വിറ്റത് കോഴിയിറച്ചിയും തണ്ണിമത്തനും, പിന്നാലെ അക്കൗണ്ട് ഫ്രീസായി; വഴിമുട്ടി ചെറുകിട കച്ചവടക്കാർ

യു.പി.ഐ. ഇടപാടിന്റെ പേരിൽ ബാങ്ക് അക്കൗണ്ട് മരവിപ്പിക്കുന്നുവെന്ന പരാതിയുമായി രംഗത്തെത്തുന്നവരുടെ എണ്ണം വർധിക്കുന്നു. ഗുജറാത്ത്, തെലങ്കാന പോലുള്ള സംസ്ഥാനങ്ങളിലെ സൈബർ സെല്ലിന്റെ നിർദേശപ്രകാരമാണ് കേരളത്തിലടക്കം നിരവധി പേരുടെ അക്കൗണ്ടുകൾ പല  ബാങ്കുകളും മരവിപ്പിക്കുന്നത്. നിയമപരമല്ലാത്ത  പണം ഒട്ടേറെ തലത്തിൽ കൈമാറി വന്ന് യു.പി.ഐ. വഴി കച്ചവടക്കാരുടേയും മറ്റും അക്കൗണ്ടിൽ എത്തുന്നുവെന്നാണ് പരാതി. എന്നാൽ, ഇത് സംബന്ധിച്ച് വ്യാപാരികൾക്കോ മറ്റോ അറിവില്ല താനും. ഇതോടെ ചെറുകിട കച്ചവടക്കാരുടെ അക്കൗണ്ട് അടക്കമാണ് വലിയ രീതിയിൽ മരവിപ്പിക്കപ്പെട്ടിട്ടുള്ളത്.   

'തണ്ണിമത്തൻ വാങ്ങിയ ആൾ കടയിൽ വെച്ചിട്ടുണ്ടായിരുന്ന സ്‌കാനർ വഴി 120 രൂപ ട്രാൻസ്ഫർ ചെയ്തു. ഇതാണ്  അക്കൗണ്ട് മരവിപ്പിക്കാൻ കാരണമെന്നാണ് ബാങ്കുമായി ബന്ധപ്പെട്ടപ്പോൾ പറഞ്ഞത്. സാധനങ്ങൾ വാങ്ങാൻ ഇപ്പോൾ കടം വാങ്ങേണ്ട അവസ്ഥയാണ്.'- പറയുന്നത് കൊച്ചി മുപ്പത്തടത്ത് ബേക്കറി നടത്തുന്ന നൗഷാദ്. ഇതൊരു ഒറ്റപ്പെട്ട സംഭവമല്ലെന്ന് സംസ്ഥാനത്തെ ചെറുകിട വ്യാപാര മേഖലയുമായി ബന്ധപ്പെട്ടവരും പറയുന്നു. എന്നാൽ ഈ അക്കൗണ്ടുകൾക്ക് എന്താണ് സംഭവിക്കുന്നത്? എവിടെയാണ് പരാതിപ്പെടേണ്ടത്? ആരാണ് പരിഹാരം കണ്ടെത്തേണ്ടത്? എന്തു ചെയ്യണമെന്നറിയാതെ പരിഭ്രമിക്കുന്നവരാണു കൂടുതലും.  അറിയാത്ത സാഹചര്യമാണ് പലർക്കും.

Content Highlights: digital payment account freezing complaints