ശിക്ഷാകാലാവധി പൂർത്തിയാക്കിയ സിഖ് തടവുകാരെ വിട്ടയയ്ക്കണം; പഞ്ചാബിൽ ഹർത്താൽ, സംഘർഷം

ചണ്ഡീഗഢ്: ശിക്ഷാകാലാവധി പൂർത്തിയാക്കിയിട്ടും പതിറ്റാണ്ടുകളായി ജയിലിൽ തുടരുന്ന സിഖ് തടവുകാരുടെ മോചനം ആവശ്യപ്പെട്ട് ഇന്ന് പഞ്ചാബിൽ ഏഴ് മണിക്കൂർ ഹർത്താൽ. സിഖ് തടവുകാരുടെ മോചനം ആവശ്യപ്പെട്ട് സമരം നടത്തുന്ന 'ഖൗമി ഇൻസാഫ് മോർച്ച'യാണ് സംസ്ഥാനവ്യാപകമായി ഹർത്താലിന് ആഹ്വാനം ചെയ്തിരിക്കുന്നത്. ഇന്ന് രാവിലെ 7 മണി മുതൽ ഉച്ചയ്ക്ക് 2 മണി വരെയാണ് ഹർത്താൽ. വ്യാപാര ചന്തകൾ, റോഡ് ഗതാഗതം, ട്രെയിൻ സർവീസുകൾ, വിദ്യാഭ്യാസ സ്ഥാപനങ്ങൾ എന്നിവയുടെ പ്രവർത്തനത്തെ ബാധിച്ചേക്കുമെന്നാണ് റിപ്പോർട്ട്. വിവിധ കർഷക, സിഖ് സംഘടനകൾ ഹർത്താലിന് പിന്തുണയുമായി രംഗത്തെത്തിയിട്ടുണ്ട്. അതേസമയം, അടിയന്തര വൈദ്യസഹായങ്ങൾ ഉൾപ്പെടെയുള്ള അവശ്യ സേവനങ്ങളെ ഹർത്താലിൽ നിന്ന് ഒഴിവാക്കിയിട്ടുണ്ടെന്ന് സമരക്കാർ അറിയിച്ചു. വിമാനത്താവളങ്ങളിലേക്കുള്ള യാത്രകൾ, പരീക്ഷകൾ, വിവാഹ ചടങ്ങുകൾ എന്നിവയ്ക്കും തടസ്സമുണ്ടാകില്ല.

1995-ൽ മുൻ പഞ്ചാബ് മുഖ്യമന്ത്രി ബിയാന്ത് സിംഗിനെ വധിച്ച കേസിൽ ജീവപര്യന്തം തടവുശിക്ഷ അനുഭവിക്കുന്ന ജഗ്താർ സിംഗ് ഹവാരയ്ക്ക് പരോൾ അനുവദിക്കുക എന്നതാണ് പ്രതിഷേധക്കാരുടെ ഒരു പ്രധാന ആവശ്യം. രോഗബാധിതയായ തന്റെ അമ്മയെ കാണാൻ ഹവാരയ്ക്ക് പരോൾ നൽകണമെന്നാണ് ഇവർ ആവശ്യപ്പെടുന്നത്. ഇതോടൊപ്പം ബിയാന്ത് സിംഗ് വധക്കേസിലെ പ്രതിയായ ബൽവന്ത് സിംഗ് രജോവാന, 1993-ലെ ഡൽഹി ബോംബ് സ്‌ഫോടനക്കേസിൽ ശിക്ഷിക്കപ്പെട്ട ദേവീന്ദർപാൽ സിംഗ് ഭുള്ളർ എന്നിവരുടെ മോചനവും ഖൗമി ഇൻസാഫ് മോർച്ച ആവശ്യപ്പെടുന്നുണ്ട്. 1980-കളിലും 90-കളിലും പഞ്ചാബിലുണ്ടായ പ്രക്ഷോഭങ്ങളുമായി ബന്ധപ്പെട്ട് ശിക്ഷിക്കപ്പെട്ട സിഖ് തടവുകാരുടെ മോചനത്തിനായാണ് ഈ പ്രസ്ഥാനം പ്രധാനമായും വാദിക്കുന്നത്. 2023 ജനുവരി മുതൽ ചണ്ഡീഗഢ്-മൊഹാലി അതിർത്തിയിൽ ഖൗമി ഇൻസാഫ് മോർച്ച സമരം നടത്തിവരികയാണ്.

ഓഗസ്റ്റ് 15-ന് പഞ്ചാബ് ഗവർണറുടെ വസതിയിലേക്ക് പ്രതിഷേധക്കാർ മാർച്ച് നടത്താൻ ശ്രമിച്ചതിനെ തുടർന്ന് പോലീസും സമരക്കാരും തമ്മിൽ ശക്തമായ ഏറ്റുമുട്ടലുണ്ടായിരുന്നു. സമരക്കാരെ ബാരിക്കേഡുകൾ ഉപയോഗിച്ച് തടഞ്ഞ പോലീസ്, അവർക്ക് നേരെ ജലപീരങ്കിയും കണ്ണീർ വാതകവും പ്രയോഗിച്ചു. പ്രക്ഷോഭകർ നടത്തിയ കല്ലേറിൽ ചില പോലീസ് ഉദ്യോഗസ്ഥർക്ക് പരിക്കേറ്റതായും ചണ്ഡീഗഢ് പോലീസ് അവകാശപ്പെടുന്നു. ഹവാരയ്ക്ക് 10 ദിവസത്തെ പരോൾ അനുവദിക്കുന്നതിനെ പഞ്ചാബ് മുഖ്യമന്ത്രി ഭഗവന്ത് മാൻ പിന്തുണയ്ക്കുകയും ഇക്കാര്യത്തിൽ ഗവർണറുമായി ചർച്ച നടത്തുകയും ചെയ്തിട്ടുണ്ട്.

വിവിധ സിഖ്, കർഷക സംഘടനകൾ ഹർത്താലിന് പിന്തുണ പ്രഖ്യാപിച്ചിട്ടുണ്ട്. സിഖ് മതകാര്യ സമിതിയായ ശിരോമണി ഗുരുദ്വാര പ്രബന്ധക് കമ്മിറ്റി തങ്ങളുടെ ഓഫീസുകൾക്കും സ്ഥാപനങ്ങൾക്കും ഇന്ന് അവധി പ്രഖ്യാപിച്ചുകൊണ്ട് സമരത്തിന് പിന്തുണ പ്രഖ്യാപിച്ചു. വെള്ളിയാഴ്ച നടത്താനിരുന്ന ഇവരുടെ എക്‌സിക്യൂട്ടീവ് യോഗം ശനിയാഴ്ചത്തേക്ക് മാറ്റുകയും ചെയ്തിട്ടുണ്ട്. ഇതിനുപുറമെ ശിരോമണി അകാലിദൾ (പുനർ സുർജിത് ജനറൽ), സാഡ് വാരിസ് പഞ്ചാബ് ദേ, ഭാരതീയ കിസാൻ യൂണിയൻ (രാജേവാൾ) തുടങ്ങിയ സംഘടനകളും ഹർത്താലിനെ പിന്തുണയ്ക്കുന്നു. കിസാൻ മസ്ദൂർ മോർച്ച നേതാവ് സർവൻ സിംഗ് പന്ഥേർ ഹർത്താൽ വിജയമാക്കാൻ ജനങ്ങളോട് അഭ്യർത്ഥിച്ചു. .

കുട്ടികളുടെ സുരക്ഷ മുൻനിർത്തി ഇന്ന് സംസ്ഥാനത്തെ സ്വകാര്യ സ്‌കൂളുകൾക്ക് അവധി പ്രഖ്യാപിച്ചിട്ടുണ്ടെന്ന് 7,500-ലധികം സ്വകാര്യ സ്‌കൂളുകളെ പ്രതിനിധീകരിക്കുന്ന ഫെഡറേഷൻ ഓഫ് പ്രൈവറ്റ് സ്‌കൂൾസ് ആൻഡ് അസോസിയേഷൻ അറിയിച്ചു. കൂടാതെ പഞ്ചാബ് യൂണിവേഴ്‌സിറ്റി ഇന്ന് നടത്താനിരുന്ന പരീക്ഷകൾ മാറ്റിവെച്ചു. മാറ്റിവെച്ച പരീക്ഷകൾ സെപ്റ്റംബർ 10-ന് നടത്തുമെന്നും യൂണിവേഴ്‌സിറ്റി അറിയിച്ചിട്ടുണ്ട്.

Content Highlights: Qaumi Insaaf Morcha called a 7-hour statewide hartal in Punjab demanding the release of long-detained Sikh prisoners., Key demands include parole for Jagtar Singh Hawara and release of Balwant Singh Rajoana and Devinderpal Singh Bhullar., Emergency services, weddings, and airport travel are exempted, but private schools and university exams are postponed., Several farmer and Sikh organizations, including SGPC and BKU Rajewal, are supporting the strike.