിയാണ് സ്കൂളിന്റെ ഭാഗത്തുനിന്നുണ്ടായതെന്നും റിപ്പോര്ട്ടില് പറയുന്നു.
സംഭവത്തിന്റെ അടിസ്ഥാനത്തില്, വിദ്യാര്ഥിനിക്ക് മതവിശ്വാസത്തിന്റെ ഭാഗമായ ശിരോവസ്ത്രം ധരിച്ച് സ്കൂളില് തുടര്പഠനം നടത്താന് സ്കൂള് അനുമതി നല്കണം. ശിരോവസ്ത്രത്തിന്റെ നിറവും ഡിസൈനും സ്കൂള് അധികൃതര്ക്ക് തീരുമാനിക്കാം. വിദ്യാര്ഥിനിക്കും രക്ഷിതാക്കള്ക്കും ഉണ്ടായ മാനസിക വിഷമങ്ങള് പൂര്ണ്ണമായി പരിഹരിച്ച്, ഇതുസംബന്ധിച്ച റിപ്പോര്ട്ട് 2025 ഒക്ടോബര് 15-ന് രാവിലെ 11 മണിക്ക് മുന്പായി സമര്പ്പിക്കാന് സ്കൂള് പ്രിന്സിപ്പലിനും മാനേജര്ക്കും കര്ശന നിര്ദ്ദേശം നല്കിയിട്ടുണ്ട്.
മതേതര മൂല്യങ്ങള് ഉയര്ത്തിപ്പിടിക്കുന്ന കേരളത്തില് ഒരു വിദ്യാര്ത്ഥിയ്ക്കും ഇത്തരം ദുരനുഭവങ്ങള് ഉണ്ടാകാന് പാടില്ല. ഭരണഘടനാപരമായ അവകാശങ്ങള് ലംഘിക്കാന് ഒരു വിദ്യാഭ്യാസ സ്ഥാപനത്തെയും അനുവദിക്കില്ല. സര്ക്കാര് ഈ വിഷയത്തില് തുടര്ന്നും ജാഗ്രത പുലര്ത്തും.
അതേസമയം, വിഷയത്തില് ഇതിനകം സ്കൂളും കുട്ടിയുടെ രക്ഷാകര്ത്താക്കളും തമ്മില് സമവായത്തിലെത്തിയിട്ടുണ്ട്. സ്കൂളിലെ ചട്ടമനുസരിച്ച് ശിരോവസ്ത്രം ഒഴിവാക്കി എത്താമെന്ന് വിദ്യാര്ഥിനിയുടെ പിതാവ് സമ്മതിച്ച സാഹചര്യത്തിലാണ് തര്ക്കത്തിന് പരിഹാരമായത്.
ജനപ്രതിനിധികള് സ്കൂള് അധികൃതരുമായും വിദ്യാര്ഥിയുടെ രക്ഷാകര്ത്താക്കളുമായും നടത്തിയ ചര്ച്ചയിലാണ് പ്രശ്നത്തിന് പരിഹാരമുണ്ടായിരിക്കുന്നത്. യൂണിഫോമുമായി ബന്ധപ്പെട്ട തര്ക്കം മറ്റുതരത്തിലേക്കുള്ള ചര്ച്ചയിലേക്ക് പോകാതിരിക്കാന് മാനേജ്മെന്റിന്റെ തീരുമാനം അംഗീകരിക്കുന്നെന്ന് കുട്ടിയുടെ പിതാവ് പ്രതികരിച്ചു.
Content Highlights: v sivankutty on ernakulam school hijab controversy