വിബി-ജി റാം ജി ബില്ലിൽ പ്രതിപക്ഷത്തിന്‍റെ സഭയിലെ പെരുമാറ്റം ഗുണ്ടാരാജ് പോലെ– ശിവരാജ് സിങ് ചൗഹാൻ

ന്യൂഡൽഹി: വികസിത് ഭാരത് ഗ്യാരണ്ടി ഫോർ റോസ്ഗാർ ആൻഡ് അജീവിക മിഷൻ (ഗ്രാമീൺ) ബില്ലിനെക്കുറിച്ചുള്ള ലോക്സഭാ ചർച്ചയ്ക്കിടെയുള്ള പ്രതിപക്ഷത്തിന്റെ പെരുമാറ്റം അപകീർത്തികരമെന്ന് വിമർശിച്ച് കേന്ദ്ര കൃഷിമന്ത്രി ശിവരാജ് സിങ് ചൗഹാൻ. കോൺഗ്രസ് എംപിമാരുടെയും മറ്റ് പ്രതിപക്ഷ എംപിമാരുടെയും നടപടികളെ അദ്ദേഹം ഗുണ്ടാരാജുമായി താരതമ്യം ചെയ്യുകയും ചെയ്തു. പാർലമെന്റിലെ പ്രതിപക്ഷ എംപിമാരുടെ നടപടികൾ ജനാധിപത്യ മൂല്യങ്ങളെ ദുർബലപ്പെടുത്തിയതായി ചൗഹാൻ കുറ്റപ്പെടുത്തി. സഭ നിർത്തിവെച്ചതിന് ശേഷം ബിജെപി ആസ്ഥാനത്ത് മാധ്യമപ്രവർത്തകരോട് സംസാരിക്കുകയായിരുന്നു അദ്ദേഹം.

നിയമനിർമ്മാണത്തിന്റെ പുതിയ പേരിനോടുള്ള പ്രതിപക്ഷത്തിന്റെ എതിർപ്പുമായി ബന്ധപ്പെട്ട് പാർലമെന്റിലുണ്ടായ ബഹളത്തെ സൂചിപ്പിച്ചുകൊണ്ട് പ്രതിപക്ഷം പേരിനെക്കുറിച്ച് മാത്രമേ ചിന്തിക്കുന്നുള്ളൂ, എന്നാൽ കേന്ദ്രസർക്കാർ പ്രവൃത്തിയിലാണ് കൂടുതൽ ശ്രദ്ധിക്കുന്നതെന്ന് ചൗഹാൻ പറഞ്ഞു. പാർലമെന്റിൽ കോൺഗ്രസിന്റെയും ഇന്ത്യ മുന്നണിയുടെയും എംപിമാരുടെ ലജ്ജാകരമായ പെരുമാറ്റത്തെ ശക്തമായി അപലപിക്കുന്നതായും അവരുടെ പെരുമാറ്റത്തിലൂടെ പ്രതിപക്ഷം ജനാധിപത്യത്തെ അപമാനിക്കുകയും പാർലമെന്ററി പാരമ്പര്യത്തെ ഗുണ്ടാരാജ് ആക്കി മാറ്റുകയും ചെയ്തുവെന്നും ചൗഹാൻ കൂട്ടിച്ചേർത്തു.

വിബി-ജി റാം ജി ബില്ലിനെക്കുറിച്ചുള്ള ചർച്ചയെ സംബന്ധിച്ചുള്ള ചോദ്യത്തിന് മറുപടിയായി മഹാത്മഗാന്ധി മുന്നോട്ട് വെച്ച ആദർശങ്ങളെ പ്രതിപക്ഷം പലതവണ കൊന്നു എന്നും രാഷ്ട്രീയ നേട്ടങ്ങൾക്കായി അദ്ദേഹത്തിന്റെ പേര് ഉപയോഗിച്ചു എന്നും ചൗഹാൻ കോൺഗ്രസിനെ രൂക്ഷമായി വിമർശിച്ചു. യുപിഎ ഭരണകാലത്ത്, എംജിഎൻആർഇജിഎ അഴിമതി നിറഞ്ഞതായിരുന്നുവെന്നും നിർദ്ദിഷ്ട ജോലികൾക്കായി പ്രതീക്ഷിച്ചത്ര ഫണ്ട് ചെലവഴിച്ചില്ലെന്നും ചൗഹാൻ പറഞ്ഞു.

Content Highlights: Union Minister Shivraj Singh Chouhan slams opposition MPs for `goondaism` during Lok Sabha debate on Viksit Bharat guarantee bill, questioning their commitment to democratic values.