രക്ഷാദൗത്യം വൈകുന്നു; തൊഴിലാളികളെ വ്യാഴാഴ്ച രാവിലെ 8 മണിയോടെ പുറത്തെത്തിക്കാനാകുമെന്ന് ദൗത്യസംഘം

ദെഹ്‌റാദൂണ്‍: ഉത്തരകാശിയിലെ സില്‍ക്യാരയില്‍ നിര്‍മ്മാണത്തിലിരിക്കുന്ന തുരങ്കത്തില്‍ അകപ്പെട്ടവരെ പുറത്തെത്തിക്കാനുള്ള രക്ഷാപ്രവര്‍ത്തനം വീണ്ടും തടസ്സപ്പെട്ടു. തടസ്സങ്ങൾ നീക്കി വ്യാഴാഴ്ച രാവിലെ എട്ടുമണിയോടെ തൊഴിലാളികളെ പുറത്തെത്തിക്കാനാകുമെന്നാണ് പ്രതീക്ഷയെന്ന് രക്ഷാപ്രവർത്തകർ വ്യക്തമാക്കി. നിര്‍മ്മാണത്തിന്റെ ഭാഗമായ ലോഹാവശിഷ്ടങ്ങളില്‍ ഇരുമ്പുപൈപ്പ് തട്ടിയതാണ് പുതിയ പ്രതിസന്ധിക്ക് കാരണം. ഇത് മുറിച്ച് നീക്കി ഡ്രില്ലിങ് പുനരാരംഭിക്കാനുള്ള ശ്രമം ഊര്‍ജ്ജിതമായി പുരോഗമിക്കുകയാണ്. 

അതേസമയം എല്ലാ തൊഴിലാളികളെയും സുരക്ഷിതരായി പുറത്തെത്തിക്കുമെന്ന് ഹിമാചല്‍ പ്രദേശ് മുഖ്യമന്ത്രി സുഖ്‌വിന്ദര്‍ സിങ് സുഖു പറഞ്ഞു. ഹിമാചല്‍ ഉള്‍പ്പെടെ രാജ്യത്തിന്റെ വിവിധ ഭാഗങ്ങളില്‍ നിന്നുള്ള തൊഴിലാളികള്‍ തുരങ്കത്തില്‍ കുടുങ്ങിയിട്ടുണ്ട്. ഇവരെല്ലാം സുരക്ഷിതരായി വീടുകളിലെത്തണമെന്നാണ് തങ്ങളുടെ ആഗ്രഹം. അതിനായുള്ള എല്ലാ പരിശ്രമങ്ങളും പുരോഗമിക്കുകയാണെന്നും തൊഴിലാളികള്‍ സുരക്ഷിതരായി പുറത്തെത്തുമെന്നും അദ്ദേഹം പറഞ്ഞു. 

11 ദിവസം മുമ്പ് നവംബര്‍ 12-നായിരുന്നു ഉത്തരകാശിയിലെ സില്‍ക്യാരയില്‍ നിര്‍മ്മാണത്തിലിരിക്കുന്ന തുരങ്കം തകര്‍ന്നുവീണത്. ഉള്ളില്‍ കുടുങ്ങിയ 41 രക്ഷാപ്രവര്‍ത്തകരെയും പുറത്തെടുക്കാനുള്ള രക്ഷാപ്രവര്‍ത്തനം അന്ന് മുതല്‍ ആരംഭിച്ചതാണ്. 

കഴിഞ്ഞ ദിവസമാണ് തുരങ്കത്തില്‍ കുടുങ്ങിയവരുടെ ആദ്യദൃശ്യങ്ങള്‍ പുറംലോകത്തിന് ലഭിച്ചത്. എന്‍ഡോസ്‌കോപ്പിക് ഫ്‌ളക്‌സി ക്യാമറ എത്തിച്ചാണ് തൊഴിലാളികളുടെ ദൃശ്യം ലഭ്യമാക്കിയത്. തുരങ്കത്തില്‍ കുടുങ്ങിയവരുമായി വിജയകരമായി സമ്പര്‍ക്കം പുലര്‍ത്താന്‍ കഴിഞ്ഞത് രക്ഷാദൗത്യത്തിലെ നിര്‍ണ്ണായകമായ നാഴികക്കല്ലായിരുന്നു. 

ടണലിനുള്ളില്‍ തകര്‍ന്ന അവശിഷ്ടങ്ങള്‍ക്കിടയിലൂടെ ഡ്രില്‍ ഉപയോഗിച്ച് ദ്വാരം ഉണ്ടാക്കി സ്റ്റീല്‍ പൈപ്പ് കടത്തിവിടാനും ഇതുവഴി കുടുങ്ങിക്കിടക്കുന്ന തൊഴിലാളികളെ രക്ഷപ്പെടുത്താനും ആദ്യശ്രമം നടത്തിയെങ്കിലും പരാജയപ്പെട്ടു. ഇതിനിടയില്‍ പ്രദേശത്ത് വീണ്ടും മണ്ണിടിച്ചിലുണ്ടായത് ആശങ്ക പരത്തി. തുരങ്കത്തില്‍ പെട്ടവര്‍ക്ക് പനി ഉള്‍പ്പെടെയുള്ള ശാരീരികാസ്വസ്ഥതകള്‍ അനുഭവപ്പെട്ടതും പരിഭ്രാന്തിക്ക് കാരണമായി. യു.എസ്. നിര്‍മിത ഡ്രില്ലിങ് ഉപകരണമായ 'അമേരിക്കന്‍ ആഗര്‍' ഉള്‍പ്പെടെയുള്ള അത്യാധുനിക സംവിധാനങ്ങള്‍ ഉപയോഗിച്ചാണ് രക്ഷാപ്രവര്‍ത്തനം നടത്തുന്നത്. 

Content Highlights: Uttarkashi tunnel collapse rescue mission blocked again.