2023 ലെ പ്രളയത്തിൽ ആകസ്മികമായി അതിർത്തി കടന്ന 7 ഇന്ത്യൻ പൗരരെ പാകിസ്താൻ തിരിച്ചയച്ചു

ന്യൂഡൽഹി: 2023-ലെ പ്രളയത്തിൽ ആകസ്മികമായി അതിർത്തി കടന്നതിനെ തുടർന്ന് തടവിലാക്കപ്പെട്ട ഏഴ് ഇന്ത്യൻ പൗരന്മാരെ പാകിസ്താൻ ശനിയാഴ്ച തിരിച്ചയച്ചു. പഞ്ചാബിലെ അട്ടാരി ചെക്ക് പോസ്റ്റിലാണ് കൈമാറ്റം നടന്നത്.

ഇരുരാജ്യങ്ങൾക്കും ദിവസങ്ങൾക്ക് മുൻപേ മോചന ഉത്തരവുകൾ ലഭിച്ചിരുന്നതായി അട്ടാരി അതിർത്തിയിലെ പ്രോട്ടോക്കോൾ ഓഫീസർ അരുൺ മഹൽ പറഞ്ഞു. "പാകിസ്താൻ റേഞ്ച് ഉദ്യോഗസ്ഥർ ഏഴ് തടവുകാരെ ബിഎസ്എഫിന് കൈമാറി. തുടർന്ന് നടപടിക്രമങ്ങൾ പൂർത്തിയാക്കുന്നതിനായി അവരെ കസ്റ്റംസ്, ഇമിഗ്രേഷൻ ഓഫീസിലേക്ക് കൊണ്ടുവന്നു," അരുൺ മഹൽ പറഞ്ഞു.

തടവുകാരിൽ നാല് പേർ ഫിറോസ്പുർ ജില്ലയിൽ നിന്നുള്ളവരാണ്, പഞ്ചാബിലെ ജലന്തർ, ലുധിയാന എന്നിവിടങ്ങളിൽ നിന്ന് ഒരാൾ വീതവും, ഉത്തർപ്രദേശിൽ നിന്ന് ഒരാളുമുണ്ട്. 2023-ൽ അതിർത്തിയിൽ കനത്ത പ്രളയമുണ്ടായപ്പോൾ കന്നുകാലികളെ രക്ഷിക്കാൻ ശ്രമിക്കുന്നതിനിടെയാണ് ഇവർ പാകിസ്താൻ അതിർത്തിയിലേക്ക് ഒഴുകിപ്പോയത്.

ശക്തമായ ഒഴുക്ക് കാരണം അതിർത്തി വേലിക്ക് അപ്പുറത്തേക്ക് പെട്ടുപോയെന്ന് മോചിതരായവരിൽ ഒരാൾ പറഞ്ഞു. "ഒഴുക്ക് കാരണം ഞങ്ങളിൽ മൂന്നുപേർ അപ്പുറത്തേക്ക് പോയി. ഞങ്ങൾ പാകിസ്താനിലെ ഒരു വീട്ടിലെത്തി, അവരോട് ഇന്ത്യൻ സൈന്യത്തിനരികിലേക്ക് കൊണ്ടുപോകാൻ ആവശ്യപ്പെട്ടു, എന്നാൽ അവർ ഞങ്ങളെ പാകിസ്താൻ സൈന്യത്തിന് കൈമാറി. മനഃപൂർവ്വം അതിർത്തി കടന്നതല്ല എന്ന് ഞങ്ങൾ പറഞ്ഞെങ്കിലും അവർ ചെവികൊണ്ടില്ല. അവർ ഞങ്ങളുടെ മുഖം മറച്ച് കൊണ്ടുപോയി. ഞങ്ങൾക്ക് ഒരു വർഷത്തെ ശിക്ഷ ലഭിച്ചു. ഞങ്ങളെ തിരിച്ചെത്തിച്ച സർക്കാരിനോട് ഞങ്ങൾ നന്ദിയുള്ളവരാണ്," അദ്ദേഹം പറഞ്ഞു.

മറ്റൊരാൾ പറഞ്ഞത്, താൻ രണ്ട് വർഷത്തിലേറെയായി തടവിലായിരുന്നു എന്നാണ്. "ഞാൻ രണ്ടര വർഷത്തോളം പാകിസ്താനിൽ താമസിച്ചു. അവർ എന്നെ ഒരു മുറിയിൽ പൂട്ടിയിട്ടു. അവർ എന്നെ അടിക്കാൻ മാത്രമാണ് പുറത്ത് കൊണ്ടുവന്നിരുന്നത്, എന്നിട്ട് വീണ്ടും പൂട്ടിയിട്ടു," അദ്ദേഹം ആരോപിച്ചു.

താൻ മൂന്ന് മാസം കസ്റ്റഡിയിൽ കഴിഞ്ഞുവെന്നും, പാകിസ്താൻ ജയിലുകളിൽ കഴിയുന്ന മറ്റ് ഇന്ത്യക്കാരെ മോചിപ്പിക്കാൻ നടപടി എടുക്കണമെന്നും മറ്റൊരു തടവുകാരൻ പറഞ്ഞു. "അവിടെ മറ്റ് ഇന്ത്യക്കാരും ഉണ്ട്. പതിനെട്ടുപേർ മാനസികാരോഗ്യ കേന്ദ്രത്തിലാണ്. അവർ ഞങ്ങളെ അടിച്ചു. ഞാൻ 28 ദിവസത്തേക്ക് റിമാൻഡിലായിരുന്നു," അദ്ദേഹം പറഞ്ഞു.

മറ്റൊരാൾ പറഞ്ഞത്, കൃഷി ഉപകരണങ്ങൾ രക്ഷിക്കാൻ ശ്രമിക്കുന്നതിനിടെയാണ് താൻ ഒഴുകിപ്പോയതെന്നാണ്. "ഞാൻ ഗ്രാമവാസികളോട് സഹായം ചോദിച്ചു, എന്നാൽ അവർ ഞങ്ങളെ സൈന്യത്തിന് കൈമാറി. എനിക്ക് ഒരു വർഷത്തെ ശിക്ഷയും 10,000 രൂപ പിഴയും ലഭിച്ചു. ഞാൻ 2023 ജൂലായിലാണ് അതിർത്തി കടന്നത്. മറ്റുള്ളവരെയും തിരികെ കൊണ്ടുവരുമെന്ന് സർക്കാർ ഉറപ്പാക്കണം," അദ്ദേഹം പറഞ്ഞു.

പഞ്ചാബ് മേഖലയിൽ പ്രളയവും മൺസൂൺ സംബന്ധമായ സംഭവങ്ങളും കാരണം ആകസ്മികമായി അതിർത്തി കടക്കുന്ന പൗരന്മാരെ തിരിച്ചയക്കുന്നതിനായി ഇന്ത്യയും പാകിസ്താനും തമ്മിൽ നടന്ന നയതന്ത്രപരമായ ഏകോപനത്തിന്റെ ഫലമായാണ് ഈ തിരിച്ചയക്കൽ നടന്നത്.

Content Highlights: Seven Indian citizens, who accidentally crossed the Pakistan border during the 2023 floods while saving cattle, were repatriated by Pakistan. Learn their stories.