സഹകരണബാങ്കുകളുടെ സോഫ്റ്റ്‌വേർ; കരാര്‍ 'ദിനേശിന്' നല്‍കിയേക്കും
തിരുവനന്തപുരം: സംസ്ഥാനത്തെ പ്രാഥമിക സഹകരണബാങ്കുകളിൽ ഏകീകൃത സോഫ്റ്റ്‌വേർ നടപ്പാക്കാനുള്ള സർക്കാർ പദ്ധതി സി.പി.എം. നിയന്ത്രണത്തിലുള്ള ദിനേശ് സഹകരണസംഘത്തെ ഏൽപ്പിച്ചേക്കും. 206.46 കോടിരൂപയുടെ കരാർ നേരത്തേ ടാറ്റ കൺസൾട്ടൻസി സർവീസസിന് (ടി.സി.എസ്.) നൽകി സർക്കാർ ഉത്തരവിറക്കിയിരുന്നു.
എന്നാൽ, കരാർ ഒപ്പുവെക്കുന്നത് വൈകി. ചെലവ് കൂടിയത് ചൂണ്ടിക്കാട്ടി പദ്ധതി ഏറ്റെടുക്കുന്നതിനുള്ള വൈമനസ്യം ടി.സി.എസ്. സർക്കാരിനെ അറിയിക്കുകയുംചെയ്തു. ഇതോടെയാണ് കരാർ റദ്ദാക്കി ബദൽമാർഗം സഹകരണവകുപ്പ് ആലോചിച്ചത്.
സംസ്ഥാനത്തെ മൊത്തം സഹകരണബാങ്കുകൾക്കും സേവനം ഉറപ്പാക്കുന്നതിന് ദിനേശിന് കഴിയുമോയെന്നതിൽ സഹകരണവകുപ്പിന് സംശയമുണ്ട്. അതിനാൽ, ദിനേശിനെയും ഊരാളുങ്കലിനെയും സേവനദാതാക്കളാക്കി സംയുക്ത ഏജൻസിക്ക് കരാർ നൽകാനും ആലോചിക്കുന്നുണ്ട്. പ്രാഥമികചർച്ച നടന്നുകഴിഞ്ഞു.
ദിനേശ് സഹകരണസംഘത്തിന് ഐ.ടി. വിഭാഗമുണ്ട്. ഇവരുടെ സോഫ്റ്റ്‌വേർ പല ബാങ്കുകളും ഉപയോഗിക്കുന്നുണ്ട്. ടെൻഡർ വിളിക്കാതെ പുതിയ ഏജൻസിയെ എങ്ങനെ നിശ്ചയിക്കുമെന്നതിൽ ആശയക്കുഴപ്പമുണ്ട്. സർക്കാർ പദ്ധതി ടെൻഡറില്ലാതെ ഏറ്റെടുക്കാനാവുന്ന അക്രഡിറ്റഡ് ഏജൻസിയാണ് ഊരാളുങ്കൽ. അതിനാൽ, അവർക്ക് കരാർ നൽകാനാകുമെന്നാണ് സഹകരണവകുപ്പ് കണക്കാക്കുന്നത്.
അതേസമയം, ഊരാളുങ്കലിന്റെ സൈബർ സ്ഥാപനം, പ്രൈവറ്റ് ലിമിറ്റഡ് കമ്പനിയാണ്. ഇതിനുള്ള കരാർ അക്രഡിറ്റഡ് ഏജൻസിയുടെ പരിധിയിൽ ഉൾപ്പെടുമോയെന്ന സംശയവും നിലനിൽക്കുന്നുണ്ട്.
പ്രാഥമിക സഹകരണബാങ്കുകൾക്ക് കേന്ദ്രസർക്കാർ ഏകീകൃത സോഫ്റ്റ്‌വേർ പദ്ധതി പ്രഖ്യാപിച്ചിട്ടുണ്ട്. ഇത് കേരളത്തിന് സൗജന്യമായാണ് ലഭിക്കുക. അതിന്റെ ഭാഗമാകേണ്ടതില്ലെന്ന് സർക്കാർ തീരുമാനിച്ചതിന്റെ അടിസ്ഥാനത്തിലാണ് സ്വന്തം പദ്ധതിയുമായി മുന്നോട്ടുപോകുന്നത്.
Content Highlights: co operative banks software agreement may be given to dinesh