സ്വകാര്യ കമ്പനിക്കുവേണ്ടി 60 കണ്ടെയ്‌നർ റബ്ബർ വിഴിഞ്ഞം തുറമുഖത്ത്; എത്തിയത് ഐവറി കോസ്റ്റിൽ നിന്ന്

#ന്യൂസ് ഡെസ്ക്
റബ്ബർ കയറ്റിയ കണ്ടെയ്‌നറുകളുമായി വിഴിഞ്ഞം അന്താരാഷ്ട്ര തുറമുഖത്ത് അടുത്ത എം.എസ്.സിയുടെ ബിയാട്രീസ് എന്ന ചരക്കുകപ്പൽ
റബ്ബർ കയറ്റിയ കണ്ടെയ്‌നറുകളുമായി വിഴിഞ്ഞം അന്താരാഷ്ട്ര തുറമുഖത്ത് അടുത്ത എം.എസ്.സിയുടെ ബിയാട്രീസ് എന്ന ചരക്കുകപ്പൽ

തിരുവനന്തപുരം: എം.ആർ.എഫ്. കമ്പനിക്കുവേണ്ടി 1,500 മെട്രിക് ടൺ സ്വാഭാവിക റബ്ബറുമായി 60 കണ്ടെയ്നറുകൾ വിഴിഞ്ഞത്തെത്തി. എം.എസ്.സിയുടെ ബിയാട്രിസ് എന്ന കപ്പലിലാണ് ചരക്ക് എത്തിയത്. കയറ്റിയിറക്ക് മേഖലയ്ക്ക് മുഖ്യനേട്ടമായെന്ന് തുറമുഖ അധികൃതർ. പശ്ചിമ ആഫ്രിക്കയിലെ ഐവറികോസ്റ്റിലുള്ള അബിജാൻ തുറമുഖത്തുനിന്നാണ് റബ്ബറുമായി കപ്പലെത്തിയത്.

കസ്റ്റംസ് നടപടികൾ പൂർത്തിയാക്കിയശേഷം അടുത്തദിവസം ഇത് റോഡുമാർഗം കോട്ടയത്തുള്ള ഇൻലാൻഡ് കണ്ടെയ്‌നർ ഡിപ്പോയിലേക്ക് (ഐസിഡി)കൊണ്ടുപോകും. മുംബൈ വഴിയാണ് എം.ആർ.എഫ്. കമ്പനി ചരക്കുകൾ എത്തിച്ചിരുന്നത്. ഇവ ലക്ഷ്യസ്ഥാനത്ത് എത്തിക്കുന്നതിന് ഏകദേശം ഒരുമാസമെടുക്കും.

എന്നാൽ, വിഴിഞ്ഞം തുറമുഖംവഴി എത്തിച്ച റബ്ബറിനെ കോട്ടയത്തെ ഐസിഡിയിൽ എത്തിക്കുന്നതോടെ ചരക്കുനീക്കം വേഗത്തിലാക്കാനാകും. ഇവിടെയും കസ്റ്റംസിന്റെ നടപടികൾ പൂർത്തിയാക്കാനുണ്ട്. തുടർന്ന് എം.ആർ.എഫിന്റെ കൊച്ചിയിലുള്ള വെയർഹൗസിലേക്ക് കൊണ്ടുപോകും.

Content Highlights: Sixty containers carrying 1,500 metric tonnes of natural rubber for MRF arrived at Vizhinjam port from Ivory Coast aboard MSC Beatrice and will be moved by road to Kottayam ICD, speeding up cargo transit.