ഡൽഹി കലാപ കേസ്: ഉമർ ഖാലിദിന്റെ ഇടക്കാല ജാമ്യാപേക്ഷ കോടതി തള്ളി

ന്യൂഡൽഹി: ഡൽഹി കലാപവുമായി ബന്ധപ്പെട്ട ഗൂഢാലോചന കേസിൽ അറസ്റ്റിലായ ഉമർ ഖാലിദിന് വീണ്ടും തിരിച്ചടി. കുടുംബത്തിലെ അടുത്ത ബന്ധുവിന്റെ സംസ്‌കാര ചടങ്ങിൽ പങ്കെടുക്കാൻ അനുവദിക്കണമെന്നാവശ്യപ്പെട്ട് അദ്ദേഹം സമർപ്പിച്ച ഇടക്കാല ജാമ്യാപേക്ഷ ഡൽഹിയിലെ വിചാരണ കോടതി തള്ളി. ഡൽഹിയിലെ കക്കഡൂമ കോടതിയാണ് ഉമർ ഖാലിദിന്റെ ഇടക്കാല ജാമ്യാപേക്ഷ തള്ളിയത്. ബന്ധുവിന്റെ മരണാനന്തര ചടങ്ങുകളിൽ പങ്കെടുക്കാൻ മാനുഷിക പരിഗണന മുൻനിർത്തി ജാമ്യം നൽകണമെന്നായിരുന്നു അദ്ദേഹത്തിന്റെ ആവശ്യം. കഴിഞ്ഞ ദിവസം ഈ അപേക്ഷയിൽ കോടതി ചില നിരീക്ഷണങ്ങൾ നടത്തിയിരുന്നെങ്കിലും ഒടുവിൽ ജാമ്യം നൽകേണ്ടതില്ലെന്ന് തീരുമാനിക്കുകയായിരുന്നു.

യുഎപിഎ (UAPA) കേസുകളിൽ ഉൾപ്പെട്ട വ്യക്തികൾക്കാണെങ്കിൽ പോലും, ജാമ്യം അനുവദിക്കേണ്ട സാഹചര്യമാണെങ്കിൽ അത് നൽകണമെന്നും വിചാരണ കൂടാതെ ദീർഘകാലം ജയിലിൽ പാർപ്പിക്കാൻ കഴിയില്ലെന്നും സുപ്രീം കോടതി കഴിഞ്ഞ ദിവസം വ്യക്തമാക്കിയിരുന്നു. ജസ്റ്റിസ് ബി.വി. നാഗരത്‌നയുടെ അധ്യക്ഷതയിലുള്ള ബെഞ്ച് ഇത്തരമൊരു നിരീക്ഷണം നടത്തി തൊട്ടടുത്ത ദിവസമാണ് വിചാരണ കോടതിയിൽ നിന്ന് ഉമർ ഖാലിദിന് തിരിച്ചടിയുണ്ടാകുന്ന ഉത്തരവ് പുറത്തുവന്നതെന്നത് ശ്രദ്ധേയമാണ്.

യുഎപിഎ ചുമത്തപ്പെട്ട കേസിൽ 2020 മുതൽ ഉമർ ഖാലിദ് ജയിലിൽ തുടരുകയാണ്. വിചാരണ കോടതിയുടെ ഈ തീരുമാനത്തോടെ അദ്ദേഹത്തിന് സംസ്‌കാര ചടങ്ങുകളിൽ പങ്കെടുക്കാൻ സാധിക്കില്ലെന്ന് ഉറപ്പായി.

Content Highlights: Karkardooma Court denied Umar Khalid's request for interim bail to attend a relative's funeral., Khalid has been in custody since 2020 in connection with the Delhi riots conspiracy case., The rejection follows recent Supreme Court observations regarding UAPA bail norms., The court maintained the decision despite humanitarian grounds requested by the defense.