‘ഇന്ത്യയിലെ പ്രസാധകർ ഞങ്ങളല്ല’; സോണിയാ ഗാന്ധിയുടെ പുസ്തക വിവാദത്തിൽ വിശദീകരണവുമായി പെൻഗ്വിൻ

ന്യൂഡൽഹി: പ്രമുഖ കോൺഗ്രസ് നേതാവ് സോണിയാ ഗാന്ധിയുടെ 'ബിലോഗിങ്' എന്ന പുസ്തകവുമായി ബന്ധപ്പെട്ട് മാധ്യമങ്ങളിൽ പ്രചരിക്കുന്ന വാർത്തകളിൽ ഔദ്യോഗിക വിശദീകരണവുമായി പ്രസാധകരായ പെൻഗ്വിൻ റാൻഡം ഹൗസ് ഇന്ത്യ. ഇന്ത്യയിൽ 'ബിലോഗിങ്' എന്ന പുസ്തകത്തിന്റെ പ്രസാധകർ തങ്ങളല്ലെന്ന് പെൻഗ്വിൻ വ്യക്തമാക്കി. എഡിറ്റോറിയൽ മാറ്റങ്ങൾ വരുത്താൻ സോണിയ ഗാന്ധി തയ്യാറാകാത്തതിനെത്തുടർന്നാണ് പുസ്തകം പ്രസിദ്ധീകരിക്കേണ്ടതില്ലെന്ന് തങ്ങൾ തീരുമാനിച്ചതെന്ന തരത്തിൽ പ്രചരിക്കുന്ന വാർത്തകൾ തെറ്റാണെന്ന് കമ്പനി അറിയിച്ചു.

പ്രസാധകർ എന്ന നിലയിൽ വസ്തുതകൾ പരിശോധിക്കുന്നതിനും പുസ്തകത്തിന്റെ മേന്മയ്ക്കായി ആവശ്യമായ ശുപാർശകൾ രചയിതാവിന് നൽകുന്നതിനും തങ്ങൾക്ക് അവകാശവും ഉത്തരവാദിത്തവുമുണ്ടെന്ന് പെൻഗ്വിൻ റാൻഡം ഹൗസ് വ്യക്തമാക്കി. പുസ്തക പ്രസിദ്ധീകരണ രംഗത്ത് ഇത് തികച്ചും സ്വാഭാവികമായ ഒരു പ്രക്രിയ മാത്രമാണ്. ഈ പുസ്തകവുമായി ബന്ധപ്പെട്ട് നടന്ന ചർച്ചകളിലുടനീളം, പുസ്തകം പ്രസിദ്ധീകരിക്കാൻ തങ്ങൾക്ക് പൂർണ താത്പര്യവും സന്നദ്ധതയുമുണ്ടായിരുന്നു എന്നും പ്രസ്താവനയിൽ പറയുന്നു. രചയിതാവുമായി നടത്തിയ സ്വകാര്യ ചർച്ചകളെക്കുറിച്ച് കൂടുതൽ പ്രതികരണങ്ങൾക്ക് തങ്ങൾ തയ്യാറല്ലെന്നും പെൻഗ്വിൻ റാൻഡം ഹൗസ് വ്യക്തമാക്കിയിട്ടുണ്ട്.

Content Highlights: Penguin Random House India clarified stance on Sonia Gandhi's book 'Belonging'., Denied rumors that the book was dropped due to editorial disagreements., Confirmed continuous interest and willingness to publish the book.