2026-ലെ ബജറ്റ് തന്ത്രം; പ്രധാനമന്ത്രി മോദി സാമ്പത്തിക വിദഗ്ധരുമായി കൂടിക്കാഴ്ച നടത്തി

ന്യൂഡൽഹി: 2047-ഓടെ ഇന്ത്യയെ ഒരു വികസിത രാഷ്ട്രമാക്കി മാറ്റുക എന്ന ലക്ഷ്യം കൈവരിക്കുന്നതിനായി വിവിധ മേഖലകളിൽ മിഷൻ മോഡ് പരിഷ്കാരങ്ങൾ നടപ്പിലാക്കണമെന്ന് പ്രധാനമന്ത്രി നരേന്ദ്ര മോദി. 2026-27 കേന്ദ്ര ബജറ്റിന് മുന്നോടിയായി നീതി ആയോഗിൽ പ്രമുഖ സാമ്പത്തിക വിദഗ്ധരുമായി നടത്തിയ കൂടിക്കാഴ്ചയിലാണ് അദ്ദേഹം ഇക്കാര്യം വ്യക്തമാക്കിയത്.

ഇന്ത്യയുടെ നയരൂപീകരണവും ബജറ്റും 2047-ലെ ലക്ഷ്യങ്ങളുമായി ചേർന്നുനിൽക്കുന്നതാകണം എന്ന് പ്രധാനമന്ത്രി പറഞ്ഞു. 2047-ഓടെ വികസിത ഇന്ത്യയെന്ന കാഴ്ചപ്പാട് സർക്കാർ നയങ്ങൾക്ക് അതീതമായി യഥാർത്ഥ ജനകീയ അഭിലാഷമായി മാറിയിട്ടുണ്ടെന്നും അദ്ദേഹം കൂട്ടിച്ചേർത്തു.

ഉൽപ്പാദന, സേവന മേഖലകളിലെ ഉൽപ്പാദനക്ഷമതയും മത്സരക്ഷമതയും വർദ്ധിപ്പിക്കുന്നതിനുള്ള നിർദ്ദേശങ്ങൾ സാമ്പത്തിക വിദഗ്ധർ യോഗത്തിൽ പങ്കുവെച്ചു. ഗാർഹിക സമ്പാദ്യം വർദ്ധിപ്പിക്കുക, അടിസ്ഥാന സൗകര്യ വികസനം, അത്യാധുനിക സാങ്കേതികവിദ്യയുടെ ഉപയോഗം എന്നിവയിലൂടെ രാജ്യത്തിന്റെ സാമ്പത്തിക ഘടനയിൽ മാറ്റം കൊണ്ടുവരുന്നതിനെക്കുറിച്ച് ചർച്ചകൾ നടന്നു.

വിവിധ മേഖലകളിലെ ഉൽപ്പാദനക്ഷമത വർദ്ധിപ്പിക്കുന്നതിൽ ആർട്ടിഫിഷ്യൽ ഇന്റലിജൻസ് വഹിക്കുന്ന പങ്കിനെക്കുറിച്ച് വിദഗ്ധർ സംസാരിച്ചു. അതോടൊപ്പം ഇന്ത്യയുടെ ഡിജിറ്റൽ പബ്ലിക് ഇൻഫ്രാസ്ട്രക്ചർ കൂടുതൽ വിപുലീകരിക്കുന്നതിനെക്കുറിച്ചും ചർച്ചകൾ നടന്നു. 2025-ൽ നടപ്പിലാക്കിയ വിപുലമായ പരിഷ്കാരങ്ങൾ വരും വർഷങ്ങളിൽ കൂടുതൽ ശക്തിപ്പെടുത്തുന്നതിലൂടെ ഇന്ത്യയെ ലോകത്തിലെ ഏറ്റവും വേഗത്തിൽ വളരുന്ന സമ്പദ്‌വ്യവസ്ഥകളിൽ ഒന്നായി തുടരാൻ സഹായിക്കുമെന്ന് യോഗം വിലയിരുത്തി.

Content Highlights: PM Modi urges mission-mode reforms for long-term growth & global integration to achieve Viksit Bharat by 2047. Experts discuss AI, DPI & structural transformation for India`s economic future.