ഏകീകൃത കുർബാന: തൃപ്പൂണിത്തുറ സെന്റ് മേരീസ് ഫൊറോന പള്ളിയിൽ സംഘർഷം

കൊച്ചി: തൃപ്പൂണിത്തുറ സെന്റ് മേരീസ് ഫൊറോന പള്ളിയിൽ സംഘർഷം. ഏകീകൃത കുർബാന അനുകൂലികളും ജനാഭിമുഖ കുർബാന അനുകൂലികളും തമ്മിലാണ് സംഘർഷമുണ്ടായത്. ഞായറാഴ്ച പള്ളിയിലെ സിയോൻ ഓഡിറ്റോറിയത്തിൽ ജനാഭിമുഖ കുർബാന അനുകൂലികൾ സംഘടിപ്പിച്ച ഫൊറോന വിശ്വാസ സംഗമത്തോടനുബന്ധിച്ചാണ് പള്ളിവളപ്പിൽ സംഘർഷമുണ്ടായത്. 

സിയോൻ ഓഡിറ്റോറിയത്തിൽ  സഭയ്ക്കെതിരെയുള്ള സമ്മേളനം നടത്തുവാൻ പാടില്ലെന്നാവശ്യപ്പെട്ട്  ഫൊറോനയിലെ ഏകീകൃത കുർബാന അനുകൂലികളുടെ സംഘടനയായ ദൈവജന മുന്നേറ്റം കഴിഞ്ഞ ദിവസം രംഗത്തെത്തിയിരുന്നു. പള്ളിവളപ്പിൽ സഭയ്ക്കെതിരെയുള്ള യോഗം നടത്തിയാൽ പ്രതിരോധിക്കുമെന്ന് കാണിച്ച് ഫൊറോന വികാരിക്കും അതിരൂപതാ അധികാരികൾക്കും പോലീസിനും ഏകീകൃത കുർബാന അനുകൂലികൾ കത്തും നൽകിയിരുന്നു. സമ്മേളനം പള്ളി വളപ്പിൽനിന്നും മാറ്റിവയ്ക്കണമെന്ന്  പോലീസുൾപ്പെടെ ഫൊറോന വികാരിയോട് ആവശ്യപ്പെട്ടിരുന്നെങ്കിലും സമ്മേളനവുമായി വിമതപക്ഷം മുന്നോട്ടു പോകുകയായിരുന്നു.